免費贈醫?香港每日都發生緊

免費贈醫?香港每日都發生緊

當大家以為肖友懷被遣返中國,佢外婆被判罪緩刑,事情終於告一段落嘅時候,唔知道係唔係又有好似嫻姐咁嘅高人指點,佢外婆又話肖友懷有嚴重糖尿病,希望佢可以免費嚟香港醫病。

最近幾年,非本地孕婦走數嘅事,大部分人都好清楚。根據2014年范國威議員喺立法會提問,非本地孕婦喺公立醫院分娩後欠交醫療費用總額已經超過1,000萬元,總共佔醫醫管局醫療費用呆壞帳撥備兩成。醫管局雖然動用大量嘅人力物力,追回欠款比率只係唔夠20%。[1] , [2] 其實,非本地孕婦走數,只係香港醫療制度被濫用嘅冰山一角。

香港公立醫療嘅服務,雖然長期資源不足,病房逼爆,輪候時間超長,但係整體水準仍然係世界前列。[3] 而香港嘅公立醫院,亦都絕都唔會因為有人無錢而拒絕施救。除咗婦產科係重災區,精神科亦係經常接收非本地人士嘅專科。香港嘅精神科服務,雖唔係最好,但係都比鄰近唔少地區先進,引致唔少鄰近地區嘅人,靠自由出入嘅旅遊簽證,將有精神問題嘅三姑六婆,各種親人,帶去急症室,然後要求入精神科病房治療。醫好之後,最過份嘅情況係,佢哋會立即消失,留低病人喺香港,最終醫生要搵入境署職員,大費周章,安排遣返呢類非本地人士,而所欠嘅醫療費用,當然係無法追回。即使佢哋最終有親人接走,走數嘅情況亦都不下其數。醫生嘅天職係醫病救人,一個文明嘅地方,亦都唔會有人冇錢因病失救。但係,資源永遠有限,香港亦唔可能任由醫療費用呆壞帳無止境上升,而香港納稅人亦都無任何義務為龐大嘅非本地人士醫療欠賬埋單。

其實,最有效嘅行政方法,就係將所有欠下醫療費用公帑嘅非本地人士列入黑名單,如果唔交清欠款,就禁止入境。例如英國入境條例,明文規定入境官員可以拒絕欠下英國醫療體系(NHS)超過1000英鎊嘅人入境,即使係小朋友嘅治療費用,亦都係由父母負責。[4]  最近,英國就有一個欠咗 NHS 十七萬英鎊嘅不合資格人士,被英國內政部計劃遣返。而 NHS 其於人道立場,亦會係佢被遣返之前,繼續提供迫切性嘅醫療服務。[5]  咁樣做法,就連一啲非常大愛主義嘅自以為左翼人士都無任何反對。以拒絕入境嘅行政手段,打擊醫院走數,絕對比起現今醫管局支付大量律師費展開民事追數程序有效。至於高永文局長話,醫管局亦會嘗試通過中國法院追收欠款,就真係得啖笑啦。

點樣避免醫療費用呆壞帳,公立醫療系統被濫用,明明係政府官員議員嘅職責,一個醫生真係識條鐵咩。要一個醫生去建議點樣處理欠款,呢個政府真係好失敗。

Image credit: DBC

啱睇就Like埋我地個Facebook專頁

One comment

Leave a Comment

Your email address will not be published. Required fields are marked *