美容姐姐與健身教練

美容姐姐與健身教練

Brad Pitt 和 Angelina Jolie 離婚,好多港女話傷心,拍拍心口好彩仲有碧咸同 Victoria 呢對金童玉女,傻豬豬黎嘅,要講世上最襯?梗係美容姐姐同健身教練啦,苦命鴛鴦同樣被人瘋狂捽數,就連劏客手段都如出一轍。

一、試堂賊船

不論是健身 Cold call 抽中的「特選客戶」,還是婚展 coupon 試做價,其實都只是引你上釣的魚餌,上咗賊船啦喎,警訊都睇得多啦,困你入房,人海攻勢,圍住你死纏爛打,見你意志薄弱怕事 type,仲可能搶你信用卡添呀。「五萬太貴?分 24 期都係每個月二千咋嘛!」講到好似分期就唔洗比咁,「都唔得呀?好平架啦!咁啦,仲有個四萬三的 course,仲唔得?三萬?好啦好啦,萬八啦!」究竟佢地講緊價定猜緊枚?

二、踐踏你是開單的第一步

好人好姐,又的確唔會幾皮野 (甚至十幾萬) 拎出黎美容健身嘅,佢地好鍾意好似見工咁問「你上黎想 achieve 到 d 咩?」等你數下自己 d 弱點,方便 sell 你,又或者要你做下 d body test 呀皮膚測試呀,就算你 perfect 都搵到位踩,或者借d易話你健身動作錯/ 低層皮膚好乾。

我試過最誇張的人渣系列,試做 facial 送水療,佢竟然呢個時候走黎 sell,當你除淨紙底褲浸係 jacuzzi,而個美容師衣冠楚楚居高臨下,本應已經好尷尬,仲要聽佢踩你呢樣唔好個樣唔得,正常人應該好快妥協,只想快 D 著返衫,可惜佢遇著我。

聽她廢噏廿幾分鐘,浸在水池卻全無羞恥之心,好不容易見我動了動,滿心歡喜以為終於動搖,但我把雙手擱在浴缸邊,好整以暇微笑道:「浸浴久了,有點口乾,給我一杯暖水吧。」她看著我大有老闆在新花都攬女的架勢,只好黑臉離開。

三、Encore 深淵

賊船黎講,擄劫得一次的祈福黨係低 level,呃到長期飯票先係高手。簽完第一張單,唔知點解,過左無耐又會有人說你買野。「咦?我見你都易爆暗瘡,今日你想做個部激光機唔適合你架,不如買我地個苦瓜 course 啦!」咦?但係你同事上次 sell 我話部機針對暗瘡架喎。你不肯加堂,不肯買新 course,就會發現次次打去 book 都話 full 曬,搞到預約慘過挨契弟。唔想被待慢呀?keep 住買啦!

臨時演員都係演員

我明我明,其實佢地都好慘,底薪少又比人捽數,不過你要跑數,都可唔可以專業少少?「呢部機係用七彩激光打淡 D 印架!」咁即係咩原理?「即係用七彩激光打淡 D 印囉!」咁咩係七彩激光?「……即係七彩激光囉!」有前 P 記健身教練話,其實好多人連基本健身證書都未讀完,更加唔好 expect 佢地會定期睇下 d 最新運動書籍,增長相關知識,日日好似做鴨只係氹女求開單。而美容姐姐呢,明明你攰到想長眠,即使唔係想 sell,但都好似都唔識收把口咁,因為平日最緊要同d師奶客吹水扮熟,即使完全噏唔出部機的原理,打八婆人情牌都 R 到單。靠把口搵食無問題,但你地可唔可以專業少少?

啱睇就Like埋我地個Facebook專頁
港女一枚。雖然不是文藝婊,也裝不成才女,但尚算會寫些文章,希望不至於是識字文盲。 IG: atsuna_kai

Leave a Comment

Your email address will not be published. Required fields are marked *