論不孝:老母節快樂

論不孝:老母節快樂

孟子曰:「無禮有不孝者三,謂阿諛曲從,陷親不義,一不孝也,家貧親老,不為祿仕,二不孝也,不娶無子,絕先祖祀,三不孝也。」又有曰:「不孝有三,無後為大。」

Let me recap in Cantonese. 以前有條友叫孟子(要演繹廣東話的神藴有時好無禮,對唔住孟子老師🏼),佢話不孝分三種,第一種係明知老竇老母做錯事,仲起勢瀨共咁瀨,刷鞋刷到「令立立」,搞到老竇老母以為自己無錯,無忠言直諫,長遠來說其實係陷老竇老母於不義,正衰仔!例子有梁突手對阿爺(瀨共),仲有梁突女行李特事特辦事件,足見家庭教育有幾重要,第一種不孝係會遺傳嫁。

第二種不孝係屋企窮到褲穿窿,作為子女只係宅係屋企做廢青,唔去搵份政府工做。拿!呢個要平反,係現今上梁不孝嘅政府,去做官可能即係瀨共,更不孝,所以恕筆者特事特辦,搬一下龍門,將「唔去搵份政府工做」做改為「唔去搵份工做」,要老竇老母做生做死白頭人養黑頭人,離曬罩,好那不孝。

最後一種不孝衰過「生仔無屎忽」,是為「無仔生」也。即係話,子女成年啦,仲唔結婚生仔…… 呢種不孝其實我唔想講咁多,心虛呀大佬,咩啫,我有話唔生咩家下,母親節唔想同你拗,父親節再傾!

而點解三種不孝,唔生仔係最大鑊呢?其實係孟子比人砌生豬肉,斷章取義。孟子果時係話:「不孝有三,無後為大,舜不告而娶,為無後也,君子以為猶告也」,即係話三種不孝,無仔生最大鑊,聽聞果時因為皇帝阿堯想阿舜接棒做皇帝,想將兩個女嫁比佢,不過考慮到若正式提親,阿舜後母唔 like 會反對婚事,所以好矛盾。一方面考慮到阿舜無女會「無後」好大鑊,另一方面考慮到娶老婆咁大件事都唔同阿媽講都好大罪。最後阿舜決定要女唔要媽,瞞住阿媽娶老婆,因為「無後為大鑊d」呀!就如《娃娃看天下》的歌詞,別怪他,只能怪阿堯「很想去捕捉他」做皇帝。所以「無後為大」其實不是指三種不孝入面無仔生最大鑊,世人要還番個公道比孟子。

講起不孝,其實筆者都好有經驗(嘿嘿),包括經常撇下父母外遊,不分尊卑當父母做朋友,母親節同其他母親慶祝等等。為免加劇阿媽對我的不滿,特以此文送給我亦母亦友的老母大人,沒有你就沒有今天的我,由衷感激。係不孝女的心目中,有一個能無條件包容和支持自己嘅阿媽,係上天給我最好的禮物。肉麻嘅嘢我最唔識講,或者講左都唔覺,不過講句多謝係基本禮貌。喂!多謝曬喎!咁客氣呀!哈哈…… 沒甚麼可給您,但求憑這篇文。(買禮物好麻煩,又要寄黎寄去,有心就得啦下,當一字千金,呢度夠比首期啦)

最後為老母平反一下,若有睇 Ben Sir 講粗口就知老母唔係粗口。當你嗌阿爸做「老竇」嘅時候,老老竇竇,我覺得唔嗌「老母」好唔公平。為此,我建議大家係母親節,可以同阿媽講番聲「老母!阿媽節快樂!」Kissy kissy.

 

Photo: zmdrunxin.com

作者 FB

啱睇就Like埋我地個Facebook專頁
本土 本是老土 說來說去 就是一個「情」字 Localism 其實很 "Oldcal" (Oldcalism)

Leave a Comment

Your email address will not be published. Required fields are marked *