香港點解會變成咁?你問我答

香港點解會變成咁?你問我答

呢幾日聽到好多人問「香港點解會變成咁?」問到心都煩埋,唔係唔想解釋比你知,而係你自己有無盡過力去了解呢個社會?你有無睇無綫以外嘅新聞報導?你平日睇幾多份報紙?你有無嘗試獨立思考過先作判斷?你話:「新聞播得出就有一定公信力嫁啦!」但你睇到嘅畫面係唔係真係反映到事實嘅真相?每個媒體都有唔同立場唔同論調,你要視野開闊啲、全面啲,就必須靠自己睇多幾份報紙。

你要了解呢個社會,首先唔好再嘗試爭論是非對錯,唔好再將所有事都講成非黑即白,因為,政治從來沒有對錯,只有手段。你想支持自己論點,就一定要理解前因後果,配合中立同清晰嘅理據,如果你黎黎去去只係識講「警察維持秩序,暴徒影響社會治安」而唔深究點解會有示威,點解會有民怨,你無資格高談闊論、指指點點。

我都討厭同人嘈,亦唔想同唔講道理嘅野蠻人討論,政見唔同就無謂拗,反正班港豬都係盲撐,坐住個腦又以為自己看透世事。但如果你真係有心知「香港發生緊咩事?」我都可以分享一下。

你覺得「洗唔洗擲磚又放火啊?洗唔洗打返班警察啊?你暴力會影響到其他人嘛!」但爭取民主自由,和理非非仲有無用?由英治時期爭取至今,守秩序靜坐唱歌派傳單、溫和路線無用,一次又一次被政府背叛,激進啲你又問「洗唔洗啊?」但走去羨慕台灣有民主自由安定團結,又唔諗下人地用咩方式爭取咗幾耐先成功。

就咁舉幾個例--東北同高鐵撥款無視議事程序強行通過;國教表面上已拉倒,但政府仍然威逼利誘學校同家長去暗地推崇;ICAC 廉政專員涉貪不被起訴;雨傘革命時警察聯同黑社會襲擊示威者,執法部門亦濫控無辜市民;朱經緯毆打途人仍繼續收長糧;暗角七警濫權用私刑仍消遙法外;李波及眾人被公然擄拐至今下落不明,港政府仍冷處理;上網二創有網絡廿三條,連講粵語寫繁體字都要悍衛⋯⋯執法、制度同法治都完全崩壞,唔係今日先有嘅事——行政、立法、司法及所有正規投訴部門都名存實亡。

好驚訝香港變成咁?你依家先知咩?

示威者抗爭無地自容而反抗,係暴力啊,咁政府利用政權多方面壓搾同傷害市民就唔暴力?唔好誤會,我唔係要各打五十大板,因為警察係紀律部隊,受過專業訓練亦荷槍實彈有齊裝備,受傷都有糧出有假放,但示威義士係手無寸鐵,戴口罩著大褸擋胡椒噴霧,仲要怕被人「調查」留案底無埋份工!

香港點解變成咁?你應該大致上明白,唔該唔好再問,接下來自己睇新聞。

管治者話抗爭者係搞事,但無路可退嘅時候都唔還擊,你耶穌黎嫁?你鍾意被人打係你嘅事,我唔會企定定比你打,仲擰過去被你摑多巴。我唔會投降,因為雞蛋同高牆之間,我永遠企係雞蛋一方。而你唔好忘記,你亦都係一粒雞蛋。


筆者:葵倩鈴
Facebook 專頁: www.facebook.com/kwaisinling/
Instagram:kwaisinling

啱睇就Like埋我地個Facebook專頁

Tagged .

香港作者,崇尚自由 | 以文字演繹忠誠愛慕,以勇氣堅持追隨幸福。 | 最新出版:《馴養之丘》、《女生情事宣言》 | Instagram: kwaisinling

Leave a Comment

Your email address will not be published. Required fields are marked *