《熱血新世紀》(equals):當人類文明排拒情感

《熱血新世紀》(equals):當人類文明排拒情感

前言
(如果想直接睇有咩賣點,可直接跳到重點部分)

早前女友 send《熱血新世紀》trailer 嚟睇,睇完頭幾秒已覺得非入場看不可—— 因為呢款科幻離奇嘅戲種,已經係我等愛幻想之人僅有嘅精神食糧—— 故此不論類近嘅戲已經有幾多套(遠嘅有《謊島叛變》、近嘅有《觸不到的她》(her)同《單身動物園》 (lobster) )。坦白講要超越眾多出色前作並唔容易,一個眼高手低處理唔好就變咗膠戲,冒住套戲有一半機會係伏都決定入場睇。
可能因為題材已經唔太新鮮,入場人數都唔係太多,我睇果場中途仲有操普通話嘅觀眾睇到半路走人,可見此類戲未必大路。但入完場睇卻發現電影並無欺場,細心一睇會發現此片製作上有不少細膩同值得留步細味甚至反思嘅地方。

如果要講電影劇情大意,其實係一如 trailer 所見,都係似曾相識嘅橋段:講好耐好耐以後,喺一個未來國度裡面嘅一個「新社區」,裡面嘅人視一切情感波動為病毒,而男女主角因為發生咗感情,決定離開、私奔,就係咁。

咁係咪套戲睇落平平無奇呢?已經見過唔只一個影評攞呢套同《單身動物園》比較,覺得後者比較有趣啜核、或者諷刺權力者得比較到位。但係咪後者比呢套優勝?我唔認同。

呢套值得睇嘅地方,正正就係一啲唔起眼、但處理自然嘅細位。

重點

film2

第一點我想講,就係 “equals” 嘅世界觀。

首先我發現好多電影簡介、影片評述,都會錯誤理解《熱血新世紀》故事背景嘅呢個「新社區」係好似以往幾套科幻電影咁假定咗,有一個想操控人心嘅極權政府存在。所以當男女主角偷情果陣你會期待有個鏡頭偷拍然後比警衛捉但無出現、你諗住有噁心教官追住男主角逼佢講「我想做一世毒撚,我最鍾意砌積木,唔鍾意奶腳!」嘅獵奇畫面睇唔到;反而有好多所謂「執法部門」處刑上嘅「蝦碌」位表露無遺:例如「情緒高危病人」極易被調包、所謂「執法人員」亦沒有主動去捉情緒有問題嘅途人等。

但其實個人認為設定嘅妙處正是如此。以往我哋睇 1984、謊島叛變都好,果種棄絕情感、嚴重扭曲嘅價值觀都係當權者嘅精心安排,以便既得利益者可以安心維穩、充權,似乎都帶住極壞動機,推嘅都係一套變壞嘅思想,所以正義嘅人要群起攻之,或者臨尾都要攪下破壞先高興。

而 equals 嘅世界觀恰恰相反。套戲要帶出嘅反而係另一個問題:如果唔係出於陰謀惡意,而係當人類嘅經驗、文明嘅發展、大眾嘅意願,都認為情感波動係影響生活、係一種要排除嘅病時,當人類喺社區裡面有同一共識,你會如何抉擇?

不妨諗吓:當社會不斷講求效率、秩序,大眾都有共識地希望過住和平穩定嘅生活。
比起窮鄉或者發展中地區,最好當然就係生活喺繁盛嘅城市啦。之但係生活喺城市裡面,城市人無形中遵守咗幾多嘢?犧牲咗幾多嘢?比如現代城市人會認為早晚落牙膏刷牙先至衛生乾淨,但其實牙膏先至係近幾十年嘅產物⋯⋯ 咁用現代人嘅準則,早幾十年無用牙膏刷牙嘅人都唔夠衛生乾淨。同樣 equals 希望帶出嘅可能性亦是如此:一群追求文明進步、生活和諧、心靈平靜嘅人,喺相應嘅經驗同成長背景下,都會得出「情緒波動係病」嘅結論出嚟。

當一種習慣被貶化成惡習,無論佢以往嘅存在係有幾理所當然,都會變為唔正常。

第二點做得出色嘅係鏡頭處理。

除咗唯美嘅電影佈景同畫面,鏡頭表達情感上亦很有心思,比如從電影海報到戲裡都用咗朦朧感嘅效果處理:有一幕係講男主角陷入思念,佢周圍嘅景物都會跟住變朦,用畫面表達一個人對愛情盲目專注而忽略周遭事物嘅封閉心境。除此以外,戲中運用冷暖色調亦配合劇情發展:從二人未曾相遇白藍黑色,到佢哋廁所密會時充滿神秘感嘅螢光綠色,到兩人家中浪漫依偎所用到嘅暖色調,就好似兩舊冰塊喺烈火燃燒下逐漸融化一樣,冰冷嘅內心變得溫暖。

最後想講嘅一點係依套戲比較著墨於戀人間嘅心理變化。

如果係比較故事扭橋,依套未必比得上《單身動物園》甚至《荒島叛變》;但若論到角色心理描寫同變化,《熱血新世紀》就絕對唔輸蝕。
有唔少細節上都睇到套戲對二人嘅情緒有所著墨。有一幕女主角與男主角重逢,由佢一見面就對男主角抓狂,到男主角攬住佢親吻安慰等佢平伏;女主角對戀人嘅擔憂同牽掛,都喺肢體動作上自然流露,相信都會勾起觀眾嘅共鳴。

而論到心理變化上,男女主角由相信官方會推出 SOS 嘅情緒治療藥,到因為愛情而唔再服膺權威,無天翻地覆嘅革命、亦無驚天動地嘅殉情環節,但兩者互相被情牽動,因為接觸而了解對方、了解自己,喺科幻情節嘅平淡戀曲反而更見寫實哩。

到最後嘅最後,值得一讚嘅係配樂。我唔多講,大家自己聽啦。

啱睇就Like埋我地個Facebook專頁

今天想來,以往的稿好像白投了一樣。此後寫的,可能相對離地,但希望更能貼近自己想寫的類型。往日稿,如白投;今日寫,盡自在。

Leave a Comment

Your email address will not be published. Required fields are marked *