「理性」就係「冇得揀」

「理性」就係「冇得揀」

(轉自《應用哲學》專頁)

所謂「理性」,通常係指,你有幾個選擇,就必須揀一個令你得到最大利益嘅選擇。

舉個例,恩恩要買 5 公斤蝦子麵。佢格價,發現陳伯賣 $130,黃老太賣 $150,咁理性嘅恩恩就會幫襯陳伯,因為慳 $20 嘛。

一個理性嘅人,除咗買蝦子麵慳廿蚊,仲會為社會帶嚟其他好處。舉個例,豪哥暗戀恩恩,成日 stalk 佢,咁佢只要格下價,就知道恩恩一定會去陳伯嗰度買蝦子麵。由此得知,理性恩買蝦子麵嘅行為,係可以預見嘅。而只要恩恩嘅行為可以預見,豪哥亦都可以根據手頭上嘅資訊,作出相應嘅決定。推而廣之,只要社會上絕大部份嘅人都係理性嘅,咁社會就會相對穩定,唔會有人作出一啲異想天開嘅怪事,例如唔會有人無端端喺街上面打你一拳。所以理性嘅社會,係大部份人樂見的。
理性嘅社會,仲有其他好處。因為理性決定係「揀一個令你得到最大利益嘅選擇」,所以,通常啲選擇會匯合(converge) 同一致(consistent)。舉個例,恩恩買蝦子麵,原來係為咗班會活動。佢當然可以發動全班公投決定幫襯陳伯定係黃老太,但最後冇咁做。點解?因為只要全班同學都係理性嘅人,就梗係會揀平啲嗰間架啦。「最平嗰間」只有一間,唔洗揀,冇爭議。邊個反對,就係唔理性,就係痴線佬癲婆,就係激進搞事分子。咁大罪名,邊個揹得起呀?由此得知,理性嘅決定,可以減低爭議,令決策變得有效率。

大家有冇發現,講咗咁耐,我都冇講到蝦子麵好唔好食?

因為,好唔好食,係個人口味,唔關「理性」事架嘛。其實恩恩買蝦子麵嘅時候,曾經問過覓覓同仆擇,佢哋都話陳伯嘅蝦子麵好食。偏偏方方不置可否。

其實方方想食叉燒飯。不過講出嚟,成件事就好唔「理性」。叉燒又唔健康,又貴,又唔啱港女口味。作為一個理性嘅好學生,佢選擇咗必要嘅沉默。

但係都冇計。所謂「理性」,其實就係以大家共同利益為名,抹殺個人選擇嘅仆街概念。個人選擇係乜嘢?就係一個未必最「優化」嘅選擇、就係一個唔「理性」嘅選擇。如果所有決定都從「理性」出發,咁咪全世界嘅人都走去讀 law 讀 medic 讀 BBA 然後入 big4 做核數師囉。呢啲叫「有得揀」定係「冇得揀」?我會叫做「冇得揀」囉。(… 咦? sor9ry,乜原來香港真係咁架?)

咩係「選擇」?選擇就係「唔理性」。
咩叫「理性」?理性就係「冇得揀」。

唔好搞錯喎,我唔係話「理性」一定係社會階級壓迫。喺公共領域入面,好多時「理性」係必須嘅,否則會產生更多問題。喺公共領域入面,「理性」嘅決策方法,有助減低當權者作出「個人選擇」嘅能力,可以減少獨裁嘅決定、減少利益輸送。如果唔係揀最平嗰間蝦子麵,而係由某些人用「個人喜好」決定買乜,咁就好容易產生利益輸送嘅問題。

所以,喺一個理想社會,越係身在高位嘅人,可以作出嘅「個人選擇」就越少。大眾反而可以「唔理性」。而事實上,大眾嘅「唔理性」,只係反映大家嘅價值同價值觀,唔可以單靠一個簡單嘅優化方程式(optimization formula)去表達。

一個社會,因為當權者嘅「唔理性」搞出個大頭佛,之後要人民用「理性方法」幫佢哋埋單,其實好荒謬。當然啦,喺政治倫理入面,究竟有冇啲好威威嘅哲學家分析過咩係「理性」,點解人民抗爭一定要「理性」,我就唔知喇。到而家都冇人話我知咩叫「抗爭倫理」,睇嚟我成世都係唔識哲學架喇。

(Image Credit: Elektra Grey Photography)

啱睇就Like埋我地個Facebook專頁

Tagged , .

全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

Leave a Comment

Your email address will not be published. Required fields are marked *