本土大學用粵語授課係理所當然

本土大學用粵語授課係理所當然

以粵語授課可謂係香港大學教育應有嘅重點。

大學教育嘅目的就係培養各界嘅精英,以學術訓練提升學生嘅能力,昇華學生嘅思想,再回饋社會,達嘅話則回饋國際社會,稍遜嘅都可以回饋本地社會,而要做到呢點,以粵語授課可以謂不可或缺。

以粵語教學嘅優勢

喺香港,大學教育向來以英語為先,美其名為同國際接軌,然則,要同國際接軌又係咪真係憑英語教學就做到?

事實上,如果學生本身嘅英文能力唔夠,唔係去到 C1 程度(而香港大把人包括大學生都未到呢個水平),則吸收能力大減,尤其喺 lecture, tutorial 上面,要求嘅係學生嘅 listening and speaking,更加要熟英文。

如果強制性用英語教學,顧此失彼下,雖然係扮到國際化,但實則學生嘅能力遠遠追唔到國際。

唯一可行嘅方法,就係用粵語授課,notes 用英文寫,啲 jargons 用英文講,咁嘅話,學生可以用返自己熟悉嘅語言學習之餘,又唔會對學術詞彙陌生,他日想做研究,惡補完英文之後,亦方便寫 paper、睇 paper。

喺呢點上,中大做得唔錯,至少哲學系係咁。

但係,近日港大中文學院有一半課程用普通話授課,原因又何在呢?官方講法係因為請唔到本地人材。但係有母語為粵語嘅講師,喺教授古詩嘅課程時亦都被強制要用普通話授課,可見官方解釋實屬子虛烏有。

可能有人話,其實港大不嬲都用英語授課,中文用普通話教都冇乜嘢。但係,英語尚且可以話係要同國際接軌,中文用普通話教唔通又可以話同國際接軌?接軌係真,不過恐怕為同中國接軌。為政治原因而不惜犧牲學生嘅學習,背叛咗大學教育嘅目的。

要進行以粵語授課,必須由教職員開始做起

港大話難請本地人才呢句其實錯唔曬,香港嘅大學唔知點解同好多香港人一樣輕視「本地貨」,大家都願意請歐美名校嘅博士多啲。

但係中文嘅嘢,始終做研究嘅都係以兩岸三地為主,請唔到歐美名校畢業生嘅情況下,根據外來貨香啲嘅原則下,自然都係台中兩地嘅畢業生矜貴過香港畢業生啦!

殊不知,要做一流名校就要有名校精神,除咗抌錢落去請人做大量研究,重金禮聘知名學者外,最緊要嘅就係對自己嘅學生有信心,請返自己嘅畢業生,薪火相傳,咁先係頂尖名校。如果自己都信唔過自己嘅貨,邊有人會信你?

講返教學語言,其實香港嘅大學,應該強制學生學粵語,你去英美讀書可以唔識英文咩?去德國讀書都要識德文,點解喺香港讀書唔使識粵語?

而對於教授、講師,則鼓勵佢哋學粵語,同時將識唔識粵語列入續約嘅考慮因素,咁樣先可以建立到自己一套嘅大學教育。

其實歸根究底,點解大學唔請返自己友?唔係自己友比出面嘅人差,而係輕視粵語,輕視本土。你唔係喺英美畢業,甚至教過幾年書,我點知你用唔用到英文教書?

教育係灌輸本土意識嘅重點,而大學係培養精英嘅地方,只有本土嘅大學,先可以培養出本土嘅精英。而大學要本土,必定要重視本土嘅語言,用粵語授課,否則喺課程中流露出一絲絲輕視粵語嘅態度,潛移默化下,出嚟嘅學生自然會認為英文、甚至普通話都高粵語一等。所以,要搞本土,大學以粵語授課可謂不可或缺。

 

14344730_1396468540382588_6124070824061538544_n

作者 FB

啱睇就Like埋我地個Facebook專頁
我哋係一班志同道合嘅同學,希望喺中大推廣粵語。如果想加入,可以inbox我哋,或者email: cuhkcantonese@gmail.com

Leave a Comment

Your email address will not be published. Required fields are marked *