火炭麗琪

火炭麗琪

警告:本文如火炭麗琪講嘢一樣,將會夾雜粗口字詞,敬請留意!

林阿P在最近的演唱會上說了句:「我覺得全部女人都係臭西」,令好多人聽到後都臉色一變。而我比較想知道嘅係,阿P受到乜西刺激,搞撚到佢潛意識內會有呢種想法。聽完mla嘅《火炭麗琪》,我估計阿P咁樣講嘢嘅一個原因,係因為佢畀啲女人傷得太深,專輯好撚多歌都係關於佢溝唔到女嘅往事(學麗琪話齋,唔好再掩飾話呢啲故事都係源自「我個朋友」),真係聽者傷心、聞者流淚,嗰種傷感、嗰種鬱埋鬱埋嘅感受,終於喺最後一首歌中,嚟個爆發(《攻陷你的西》)!不少「道德撚」都話呢首侮辱女性,但我feel到個「屌」字唔一定係用嚟屌女人的某一部位。喺呢個咁壓抑嘅年代,連新出爐港姐馮盈盈都忍唔住講粗口嘅現實中,《攻陷你的西》更多可能係對呢個仆街政府管治下嘅社會,屌出不滿、發洩怒火,他們更想攻陷嘅,並不是女人的西,而係「西環」個西。

這是 my Little Airport 高明嘅地方,佢哋從《寂寞的星期五》開始,更懂得含沙射影,或以音樂呈現的氛圍,嚟反映當下時勢。專輯《攻陷你的西》嘅主題,話就話係有關於「純愛」,但什麼「這個大時勢 兒女私情不要計」(《愛人有新歡》)等字句,你係可以聯繫到現今嘅一啲社會狀況。而阿P在情場上遇到的挫折,又能跟後佔中年代年輕人嘅受挫感,找到某些對應關係;再聽聽佢哋兩首歌曲內,嗰啲告別的情感(《my dear friend ka hei》,或有所指的、返回英國的《麥記的最後一夜》),以及如同「戀殖」般,對舊歡、往事留戀的作品,都令人聽完後,內心會有少少鬱撚住嘅感覺。

已經出到我唔西記得係第幾張碟嘅 my Little Airport,佢哋的《火炭麗琪》依然有新驚喜,而林阿P所作嘅詞仍是顯得「機智」,亦有時冷不提防地觸動到你我內心(《今夜到干諾道中一起瞓》的「我也是為這下一代人」)。從驗孕寫到下一代再寫到青春、人生嘅《驗孕的下晝》,在「拋出」了一句好撚正的「但是真誠才是最大本領」之後,下一段又將「劇情」來個急轉彎,像打破了前面所建構地寫到了「只願驗孕結果能在此刻呈陰性」。至於《下亞厘畢道》的「但沒有暗號若想再進一步」,或《某夜電影中心》嘅更新後的手機密碼開啟嘅一段,都顯示出阿P巧妙的心思、顯示出佢能將情愛嘅題材,寫得不落俗套。新專輯《火炭麗琪》,還出現了所謂的接應(《獨身的理由》與《某夜電影中心》的Instagram),當然唔少得阿P嘅「文藝腔」—— 《獨身的理由》內嘅《生命不能承受之輕》,和《某夜電影中心》的《Age of innocence》,並凸顯出佢能將「雅」同「俗」,搓揉得比溝女更純熟嘅技巧或能力。

my Little Airport的愈來愈做得好嘅地方,係佢哋在歌曲中更懂得用音樂的氣氛,嚟傳達情感。感傷嘅《麥記的最後一夜》,其歌詞固然寫得好(只用了「白燈、廣東歌與露宿者」,便勾勒出麥記嘅鮮明「特色」),但作品內嗰種帶著朦朧感覺嘅音樂,卻更能營造、補充文字所述或未必可以寫得到嘅意境。送給友鄰的《my dear friend ka hei》,用了迷離、復古的編曲,去呈現一段美好亦讓人感觸嘅往日時光;主題曲《火炭麗琪》中,那幽遠的、如在海邊迴蕩的和聲,又仿佛突出了麗琪與偽善嘅世俗女孩,所不同的特質。mla新專輯嘅編曲,可以聽得到佢哋應該是花了不少心機去進行打磨拋光,也有跟以前不一樣的新意,鼓聲帶出之《驗孕的下晝》,竟加了Brass音色嘅伴奏,讓歌曲變得更「豐厚」;《第十支煙》前面輕快嘅編排與苦澀情感的對比,卻估不到跟著會筆峰一轉、節奏一變,套入的嗰段rap搞怪得嚟,又有板有眼。

我想 my Little Airport 已經將情愛歌曲,做到了一個「有趣」的新高度,但佢哋啲作品「好玩」得嚟,仍是掩蓋不到其本質上所帶著的悲觀性。情場失意嘅阿P(《第十支煙》可能係紀念佢第十次溝女失敗),化悲憤為力量,把mla甜蜜又傷感的音樂美學風格,繼續做好或發揚光大。專輯呈現了有心思的曲目安排(「純愛」歌和《攻陷你的西》之間隔了首「折中」嘅《今夜到干諾道中一起瞓》,令整個銜接能順理成章,不會太跳躍),以及比起以前唱片更俱有的整體性,也喺愈趨豐富或敢去嘗試的編曲部分,證明佢哋啲作品在歌詞上能有「好西」、有亮點之外,亦能於音樂上讓人去玩味。

首選:麥記的最後一夜、第十支煙、攻陷你的西

評分:8.0/10

作者 Fb:斐宇梧的中文唱片架

圖片來源 : 網上圖片

啱睇就Like埋我地個Facebook專頁

Leave a Comment

Your email address will not be published. Required fields are marked *