凡人三不足

凡人三不足

人類必然無知,必然主觀,必然愚蠢。姑且叫呢三樣嘢做「三不足」。

只要你承認人類有以上三樣「不足」,咁我個 Facebook page 嘅所有見解,你都可以輕鬆(?)推論出嚟,唔洗聽我廢噏。

咁點解我要開呢個 page 講咁多廢話?因為,太多所謂「知識份子」,以超然之態,不斷恥笑人類嘅無知、主觀、愚蠢。佢哋當然內心唔會承認自己都係無知、主觀、愚蠢。

但係,事實上所有人都有「三不足」。所以,佢哋嘅「知識論」、「思考方法」,全部都扭曲晒。佢哋嘅學問扭曲晒,本來都係佢哋自己嘅事。但係,有一班人自稱「哲學家」,佢哋自稱主宰「知識」,自稱主宰人類「思考」嘅方法,自稱主宰「客觀而言必然為真」嘅東東。如是者,佢哋向年輕學子傳道,荼毒咗不知幾多善男信女。

我講嘅理論雖然有時好似「阿媽係女人」咁淺白,但係偏偏大家被荼毒過之後,唔習慣接受自己嘅「三不足」,唔習慣用 #應用哲學 嘅思維,去了解呢個世界,去探求真理。其實我都係,所以我要不斷重覆又重覆,洗自己腦,同時又洗大家腦。

「三不足」雖然講就似缺點,其實係優點。人類無知,所以可以嚮世界學習知識;人類主觀,所以可以有個人信念、所以知道要學習同其他人溝通[2];人類愚蠢,所以知道自己嘅決定好可能錯,所以要學懂愛而無悔[3]。否定「三不足」嘅人,永遠學唔識呢啲嘢。

點樣為之否定「三不足」呢?只須用一個方法判斷:「神嘅口吻」。究竟佢有冇用一種「無所不知」、「客觀」、「看透世事」嘅態度去分析事物呢?如果有,就係否定「三不足」[4]。無所不知,即係唔需要再喺世界吸取新知識;客觀,即係自以為有神嘅視角;看透,即係覺得世界上所有嘢都冇意義。有咁樣嘅態度,治學點可以唔錯?做人又點可能唔矛盾?

我話人類有「三不足」,並唔係叫人安於現狀。正正就係唔安於現狀,先至要承認自己不足,力求改進。我嚮往神嘅知識同智慧,所以向真理不斷邁進。「走向神而唔係神」呢種思維,係動態嘅,係流動嘅,係不斷演變嘅。只要有方向,有演變,就有時間,就有意義。

可能你會話,你唔嚮往知識同智慧,所以你唔需要不斷向「神」邁進。之但係,唔講「知識」唔講「智慧」,套用任何嘢都得架喎。因為所謂「神」,係無所不能,係「完美」嘅。無論你嚮往乜嘢都好,只要你承認自己不足,咁你就可以向住「神」嘅方向邁進。只要你知道人類永遠達唔到「神」嘅境界[5],但同時你又嚮往「神」一般嘅完美,咁,你嘅人生,永遠都唔會失去意義。

——
[1] 題外話:好叻叻嘅哲學家嘅理論,應用於電腦系統(唔包括人工智能),係好洗得架。即係話,「叻叻理論」,應用於最蠢嘅電腦,非常有效。
[2] http://menjap.com/2015/07/%E3%80%8C%E5%AE%A2%E8%A7%80%E3%80%8D%E5%8F%AA%E4%BF%82%E6%BA%9D%E9%80%9A%E5%B7%A5%E5%85%B7/
[3] http://style.vjmedia.com.hk/2015/02/23/1749
[4] 但係,恥笑其他人蠢,恥笑其他人無知,未必有咩問題。因為,雖然人類係無知愚蠢,但係程度有深淺。正所謂「學無前後,白痴為仙。」(好似係)
[5] 其實「無所不能」根本係違反邏輯,但係我可以講違反邏輯嘅概念架,只要講明人類做唔到,但可以憑空想象呢個概念,咁就冇錯架啦。

圖:http://www.torange.us/animals/horse/Three-horse-ascertain-relationships-1631.html (CC-BY 4.0)

啱睇就Like埋我地個Facebook專頁

全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

Leave a Comment

Your email address will not be published. Required fields are marked *