香港人,已經無路可退

香港人,已經無路可退

香港近幾年,急速赤化,荒誕嘅事情無日無之。李波被消失事件之後,朋友之間,除咗憤慨,討論得最多大概係點樣續期本封塵嘅BNO, 究竟BNO 有冇用,同埋有冇移民嘅方法。

BNO 嘅用途,相信大家喺網上嘅討論都知道,極其只係會令你喺外國得到比特區護照好嘅領事服務,同埋唔會比人誤會係強國人 (呢個原因我絕對認同),但係長遠嚟計,如果仲有人 FF 英國政府突然會大發慈悲,畀翻 BNO 有居英權,大家真係唔好再發夢。英國比起其他西方國家,絕對係更加利益掛帥。二戰之後英國處於破產邊緣,對於喺第三世界嘅殖民地,基本上係急急腳放手,最好越獨立越好;直到今日,英聯邦裡面大部份嘅前殖民地,都係經濟政治混亂,貪污盛行,人權狀況欠佳,而英國作為英倫邦嘅始創維繫人,亦都冇乜興趣理會。1982年中英談判,明明大部份香港人想維持現狀,英國就一早決定事事向中共讓步,以換取大量投資中國嘅合約機會。雨傘運動之後,英國以天子規格接待習總,香港嘅狀況絕對唔係議題之一,而英國連核電廠咁敏感嘅國家設施,都可以賣比中國營運,你話佢會唔會為咗香港區區幾百萬 BNO 二等公民得罪中共,同錢過唔去?有人提議集體告上歐盟法庭,為 BNO 平權,亦無人可以講勝算有幾大。

我哋呢一代廢青,成日都話上一代天真誤信民主回歸,又或者只係喺前途不明嘅時候爭住移民歐美,完全無積極表態爭取香港人嘅意願,然後就攞住外國護照,返香港若無其事搵錢,甚至變成親共份子。假如我哋呢一代,喺今日只係計劃點樣離開,其實同上一代嘅人冇分別。再者,要成功移民,首先誠惠幾百萬嘅投資,何況以今時今日歐美嘅經濟狀況,要好似上一代咁靠賣吓中式快餐養活自己,絕對唔係容易嘅事。如果大部份有能力嘅香港人移民離開,更加係正中中共下懷,達到人口洗牌,全面接收香港。

香港人,已經無路可退。與其幻想只係靠外國勢力,又或者只係計劃走上一代走過嘅移民路,不如迎接全面抗爭嘅未來。無論係走入體制選舉,喺自己專業界別發聲,街頭抗爭,甚至係抗議小朋友嘅學校用普通話教中文,都可以係抗爭嘅一部分。我哋唔能夠要求每個人都有視死如歸嘅底線,亦無人知道抗爭嘅最後結果,只可以希望每個唔想香港沉淪嘅人,都唔好比而家呢種無力感嚇到,繼續係自己嘅能力範圍抗爭落去。

Cover photo: ejinsight

啱睇就Like埋我地個Facebook專頁

Leave a Comment

Your email address will not be published. Required fields are marked *