無良僱主寫鱔稿壓價 邊個最開心?

無良僱主寫鱔稿壓價 邊個最開心?

尋日臉書好多朋友 share 咗《大專生起薪8千 有人竟叫1.6萬》嗰篇文[0]。經濟日報又呃到幾十廿萬個 click,真係恭喜發財,生意興隆,可喜可賀。標題加上「竟然」兩個字,的確係畫龍點睛,令本身都好有爭議嘅題目增添濃厚嘅花生味道。起標題嗰條友真係好勁,真心佩服。

但其實「竟叫1.6萬」並非問題所在。老老實實,一個最普通嘅大專畢業生,係咪真係值 1.6 萬?未必。睇返 2013年統計處數據,15 至 24 歲嘅年輕人工資中位數係 $10,000 [1],係低於 1.6 萬嘅。 (至於點解篇報導寫 $8000? Well,其實呃點擊唔使講事實嘅[2]…) 無論中位數係 $10,000 定 $8000,重點係兩個數都遠低於 $16,000,即係大部份年輕人嘅收入都低於 1.6 萬。如果你相信「有效市場假說 (efficient market hypothesis)」,結論就係大部份年輕人的確唔值 1.6 萬。如果一個普普通通嘅年輕人「竟然」同你講佢想要有 1.6 萬收入,咁就真係好離譜,因為佢真係唔值呢個價錢嘛!
但係,我哋分析「平均值」、「中位數」呢啲數據要好小心。舉個例,香港中學生入大學比率大約 20% 左右。用返同樣邏輯,我哋可以話「80% 考生未獲派大學學位,有人*竟然*報港大」。你話報港大係「上進」又得,係「不安份」又得,根本就係任你講。個問題係報港大嗰條友,究竟有冇料到先?只要佢係有料到,就算入大學比率係 1% 佢都入到大學;如果佢冇料到,就算入大學比率係 99% 佢都唔見得入到。

所以睇數據好多時都冇乜用。平均值高或低,同你未必冇咩直接關係。呢樣野大家都知架其實。起碼大家都知道讀唔同嘅科,唔同嘅大學,做唔同嘅行業,出到嚟嘅人工唔同。唔係大家點解爭住去讀啲所謂「神科」,搏做專業人士,逗多啲人工? [3]

當然,一個人「值幾錢」,除咗學歷、行業、經驗之外,仲有好多因素。偏偏啲所謂「人力資源顧問」就好似腦殘咁,將求職者全部當成一式一樣嘅商品 (commodity),無視個人性格、專長、喜好等等嘅因素。點解咁多老闆會請埋啲「返工冇責任心」嘅人?返工唔上心嘅原因不外乎兩個:一、人工低;二、唔鍾意份工。如果老闆諗住用「平均價錢」去請一個工作機器,結果一定係請到一個「平均員工」返黎。呢位「平均員工」梗係「冇責任心」啦,因為人類本性就係好吃懶做架啦,有幾多人真係對工作好有熱誠、好有使命感?

所以一個老闆除咗要知道市價之外,仲要識得請人。讀中史都有講啦,古代英名嘅君主,個個都係「知人善任」,即係識得搵合適嘅人去做合適嘅工作。你同我講某某應徵者 Y 大學畢業、X 年工作經驗……其實有乜用?好多人做咗幾十年人都係戇居居,亦有好多人做兩三年嘢就做到好好成績。講到尾,不斷強調「N 年經驗」其實只不過係論資排輩,而漠視個人能力。呢種制度當然唔「公平」啦,但我又唔係正義嘅朋友,我唔會話呢個制度「唔好」。我只會指出制度兩個漏洞,俾大家充份利用:

(一)、作為員工,只要你有張沙紙,個 CV 作到靚靚地,呃到人請你,你就唔洗學任何野架喇~~ 反正你返工偷懶都可以儲到經驗值,洗乜咁搏命?你搏命做一年,同埋hea做一年,都係計一年經驗喎,打死都唔搏啦。
(二)、作為僱主,市場上其他僱主個個都係開差唔多嘅價錢,所以只要你識揀,隨時可以用「平均」價錢請到超班嘅人物,簡直係物超所值[4]。當然,除咗守株待兔等人嚟應徵之外,仲可以主動出擊物識人才。只要你作下狀關心員工、俾稍微高於市價嘅人工,就會有大把人爭住幫你打工。做老闆係咪好容易呢!

呢兩項建議係咪比啲濕鳩「人力資源顧問」嘅廢話更加有用呢?不過講明先,呢兩招喺一個「公平」嘅勞動市場入面未必咁 work,但只要香港人繼續睇《經濟日報》,繼續相信啲「人力資源顧問」,我呢兩招就一定 work。邊個最開心?梗係我嘅讀者最開心啦。

 

[0] https://hk.news.yahoo.com/%E5%A4%A7%E5%B0%88%E7%94%9F%E8%B5%B7%E8%96%AA8%E5%8D%83-%E6%9C%89%E4%BA%BA%E7%AB%9F%E5%8F%AB1-6%E8%90%AC-225531166.html
[1] http://www.censtatd.gov.hk/hkstat/sub/sp210_tc.jsp?productCode=D5250017
[2] https://www.facebook.com/permalink.php?id=469660456442456&story_fbid=489209391154229
[3] http://cedars.hku.hk/sections/careersplacement/GraduateEmploymentSurvey/report/FD/FD_report_2012.pdf
[4] http://www.vjmedia.com.hk/articles/2013/08/16/46468

啱睇就Like埋我地個Facebook專頁

Tagged .

全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

Leave a Comment

Your email address will not be published. Required fields are marked *