識揀,一定唔會補地價

識揀,一定唔會補地價

2015 財政預算出爐,因為推出稅務優惠,市民反應樂觀。但喺大家最關心嘅樓市同住屋問題上,就着實無咩確實措施,而當中嘅補價貸款擔保計劃由其低能!

唔知話啲高官係脫離「中產」太耐,未住過居屋,定話佢地真心膠,咁白痴嘅計劃都出得街……  我一補左地價,我都用市場價買賣出租,幫到個租屋/居屋市場咩? (有心人可 reference 啲第一、二期本身唔駛補地價既居屋,如何文田俊民苑等價位。) 未補地價嘅居屋用黎自住係王道。大佬,我俾 5 – 7 成市價,就有成間屋住,住得好地地,做咩要辛苦自己去揹條數供個補地價? 貪供樓開心?

總括現時住喺未補地價居屋的人仕大至分為 3 類:

1)        有錢人

大多透過父母以前剩低嘅公屋資格,換綠表,一路有錢過嚟。依家仲未賣未租既,大多都唔會租賣。我有錢,想玩供樓遊戲,我都出去私樓玩,俾完首期,即刻收租啦! 唔好忘記,樓係要有 2 層先可以賺錢,雖然個地價本金唔駛俾住,但我會唔會傻到俾多啲錢(利息同保險費) 出租自己住個單位,有咩 SO?

2)        「真」中產,有啲錢,但又俾唔到多 1 層樓既首期

大部份啱啱供完個綠表價,每月有啲錢剩……. 想投資又唔識 (因為識嘅大部份已經變咗第 1 類人),但錢又未夠俾多 1 層首期。係咪覺得政府呢個計劃好正,專為你而設? 「我一路供,就可以成為私樓,第時靈活啲嘛。」咪咁 happy 住, 當你借左錢,補完係,係可以放租,喂,咁你住邊呀!? 一邊收租,一邊俾租再加個嗰保費同利息…….. 理想生活真係咁咩? 千祈唔好忘記,你辛辛苦苦供完個單位,你一路住,咩都唔駛俾架喇。一個唔該,樓市冧咗,恭喜哂,你會成為負資產,供唔到唔知佢會唔會收番間屋……..

個計劃保費其實唔平,參考報紙「補價貸款擔保計劃利息水平參考逆按揭,浮息為 P 減 2.5 厘,現為 2.75 厘,一次過保費 2 厘,每年保費 1.25 厘。」用例子說明,一個市值5百萬單位,正常出租價4厘,每年收入20萬,好似幾好呢,計下支出你就知,補地價大概150 -250萬,支出每年利息加保費大概6-10萬 (第1年因一次性保費仲要多啲,大概9-15萬) ,即你一年收入最多14萬,每月有萬零蚊俾你去出面租屋,租到啲咩,心照啦~仲有呀,你一路無還過個本金㗎 😀 係咪真係抵?幫你出租單位? 益左邊個,你明嘅!

3)        窮 L (做完業主立即變個隻) 

一係就未供完依家個單位,一係就啲錢啱啱好應付到生活。斷估都唔會有閒錢join佢個爛鬼scheme!加油! 你有第一層樓架喇,供完就會有好生活!

如果呢個政府真心想個租屋/居屋市場流動性大啲,靈活啲,唔該:

1)       俾未補地價居屋嘅業主樓換樓

放自己嗰層之後可以再買番一層未補地價居屋,咁佢就幫到成個市場嘅流動性。人喺唔同時間有唔同嘅住屋需要,如打工仔,會想住市區,方便返工; 年紀大嘅,佢地可以將較大面積嘅居屋賣左,買一層細啲嘅單位居住,套現現金應付生活所需。你俾啲 jetso,佢地先有推動力換樓賣樓。不過,政府一出呢個計劃,又會俾人話佢資助未補地價居屋嘅業主,雙重優惠。你諗下,佢一路霸住喺度住,你都係無佢符,逼都逼唔走! 可能啲未補地價居屋嘅業主睇下睇下,買返私樓呢~~

2)        已補地價居屋免地價

呢家綠表持有者可以為已補地價嘅居屋向政府再一次申請免補地價優惠。簡單嚟講,政府資助你3成(或者一個上限價),幫你置業,同時騰出公屋單位,供有需要人士居住。其實應該有得諗,本身綠表持有者都可以用優惠價買新居屋,政府起唔切樓,點解唔好好利用呢家嘅已補地價居屋單位?

 

大家唔好忘記點解 2014 年未補地價居屋樓價升幅會高過私樓,係 Demand and Supply 呀! 既然樓起唔切,點解唔試下用其他方法嚟增加未補地價居屋市場嘅流動性呢?

我真心相信,個居屋市場搞好啲,嗰批公屋富戶先會俾你「逼到」真係買樓。

啱睇就Like埋我地個Facebook專頁

Tagged , .

在市儈的商業社會打滾的一粒浮游生物,積極透過不停旅行玩樂,遊說自己賣時間俾公司是物超所值的。

Leave a Comment

Your email address will not be published. Required fields are marked *