三國演義同火鳳燎原咪又係二次創作

三國演義同火鳳燎原咪又係二次創作

上個星期行過書店,見到有條細路竟然拎住我一本相當喜愛嘅漫畫 – 火鳳燎原,心諗:「識貨喎細路。」
同行嘅老母就揀緊啲英文書比佢,轉頭就哦佢

「成日睇埋呢啲公仔書有咩用姐。」

「唔係架,佢講緊三國歷史架!」

「傻仔!呢啲咁嘅書無用架,你要睇返真正嘅文學作品先有用架嘛。」

後來我竟然見到個呀媽拎咗本純文字嘅「三國演義」比個細路,我再望個細路個樣頓時成為 CY 咁 - 衰到無得再衰。

*三國演義係流行文作*
呢個媽媽嘅行為只係一個好常見嘅笑話。
其實佢唔係第一個,好多人都以為以前嘅文學作品一定係好嘢,唔讀唔得。
就好似有班人覺得聽古典就有品味,聽 POP SONG 就係 MK。

以三國演義為例,乃係元末明初通俗小說家羅貫中所寫,聽落好似好巴炮咁。
其實佢係半途輟學,又唔肯去跟老豆學做生意,最後由老豆安排去班叔父輩度做嘢嘅人,但後來覺得個老闆唔啱嘴型之後走去做跟人寫小說。

其實佢嘅出身,同好多依家人眼中嘅廢青無咩兩樣。
偏偏佢寫嘅小說就影響後世好多人。

「三國演義」其實係一本改編小說,正確嚟講就係一個二次創作,即係依家班人成日話要禁嗰種。

「『三國演義』係文學作品!!點同?」

元明朝時代讀書人一般都係要考科舉,入面專取四書《易》、《詩》、《書》、《春秋》、《禮記》五經命題試士,行八股文格式應試。
簡單少少講『三國演義』根本就係一本與考試無關嘅閒作,頂多就係話佢有少少歷史意義。
換句說話講,佢同依家陳某本火鳳燎原個情況係差唔多。

*文字只係媒體*
當日人民都係靠戲曲,故事,去娛樂,文字就係其中一個媒體。
同樣,今日世界媒體極多,唔係話睇電影,睇漫畫就毫無益處,學習從唔同方面去吸收呢個世界新知識,先至係學習嘅真蹄。

如果小朋友可以從漫畫度了解到又長又悶嘅中國歷史,何樂而不為?

不過作為大人必須從旁輔導,曹操雖奸,但劉備都唔係咩好人。

(歷史資料如有任何錯誤或遺漏,請多多指教)

 

Photo: game.china.com

作者 FB

啱睇就Like埋我地個Facebook專頁

Tagged .

港豬廢青一名
只想吃喝玩樂不勞而獲 不求踏實地但求公屋有期

Leave a Comment

Your email address will not be published. Required fields are marked *