識收割就梗叫四眼扮梁天琦啦

識收割就梗叫四眼扮梁天琦啦

首先簡單講多次個計劃大概係熱普城聯盟希望九月立法局選舉每區最少可以有兩張本土名單,而佢地將會每區包辦一張名單,以當選後辭職發動全民製憲公投為前題參選。

現實啲講,青年新政同本民前無條件撞區,因為佢哋根本唔夠資源搞多過一區,而且佢地票源會比較接近。所以今日青年新政梁頌恆都話未同本民前夾而已經可以講定唔會撞區,呢個共識大家應該明白。所以熱普城要做嘅就係想每區計埋自己有兩張名單出選,一張正常爭議席,另一張就係推動五區總辭公投。由於有撞區情況出現,有人就會覺得熱普城想騎劫,想收割梁天琦代表本民前得到嘅六萬六千多票。記得補選完之後,大家包括學者同主流傳媒都覺得梁天琦九月再選都肯定可以拎一席,而其中大家都默認嘅就係:毓民即使唔幫佢助選都一樣可以當選。喂唔通毓民自己到時唔洗選咩。顯然易見既係,梁天琦佢有好多非支持熱普城既支持者,淨係講出名果堆林日曦謝曬皮爵爵健吾之類嘅人平時都唔會撐熱普城(咳神除外)。所以唔好再講咩界票收割喇,陳雲出戰新東真係收割唔到梁天琦啲票架,個票源根本唔同,你有無見過高登仔幫陳雲開國師 J 圖 POST 丫?如果你認為梁天琦有部份票係教主熱狗支持者投,唔係教主吹雞佢地唔會投既,咁九月教主自己拎返啲票亦無不可丫,真係要打餐死搞局搶票不如擺四眼落新東扮梁天琦參選啦,反正外型形象路線都似。你唔能夠上晝都仲讚緊果六萬六千幾票投得啱,下晝就話佢地都係傻仔等住比教主收割,我始終相信,投得六號蠢極有限。

其實現階段睇呢個計劃係似一個協調甚至係配票既策略:讓激進的票歸激進的候選人,更激進的則歸更激進。

繼續講番新東做例子。我諗大家會同意,本土派競選上最大敵人係所謂嘅進步民主派,即係社民連、人民力量、新民主同盟。佢地上屆得票分別係,社民連 48,295 票(10.39%),人民力量 38,042 票(8.19%),新民主同盟 28,621 票(6.16%),總數 114,958 票。就算唔計投票率咁去睇,本土派都仲係有好大空間去開拓票源。單單一個本民前唔夠打晒對面三家,而對面三個都係硬野:長毛、慢必同咖哩飯。但係如果個形勢係熱普城+本民前 VS 人力+社記+新民盟又唔同。所以點解一定要睇成陳雲 VS 梁天琦,唔可以係陳雲+梁天琦?理論理念行先,投陳雲;喜愛行動型,投梁天琦。每個人角色唔同做到唔同嘅野,呢個正正係各司其職既概念。再加上,兩派加埋一齊出嚟宣傳,本土理念就可以廣傳更遠。到時新東選舉,城邦論會進入主流媒體被傳播被討論,陳雲一面講本土論述教化選民,本民前一面講行動之餘用正面形象吸溫和票,呢個係一個乘數嘅概念。如果聽完陳雲講,覺得好有道理但始終覺得太重口味一樣可以投返梁天琦,唔通到時又話梁天琦收割國師嘅票咩?就算最後國師輸都會係一個宣傳本土同教育嘅好機會。

國師出選,好多人包括我都覺得好笨,因為當選機會不大,但佢唔笨就仲做緊政府又唔會比嶺南烹走啦。老老實實,你見我去到呢度都完全無講公投會點,係因為我都覺得太難實行同成功。但係政治嘅野一日都嫌多,過年前你點估到梁天琦有六萬六票?點估到泛民都會佔主席檯?到九月選舉我真係唔敢講會變成點。再跳出啲睇,佢五個其實唔使搞呢個計劃都照樣可以出嚟選,而啲人亦都會屌,屌嘅內容仲一樣添。講明當選後要辭職甚至係加大個選舉難度,咁做乜野係都要企前啲咁笨?佢哋咁樣去打開囗牌最少會嚇怕一堆「我想選你入去幫我帶本土聲音入議會」嘅人。但係我睇到嘅係如果佢哋執意企前啲,成個本土光譜可以拉得更闊。選民接受到就投熱普城,接受唔到就投返後面嘅本民前。正如和理非唔會突然進化成激進本土,成個連續既 CONTINUUM 需要不同元素嘅存在先健康完整。而正因為佢地票源並不太重疊,咁樣先係真正意義上嘅做大個餅。本土太多門派,用呢個計劃做一個 market Segmentation 分清楚各派理念都冇壞,咁有爭拗最多都係討論層面嗌下交互屌下,之後有咩事都有 friend 做,視乎議題仲可以有合作空間,但係一旦臨選先黎反面,互桶幾十刀就真係預咗做一世敵人。

本土有分歧未必一定係壞事,究竟你要將本土帶入議會扎根優先,定係不惜辭職都要以全民制憲城邦自治為先?如果團體之間唔能夠達成共識亦唔需要強求,其實可以直接留返比本土選民決定。

 

文: Benjamin Yuen

Photo: 謎米

啱睇就Like埋我地個Facebook專頁

歡迎各位讀者踴躍投稿,來稿請電郵至 info@menjap.com

Leave a Comment

Your email address will not be published. Required fields are marked *