二月九日,旺角徹夜衝突

二月九日,旺角徹夜衝突

所有報導都不盡不實,我唔係齋講緊 CCTVB,所有報紙雜誌網媒都唔會完全正確、中立。唔係一事發就即時到場,就唔可能清楚整個時序,依賴單一報導係你無知同無腦。

睇哂所有資料就用腦消化,思考完先好出聲。自己睇返所有現場直擊嘅圖同影片——係開完槍並發生衝突,先有火種同磚頭,而唔係「突然有人暴亂放火掟嘢所以黑警先開槍」。

無預先警告就開槍係「人之常情」、「理性執法」?依家抓小販咋,對面唔係葉繼歡黎,啲人唔係荷槍實彈,係揸住魚蛋咋!洗唔洗胡椒噴霧又防暴?洗唔洗見人就打,帶住記者證都兜頭扑落去?黑警揸槍掹雞指向人群,如果唔係上頭命令,係佢個人情緒失控,咁市民強烈譴責佢有咩問題?

示威者攻擊警察,佢地擾亂社會治安,但點解會有人示威?你同我都好清楚一切都唔係突發,而係蘊釀多時。記唔記得朱經緯毆打途人?記唔記得暗角七警?黑警打人就有因果,市民反抗就無因果?

你睇到有人放火擲磚,睇唔到手無寸鐵嘅市民面對槍械;睇到有人篤篤下魚蛋暴動,睇唔到黑警突然衝埋去就噴胡椒。

 

作者 FB

啱睇就Like埋我地個Facebook專頁

Tagged .

香港作者,崇尚自由 | 以文字演繹忠誠愛慕,以勇氣堅持追隨幸福。 | 最新出版:《馴養之丘》、《女生情事宣言》 | Instagram: kwaisinling

Leave a Comment

Your email address will not be published. Required fields are marked *