叫你黎特首之「願你今夜別離去,在你國產的帳裏」

叫你黎特首之「願你今夜別離去,在你國產的帳裏」

琴晚黎明演唱會因帳篷不符防火條例而要取消,你可以話黎明蠢,佢搏輸咗,因小失大,因為貪平用國產帳篷,搞到第一場個唱取消咗咁唔「老黎」。不過毫無疑問,佢一個負責任的 Facebook 帖就贏番曬,不費吹灰之力,紅黑紅紅黑,就係咁簡單。的確只要有領袖願意站出來為件事承認責任和作出合理補償,整件事就沒有再分誰是誰非了,SAY SORRY 呢家野真係「以為好大鑊,其實小學雞都識」。

大家諗下,一個賣曬飛嘅個唱臨尾撻 Q 開唔到大鑊 D,定唔記得咗拎一個放底衫褲嘅行李箱大鑊 D?好明顯係前者啦下話,但特事特辦事件搞到家下仲係「杰撻撻」(唔識寫,可能要 BEN SIR 指點下),仲「揚威海外」巴鬼閉咁,好明顯係有人居心叵測,借「特事特辦」小事化大,所以被尊為「港獨之父」絕對實至名歸。

梁突手若果唔係支持港觸,佢無奶由唔識好似黎天王咁用民間智慧,快而準咁解決問題。我從來唔質疑梁特嘅能力,因為整件事根本唔係能力嘅問題,而係態度嘅問題。喂!梁大大,你自己衰咗唔緊要,做咩要賴人炒人唧,搞到滿城盡帶花生碎,仲要搵人陪葬?SORRY,做咩唧你,咁樣唔 OK 囉,我接受唔到囉!

錯就要認,打就要企定!香港需要更多黎天王!堅欣賞黎明!

責任感嘅嘢,淨係識話人但唔識話自己嘅人識條鐵咩!同理心的精髓絕對不在批評別人,而在反省自己。若果永遠覺得錯的只是別人,覺得自己永遠無違法或者站在道德高地,香港有的不會是更多黎天王,而是「喔噢」,X!又係你呀梁特手? 下刪一百個「門」和「尸」。

親愛的港獨爸爸,希望你明白,沒有違法不代表沒有錯,做人要講心,而唔係淨係講金同埋講 rules。只有當好多人都唔識用同理心嘅時候,社會先要下下拎 D rules,拎 D 令牌出黎「撻人」。法律是一條界線,但永遠不外乎人情。

本廢青留意到香港宜家有幾種人:

1 看到自己的不足,勇於承擔錯誤,封為「天王」
2 看不到自己的不足,只看到別人的錯,是為目光狹窄的「道德/法律L」
3 知道自己的不足,但只批評別人的錯,貶為「自私L」
4 沒真正去思考誰是誰非,偶爾插嘴煽風點火,只在乎有戲好看的,定義為「花生友」
5 有反思但沒發聲也沒批評別人的,名為「沈默的羔羊」
6 有反思自己不足,但發現從來都沒有錯誤要承擔的,則可尊為最高級嘅「聖人」(可以加點音效)

現今香港有太多 2-5 仔,太少 1 仔,但絕對需要更多。而筆者則不認為這個世界有 6 仔的存在,因為人誰無錯?若果大家認識聖人的話,請介紹比本廢青識,等佢自動貶番做「天王」或「道德/法律 L」或「自私 L」,因為咁遲認識本廢青這個行為本身就是個錯誤。

Anyways 香港需要更多「天王」,需要更多人為道德、理想、真善美發聲和奮鬥。每個人都有「做自己」的權利,別人笑你傻豬豬?由佢笑,咁係因為佢地睇唔透,最傻豬豬嘅其實係他們,但佢地「ON 嘟嘟」做傻豬豬都係佢地嘅權利,我地都要尊重。

講番正題,中佬其實都可以好吸引。係本八十後廢青話嘅(流口水)!恭喜你 LEON!你堅持唔空肚食早餐咁多年,你終於得左啦!你終於爬過劉天王頭,成為最受香港人歡迎的特首候選人啦!為咗黎天王,我以後會食咗宵夜先再食早餐,我以後唔會只係唱忘情水,我會唱埋「為你愛不完」同埋「李香蘭」!

(噢!SOR,乜原來係城城同學友嫁?)

咁我唱:
願你今夜別又離去,在你國產的帳裏……

 

文﹕心魚

Photo: lyric.musichk.org

啱睇就Like埋我地個Facebook專頁

本土 本是老土
說來說去 就是一個「情」字
Localism 其實很 “Oldcal” (Oldcalism)

Leave a Comment

Your email address will not be published. Required fields are marked *