見客如接客 no.16 — 風光背後

見客如接客 no.16 — 風光背後

其實,我真係好窮。

乜野叫做表面風光,我可以做為一個例子。

當大家以為我做珠寶就一定賺好多錢嘅時候,我成日激氣到喊你唔知啫!點解?好多時,好多客講咗話要嘅鑽石、寶石、又或者佢叫你整咗件首飾,最後,佢都係無嚟到俾錢嘅。有啲可能俾咗一成訂金,又或者兩成,有啲就淨係口頭上應承咗你,到最後,當然係無出現到。如果間中一兩件貨值一萬幾千當然無問題啦,但真正嘅首飾有幾件係一萬幾千架呢?

假設件貨成件 20 萬港幣啦,有一粒鑽石主石,一個簡單圍碎石鑲起嘅款吖,你認為我有無可能賺八成呢?賺到兩、三成都偷笑啦!件貨成本最少都十幾萬,粒主石我唔駛俾咗錢供應商先呀?師傅整起件貨又唔駛收錢呀?有人可能會話,咁係 Galie 你唔識做生意啫,你應該收咗佢錢先!呢啲阿媽係女人嘅問題我駛乜你教呢?我覺得你一定係未做過生意囉。尤其是,係有錢人嘅生意。你覺得,你係可以一直追佢俾晒一件二十萬而佢仲未到手嘅貨嘅錢?作為一個誠實嘅香港人,清高說話唔該唔好對住我講啦!你問心,你會咩!?追得多佢話你唔信佢、唔俾面、件貨唔要啦,咁你可以點呢?最後咪一樣自己啃!當然我知道,呢啲係我要冒嘅風險。雖然我宜家已經要收三成訂金,但間中仍然會遇到呢啲情況,所以,自己仍然要啃咗個差價,然後,唔知等到幾時,先有另一個人睇中呢件野。

求其舉個例。

周太係我一個舊客,屋企係做生意嘅。上年新年嘅時候,佢嚟到搵我,表示想買一對每邊兩卡左右嘅梨形耳環自己帶,顏色呢,就要 D 色高淨度嘅。幫佢搵咗,佢都睇過表示滿意之後,就俾咗十分之一嘅現金訂金我,數目係四萬蚊。之後,佢就消失咗。打電話唔覆,WhatsApp、SMS、Email 全部都無覆,就咁,就消失咗。話晒都俾低咗四萬蚊,就咁就唔要?上個月,經過一年半之後,周太終於出現!

「嘩,周太,你咁耐無晒消息嘅?」我喺心入面當然爆哂粗,但表面上都要和顏悅色。

「哦,係呀,前排啲錢被啲股票壓住晒,咪無嚟攞對耳環囉!」周太好似完全無咗回事咁,輕描淡寫帶過,佢口中嘅「前排」就咁就一年半。「整起未呀?俾我睇下!」

成年半都整唔起我仲駛做生意!?不過既然佢對於我send 俾佢嘅message 隻字不提 ,而且都咁坦白同我講之前啲錢郁唔到,我都無謂深究,收得返錢都真係偷笑!起碼佢都仲肯返嚟。

再舉一個例子。

有錢人就闊綽係一個好白痴嘅諗法,但又真係,有好多人唔知點解咁諗。我同你講,有好多有錢人,為咗一千幾百係可以好乞人憎。劉生係另一個客介紹嚟嘅,聲稱係做緊實習醫生。嚟到表示係要買一隻一卡半求婚戒指,好啦,俾佢睇,睇中咗一粒一卡半 d 色嘅全美鑽石,報咗價錢,一開口還價,殺價一半。我當然直接回絕。

「劉生,你呢個價一粒一卡都未必買到,你要求D色高淨度全美呢個價我無可能做到,唔好意思。」其實如果係咁無誠意我覺得無需要傾落去。

「你哋做珠寶閒閒哋賺一半以上,一半仲嫌少?」以一個讀咗咁多年書而且準備做醫生拯救病人生命嘅人而言,劉生嘅態度都可以話係十分輕佻無禮。

成日都有好多人講做醫生要讀好多書,實習又有幾辛苦,我都信嘅,但如果你讀咗咁多年書,令你喺生活上脫咗節,唔知道今時今日嘅物價,其實你係可以稍為 Google 下而無須表現得咁無知的。

「唔好意思,我真係做唔到呢個價。或者你去第二度睇下啦。」呢啲生意我真係無心機應酬。

自此以後,呢位醫生,每日喺 WhatsApp 度轟炸我,每日加幾千蚊,要求我賣咗粒石俾佢,而我每日都重申同一個價格,咁嘅態度,我真係唔想平俾佢。就咁拉拉扯扯咗一個月,佢又再次出現喺我鋪頭。今次,帶住女朋友嚟。而佢哋,都係睇中同一粒石。佢喺女朋友面前沒同我講價,只表示會再考慮一下。之後,每日再繼續係咁 WhatsApp 我。終於,我哋嘅差價相差一千蚊。

我實在受不了,最終,平咗一千蚊俾佢。諗住長達兩個幾月嘅騷擾終於完結,呢位先生消失咗。明明同我 confirm 咗,每日都話放工就會過錢俾我,但一直都無。我亦都講過,唔會幫佢 hold,而佢就無再覆我。當然好嬲,但又可以點呢?

我已經覺得佢唔會再出現,但半年後佢又再嚟,竟然好意思,問返我同一粒鑽石。我諗,呢半年佢應該已經去比較過晒佢所能搵到嘅珠寶店,竟然仲會嚟返搵我,我應該覺得好感恩吧?

「我上次 hold 咗嗰粒一卡半呢?我想再睇!」hold ? 點 hold ? 你有俾錢 hold 咩?

「Sorry 無得 hold ,已經賣咗。」

「咁你攞差唔多嘅俾我睇。」呢位先生面皮真係唔係普通厚度。

我今次當然無可能再咁好心機應酬佢,一毫子都唔會平俾佢,我亦都唔理佢啲 message 。一口價,要就要,要立刻俾錢。

最後,佢當然無幫我買。

可能好多人覺得呢啲事都無乜野啫,做生意係咁㗎啦。Sorry 我唔係咁諗。打開門口做生意,係歡迎你入嚟睇,但如果你已經 confirm 咗要,已經開晒單、俾咗訂金,我覺得,呢個 deal 已經傾成咗,你等起貨先俾晒錢我我覺得無問題,但你唔好玩我囉。一啲交帶都無就消失,係好不負責任嘅行為,十分唔要得。希望大家尊重買賣承諾。如果你係要時間諗係無問題嘅,我又唔係迫你買,但請你唔好嚟到開空頭支票製造麻煩。多謝晒。

 

作者 FB

啱睇就Like埋我地個Facebook專頁

Tagged .

分享光怪離奇嘅珠寶生活,因為錢而熱愛工作,生活沒有那麼多原因。

Leave a Comment

Your email address will not be published. Required fields are marked *