做人難

做人難

要生仔,最好做芬蘭人,政府送埋尿布衫仔。
要讀幼稚園,最好做德國人,玩下玩下就讀完,字都唔使識寫。
要讀小學,最好做芬蘭人,老師有料有 heart 有政府善待,唔中意讀書都好難。
要讀中學,最好做德國人,文法職訓分流完善,無書緣都唔係世界末日。
要讀大學,最好做德國/法國人,免費優質教育,據聞法國政府重倒貼你使。
要食野,最好做德國人,食物安全管得緊,有機認證更嚴格,食得安心。
遇上天災,最好做日本人,唔怕有人趁火打劫。
要做選民,最好做加拿大人,選到個有料有 heart(而且有樣)的總理。(唔通做美國人咩)

上述國家即使稅高,都交得心甘命抵。香港稅低呀,不過你啲錢去咗邊?供樓交租囉。

總之做乜都唔好做鄰國人囉。唉。

—–

毒疫苗?不怕。去香港打。
毒奶粉?不怕。去香港買。
毒蔬菜?不怕。賣去香港。
豆腐渣樓炒不過?不怕。去香港炒。
嚴打二胎?不怕。去香港生。
考不上重點大學?不怕。去香港讀。
拐 B 不遂會被行私刑?不怕。去香港拐。
無人可憐?不怕,去香港找社工。

所以啊,我之前說錯了。其實做鄰國人很好,只是做香港人不好。

點唱歌曲:
#強人是你 #只因你永不說不能做到
#做個勇敢中國人 #食錯奶粉 #打錯敵人

—–

頭先我講得都唔啱,其實做香港人梗係好啦:

接近免費的公共醫療系統 (不過急症排十幾個鐘,專科排一年,最近又 cut 咗 budget 咁囉)

12 年免費教育,15 年免費都嚟緊頭 (不過附送的 3 次 TSA、1 次 pre S1 HKAT 同 1 次 DSE 都唔係人考咁解囉)

稅率超低 (然後政府重有錢撐起咁多大白象工程,真神奇)

無銷售稅,購物天堂 (不過啲鋪頭變曬做大連鎖、藥房同奢侈品,同埋假貨毒貨越來越多咁囉)

中西薈萃,美食天堂 (不過餐飯錢有大半係交租,有幾多真材實料食到落肚?同埋真係好食的老字號執完一間又一間咁囉)

特區護照多國免簽好好用 (不過出咩事要打 1868 係幫你唔到,都係用 BNO 打去英國領事館有著數)

有新聞自由 (不過報紙總編副編會比人斬比人炒咁囉)

有選舉權 (不過人地一屋七姓十三票,無論你點投,結果都來來去去咁上下囉)

勝在有 ICAC (不過某啲 case 係唔查/hea 查咁囉)

有優良的警隊 (遇拐 B 疑雲去報案會有警察叔叔溫柔慰問你係咪最近睇咗乜野新聞)

直頭係 #生在香港 #活著真好

—–

山地媽都真是不知道來生要做甚麽人好了……

啱睇就Like埋我地個Facebook專頁
山地媽,八十後,香港人,愛冒險。曾旅歐四年,邊讀邊玩邊打工,見盡奇人,做盡怪事。現為家庭主婦,兩兒之母。以為全職湊仔很平淡,殊不知原來又是一場冒險之旅。

Leave a Comment

Your email address will not be published. Required fields are marked *