死亡嘅救贖

死亡嘅救贖

人出世嘅時候,就好似一張白紙。

然後我哋以自己嘅官感去認識呢個世界,用自己嘅經驗,去判斷事物嘅對錯、判斷事物嘅真偽。我哋對世界嘅理解,雖然每個人都大同小異,但總唔會一模一樣。每個人對呢個世界嘅理解,都係獨一無二嘅。

呢啲個人嘅經歷、個人嘅記憶、個人嘅感受,構成一套「信念」,構成「自我」。

呢啲經歷係主觀嘅,係個人嘅。我哋對世界嘅認識,必然係片面,必然係唔完整。所以我哋累積越多經歷,其實即係累積越多錯誤。我哋對世界嘅認識越深,就對世界越多誤解。

但係,就算我明知我越累積越多錯誤,都冇計架。唔通要我否定自己?就算我知道自己有錯,都唔知錯在何處。而任何尋找錯誤嘅方法,都必然係基於主觀嘅個人經歷,依靠片面嘅資訊,而作出嘅主觀判斷。所以任何除錯嘅過程,亦必然會有錯。

不過,人類有犯錯嘅特權。有權堅持己見,有權死唔認錯。人類嘅自由意志,正正就係犯錯嘅特權。

點解人可以有呢種特權?

因為,人會死。

人生累積嘅錯誤,唔需要以所謂「理性」思考去糾正。死亡,會將所有被血淚所沾污嘅白紙銷毀。

所以,人類必須死亡。就算肉身不滅,人類嘅思想都會腐化。腐化嘅思想,腐化嘅信念,其實同死咗無分別。

所以,生命嘅傳承,唔單止係生物層面嘅事實,更加係精神層面嘅真理。任何人有自由意志,就必然要死亡。死亡唔可以靠生物層面嘅科技去避免。

生而為人,我明知自己累積好多錯誤,都可以自信咁實踐自己明知有錯嘅信念。因為,我知道自己會死亡,我知道自己喺歷史嘅洪流之中,只係一粒微塵。後浪正在湧上,前浪已經被推進漩渦之中,與天地渾而為一。

 

圖:Sippanont Samchai CC BY-ND-NC 2.0

啱睇就Like埋我地個Facebook專頁
全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

Leave a Comment

Your email address will not be published. Required fields are marked *