開學了,打工仔比學生哥更悲哀

開學了,打工仔比學生哥更悲哀

話咁快又到咗開學日,唔止學生哥傷心,連我呢個打工仔都覺得好悲哀,因為開學係意味著將會有多一倍以上嘅人同我一齊逼巴士同埋超級塞車。好不幸地今朝我去第二個站搭巴士嘅時候已經無晒位要企,然後有個大媽掛住㩒電話,當咗我隻手係扶手,其實只要佢同我講句唔好意思,我就算數,點知佢無,仲要用佢美麗嘅秀髮不停掃我隻手,我真係勁想鬧爆佢,但又淆底,你知啦大媽發癲真係好得人驚,一陣有人拍埋片就弊。

其實有諗過唔扶住個扶手,但又唔得,因為一定會企唔穩,想轉位?更加無可能,因為朝早搭巴士返工係迫過沙甸魚罐頭,有位企已經算好好,有時架車滿人飛站連上都上唔到,搞到遲大到。企門口位係最慘,本身頭頂已經係咁畀風吹住,然後每個站都會有人落車,左邊嘅人要落車,右邊嘅人要落車,上層嘅人又不斷湧落嚟,個個都話「唔好意思」然後就逼開你,好似個波咁畀人左踢右踢,久唔久仲會有人發出唔耐煩嘅「摺」一聲,覺得你好似阻住個地球轉咁。

唔係話無辦法解決以上問題,早半個鐘出門口咪唔逼囉,行到總站搭咪唔逼囉,搭的士唔搭巴士咪唔逼囉,但其實打工仔根本無得揀,因為放工返到屋企已經好攰,加班嗰啲更加唔使講,心身疲憊,食完飯可能已經好夜,再用少少時間去放鬆自己,打舖機或者玩吓 Facebook,已經係深夜,到咗第二朝,一定係未瞓夠,所以正常都會拖到最後一分鐘先出門口。我見過有人攰到企喺巴士都瞓得著,以前我返 agency 嘅時候都試過,因為連續幾日零晨先收工,所以頂唔住企喺度都瞓到,通常一瞓著就會突然腳軟,跟住嚇到醒咗,然後再瞓,再腳軟,再嚇醒,不斷 loop。

其實我由細到大都有努力讀書,雖然過程比較轉折,但最後都叫做勉強碌到入大學。細細個已經聽大人講話讀到大學就得架喇,條路點都易行啲,好彩我都無抱太大期望。剩係睇 jobsDB 都已經知咩事,十份有九份都要你有幾年工作經驗,唔係咩大 title 喎,係普通 junior marketing officer 都要,當然仲有一堆話歡迎 fresh grad apply,保險同 financial planner 囉,一係就 trainee。要擠入呢個社會大學,唯有先接受呢度嘅遊戲規則,由低(人工)做起,千其唔好信嗰啲咩大學生平均起薪點。

呢個社會大學「除了壓榨,還是壓榨」,一蚊人工,要你做足十蚊,其實有時我唔明點解啲老闆可以咁殘忍,成日要員工加班到零晨去趕起份 job,但係人工又唔見有得加。佢哋究竟知唔知道人唔係機械人,係需要休息?捱咗幾年之後,就有啲 bargaining power,可以嘗試脫離呢啲不人道嘅公司,不過都要睇彩數,好工真係唔係咁易搵,人工、福利、工時、工作內容、老闆同事好唔好等因素都有影響,正常唔會樣樣如意,好多時要取捨,例如要錢定要時間。

所以學生哥們,好好享受你哋在學時期嘅生活,唔好再諗咩贏在起跑線上喇,因為出到嚟社會大學有排你跑,病都要照跑,分分鐘要你連跑幾日無得瞓,當你跑到就快斷氣嘅時候,教練(老闆)嚟到,你仲要笑住同佢講:「我真係好鍾意跑步呀!教練我哋下一站去邊度跑呀?」

p.s. 其實我已經脫離以前瘋狂加班嘅黑暗時期,只係有時靜落嚟會諗,咁努力讀書同做嘢,最後又可以得到啲咩?我只係想有自己嘅屋企,點解好似仲難過登天?望住咁高嘅樓價,無力感真係好重……

 

Photo:  Flickr user faungg’s photos

作者 FB:小盛女

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *