矛盾咁又點?吹咩!

矛盾咁又點?吹咩!

某日,同蝶女神講起一個問題,佢問我某個觀點係咪自相矛盾。我話:「矛盾咁又點?冇問題架喎!」佢話:「但係矛盾喎!」我話:「咁又點?你講得出矛盾會有咩後果咩?」

然後,蝶蝶得道了 (好似係)… 升仙了 (好似唔係)…


話說,雖然我成日講埋啲疑似冇人睇得明嘅嘢,但始終會有知心人睇得明。但我今日想講「矛盾係受制於物理同訊息學嘅限制」,應該真係冇人明… 冇人明,點解我又要寫?因為本身已經寫咗個大綱… (唉,人生…. :'( )

話說,傳統邏輯哲學從來只講「矛盾」,但唔講矛盾點樣發生。喺理論上,你可以*假設*所有矛盾係即時發生,例如 “a+b=2 and a+b=3” 就即時會「矛盾」。但事實上唔係咁。

首先,如果個理論係描述緊現實世界嘅系統,咁矛盾發生,就睇下嗰資訊傳播嘅速度。例如話,北京傳出江澤民逝世嘅消息,本身唔存在矛盾。矛盾點樣發生呢?就係,(差唔多)同時又傳出江澤民仲在世嘅消息!呢兩樣消息雖然係矛盾,但如果某人淨係睇亞視,咁佢唔會知道有矛盾。佢要同時睇其他訊息,兩方面嘅消息都收到,先至會有矛盾。

所以,現實世界嘅矛盾要發生,必然受制於物理定律。例如我哋引用相對論,就可以得知現實世界嘅矛盾,係受到光速限制。舉個例,假設 A 同 B 互相矛盾,如果AB同時存在,就會發生宇宙大爆炸。咁樣,係咪 A 同 B 同時存在就*即刻*會爆炸呢?其實唔係。因為任何資訊嘅傳播,最快都係光速進行。假設 A 喺北極, B 喺南極,咁兩者最快都要大約 0.02 秒先會互相接觸,再引發爆炸。(如果你發明到一個哲學實驗,可以靠「矛盾」超越光速限制,咁你一定拎諾貝爾物理學獎…)

咁當然啦,唔係所有訊息都光速傳播嘅。例如亞視誤報江澤民死訊,事實上佢未死架嘛,咁呢個錯誤消息傳到去江澤民身邊[1]嘅人,就會局部產生資訊矛盾,因為江澤民身邊嘅人都知道佢未死。但當時外界冇人知,而「江未死」呢個訊息當然唔會光速飛向宇宙每一個角落… 因為呢啲國家機密唔可以隨便知架嘛。所以,「江未死」嘅消息,最後都等到第二日先至公佈。所以訊息傳播可以一啲都唔快,一啲都唔光速。

所以,就算你有任何違反常理嘅訊息,都要等啲資訊散播出去,先會引發其他地方既矛盾。例如財金上嘅 arbitrage,都要等啲 trader 知道有 arbitrage opportunity,先會俾人賺取 windfall。通常都要少少時間嘅,大概係 0.01 秒咁上下。 (而家啲金融系統好快架,嘿嘿)

( 好,以上尚算人話。以下幾段嘢屬專門學問,你唔明嘅話搵個 Theoretical Computer Science 博士問問。 )

至於邏輯系統上嘅矛盾,就更加好玩。只要大家仲係講緊現實世界上嘅邏輯,咁先嚟一個 Church-Turing Thesis。Church-Turing Thesis 只不過係講緊我以下用嘅訊息學理論,係可以應用於任何邏輯系統咁解。

念完上面嘅符咒,就可以開壇作法。假設你有 statement X 同 Y,佢地事實上係自相矛盾。你點知佢係矛盾呢?其實一啲都唔易。「究竟 X 同 Y 喺 K 個 steps (推演步驟)之內有冇矛盾?」係一個 NP-Complete 問題。NP-Complete 問題係咩嚟?簡單講就係一部電腦(或人腦)要用幾何級數嘅時間去解決嘅問題。如果你搵到一個快嘅方法去計任何 NP-Complete 問題,你即刻揚名萬立,即刻合法咁收取一百萬美金獎金,同時間可以爆晒絕大部份嘅電腦加密系統~ 簡單啲講,即係冇可能~~

至於「究竟 X 同 Y 有冇矛盾?」呢個問題,梗係冇一定答案架啦。Gödel’s Incompleteness Theorem 已經好清楚講明,唔係任何 X 同 Y 都可以判斷佢地之間有冇矛盾。

上面兩大段火星文,主要目的係用正統嘅學術術語(好似係)證明:「搵矛盾係運算上好難嘅事,所以你作為人類都好難搵到矛盾,所以就算發生矛盾,你都唔撚知啦。」所以,既然矛盾咁難搵,又點會咁容易出事吖~ (i.e. 如果會出事,咁一出事你咪知矛盾囉~) 。其實世界上大把理論每天每日都發生緊矛盾,真係冇事架。

點解「矛盾冇事」,最好嘅例子當然係 Lewis Caroll 寫嘅《What the Tortoise Said to Achilles》。篇幅問題、時間關係,唔詳細討論喇。不過佢篇文好應該用返我嘅標題,i.e. 《矛盾咁又點?吹咩!》,因為佢個故事入面隻龜真係咁樣玩死Achilles。[2]

好喇,寫咗千幾字火星文,我想講乜?我想講:

A. 矛盾需要資訊傳播先至會發生
B. 矛盾好難搵,如果證明矛盾嘅 steps 係有限,咁係 NP-Hard;如果無限咁多 steps 就係 impossibly hard…. (總之人類係冇可能做到啦)
C. 矛盾發生咗,都冇事架 (通常)
D. 賢者之石可以暫時消除矛盾 (!!!)

嗯,最後一點未解釋。論證就冇 A, B 咁嚴謹架喇,絕對係鳩噏,不過又唔鳩得晒:

話說,因為「矛盾需要資訊傳播先至會發生」、「矛盾好難搵」、「矛盾發生都冇事」,所以如果你特登製造一啲矛盾出嚟,唔一定會有事架。但係,因為係「矛盾」嘛,世界真理總會慢慢將所有唔正常嘅嘢變返正常。據講呢個就係 entropy (熵) 乜乜乜。但人類嘅自由意志,就係可以製造一啲違反自然常理嘅嘢,去同世界「真理」抗衡。呢個係神賦予人類嘅權力。自然世界到最後永遠都會贏,不過人類透過燃燒自己嘅生命 (即係任何形式嘅付出),就可以製造矛盾,製造違反自然嘅嘢,將「自然世界」同「人類世界」區隔,阻止矛盾資訊嘅交流,喺人類自己嘅時空之中構築一個同外界矛盾嘅世界。

而,我哋生活喺人類社會,亦有「人類嘅法則」。同樣地,每個人都可以用自己嘅自由意志,阻隔外界矛盾資訊,構築屬於自己嘅空間。例如話,你犯法,違反人類法則,但你用生命去抵消,其實冇人奈得你何。又例如話,有政府違反市場定律,喺逆市托市,咁佢動用價值幾千億嘅賢者之石(人民勞動成果!),總可以做到嘅。你付出代價,就可以違反法則。

《鋼之鍊金術師》話賢者之石係用人類生命製造。點解人命有如斯神奇功能?因為,人類本身有自由意志,可以抗衡自然力量,可以抗衡熵,去構築自己想要嘅嘢。例如秦始皇控制住幾百萬粒「賢者之石」,所以好神奇咁就起咗第一條萬里長城。你話,係秦始皇咪勁過鍊金術師呢?(答案:係)

人類生命,本身就有抗衡自然嘅力量。自由意志,本身就係違反常理嘅存在。當然,**客觀嚟講**,人類都係自然一部份,而自由意志係唔存在嘅。不過,同樣客觀嚟講,所有物理現象都係合符物理定律,根本冇所謂矛盾。我哋所謂「矛盾」,其實只不過係人類主觀思想入面嘅”bug”而已,並唔係客觀描述。所以,既然係講緊人類嘅主觀問題,咁就無謂搬龍門走去講客觀嘢啦。

講完。

最後,我想多謝睇晒呢篇文嘅讀者。
如果你睇晒篇文,你真係好乖;
如果你睇得明篇文,咁你應該叻過我…

sorry for 1999….

—-
[1] 我指親眼見到佢仲有心跳嗰種「身邊」
[2] 我好鍾意呢個故仔。有人話篇文係講乜叉邏輯要 modus ponens as a rule of inference 乜乜乜,其實一派胡言。作者(已死)分明係想講 “fuck you all logi-dicks and your funny symbols on paper” 啦… 又話時話 Lewis Caroll 最出名係佢另一本書叫做 Alice in Wonderland…..
[3] http://menjap.com/2015/07/%E3%80%8C%E5%AE%A2%E8%A7%80%E3%80%8D%E5%8F%AA%E4%BF%82%E6%BA%9D%E9%80%9A%E5%B7%A5%E5%85%B7/

啱睇就Like埋我地個Facebook專頁

全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

Leave a Comment

Your email address will not be published. Required fields are marked *