大台 PA 戇居居血淚屎

大台 PA 戇居居血淚屎

上文提到有大學生一畢業就做記者已經夠傻仔傻女,但低處未算低,世界上總有人係更加戇居的。而係呢班人當中,擇去大台做劇集副導演的都算係戇居之皇啦,點解?

副導演,幾好聽,但其實係大打雜,乜都關你事。$9500 月薪,無固定番工放工時間,有時要留係公司過夜,唔夠人手時,廠接外景,外景接廠加後期。最低工資立法後,人工有補水。嘩!咁好?好你個頭,即係話計番工時,你份糧低過最低工資呀,陰公豬。但好彩員工福利唔錯,包括可以近距離感受家燕媽媽的仙氣和正能量,可以去古裝街影相呃 like,過年可以周圍同藝員逗利是,可以有員工飛去睇華麗明星賽,可以有免費 TBB周刊,可以預早知道劇集劇情,而對我黎講最正嘅係可以陪 Bosco 去換衫🙈。其實對於一個岩岩入社會的新鮮人,呢 d 員工福利抵曬啦!

所以剛畢業,對於貪新鮮的我來說,只為興趣,不計較工資工時,其實係大台做 PA 真係荀工黎嫁。學到的東西很多很多,而且在制度框架內其實也有不少自由空間,在這段時間裏嘗到很多意想不到的第一次。

沒想過番工可以番到唔駛沖涼唔駛番屋企,沒想過番工可以連番十幾日唔駛放假,沒想過番工可以凌晨番到屋企訓一兩粒鐘又再番工,沒想過番工可以番到連續兩晚係機鋪 22:00-06:00,沒想過番工可以番到日日搭通宵亡命小巴番屋企。

不過為興趣為體驗,這一切真的一點也不要緊,因為真的沒有哪份工作,可以同家燕媽媽同枱食飯、同 Bosco 釣魚搭遊艇、同 Laughing 哥去發射站、睇松哥和狄狄達跳舞,仲可以陪子明哥係機鋪通頂飲二窩頭!

因為咁我短暫地樂於做制度裏的一隻棋子,不過若果視之為一份長期工作,那就未免太不堪了。沒健康沒朋友沒家人又儲不到錢,興趣不能當飯食,一想到將來,就不能不走了。當然也有人留下來,發展好似都唔錯,但人各有志,去或留乃個人選擇,旁觀者不得依牙鬆鋼(𪘲牙聳䚗)。

但無論如何,在 TBB 除了有血有淚有屎,其實也有笑。當助導的體驗一生受用,也為我的人生旅途打開了不少話匣子,可以說是各取所需吧!

估唔到呢,成篇野變左維穩文,歌頌大台讓新員工有不一樣的體驗!真係多謝曬!只不過,大台有苦自己知,人才流失、製作水平參差、得罪香港人,任何事都有代價。新電視台加入戰團,有競爭先有進步,即管睇下點。

 

Photo: tvb4life.pixnet.net

作者 FB

啱睇就Like埋我地個Facebook專頁

Tagged .

本土 本是老土 說來說去 就是一個「情」字 Localism 其實很 "Oldcal" (Oldcalism)

Leave a Comment

Your email address will not be published. Required fields are marked *