人夠假,便無敵?

人夠假,便無敵?

話說以前我都做過 sales,無記錯應該係我第一份暑期工,賣男裝,仲要係西裝(主要)。其實我初初都好淆底,因為未做過 sales,仲要賣西裝喎,我真係識條鐵咩,但係呢份工係朋友介紹,佢話凡事都有第一次,當見吓世面,唔啱再辭職都未遲,於是我就膽粗粗去咗見工。傾咗幾句,講咗自己叫咩名、住邊,阿姐就問我最快幾時可以返工,有時就係咁現實,永遠都係人脈重要過學歷同實力。

第一日返工,阿姐向我簡單介紹唔同嘅西裝,教我睇成份標籤、去邊度搵貨,然後佢就話我做做吓就會識。至於點先可以成為一個無敵嘅 sales,又或者有咩魔術用語,佢從來都無教過我。最初我好少同客傾計,除非佢哋主動搵我,唔係我頂多都係講埋啲廢話:「Hello,隨便睇,慢慢揀。」因為我怕佢哋問我問題我會唔識答。雖然我係暑假工,唔會話多勞多得,有得抽佣,但如果一路都開唔到單其實都幾樣衰,話晒都朋友介紹,唯有偷偷哋聽吓同事點 sell 客。

「好有型呀你著呢套西裝,好 fit 呀!啱啱好!」同事A說。我望過去,佢個客係一個肥佬,我想講佢件西裝係紐都扣唔埋,當時我真係好想好想笑,但係我死都忍住,咬到個嘴唇都差啲爛,我心諗點解同事A可以咁假。「呢隻色唔係個個都 carry 到,但係你得!睇落仲好醒神!」同事B說。我又望過去,佢個客好瘦,面色又黃黃哋,唔係白白淨或者黑黑實實嗰啲男人,佢試緊件屎色嘅皮褸,我心諗點解同事B咁無良心係都要 sell 佢買呢件完全唔襯佢嘅褸。

為咗開單,我都開始模仿佢哋講嘅說話,對啲客有讚無彈,然後慢慢就習慣咗呢種好假嘅講嘢方式,完全係講大話當食生菜,果然啲客真係好受落,令我越開越多單,仲勁過阿姐。「其實我都係聽到你平時點 sell 客,學你架咋,唔係邊開到單,全靠你咋你真係好勁!」對客假之餘,對阿姐或者同事都要假,咁先係打工仔嘅生存之道。

幾個星期之後,我開始覺得份工好無意思,好無聊,然後我開始真心幫啲客諗究竟咩外套會襯佢哋,例如肥嘅點樣可以睇落瘦啲,瘦嘅點樣可以睇落大隻啲,顏色或者 cutting 都可以好大影響,慢慢開始同客建立到關係,有時佢哋行過都會探我吹吓水,雖然單唔係開得特別多,但係我覺得好有成功感,同埋自我感覺會好少少,因為有時做人太假真係會好攰。

而家我已經無再做 sales,但係其實無論做咩工都好,只要你夠假,就會係無敵,眼見好多大食懶都係靠假靠擦鞋而上位,討老闆歡心,條路易行好多,hea 吓又一日,無咩工作要做,不過自問我就做唔到,只能夠做一個勤勤力力終需乞食嘅員工。講到底,「假」其實都係一種職場求生技能,個個都識做,但唔係個個都做得好。

 

Photo: Flickr user Robert Sheie

作者 FB:小盛女

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *