同女友鬧交點算好?

同女友鬧交點算好?

「你又遲到,今次係第幾次?」Brenda 黑面地說。

「唔好嬲啦,下次唔會㗎喇,對唔住呀。」Mike 說,先認錯實無死,起碼唔會火上加油。

「下次下次,你上次去長洲同上上次去佐敦谷都遲到啦!」Brenda 說,女人都愛翻舊帳。

「飲啖水先啦 BB,我都知你等到又熱又攰㗎喇。」Mike 說,希望女友可以飲水降降溫。

「你知就好啦,你講吖,你覺得點罰你先唔會再遲到吖?」Brenda 說,女人通常都唔會咁易放過你。

「罰。。。我錫多你幾啖啦!」Mike 說,除咗認錯,講肉麻嘢都係其中一個令女友下火嘅方法。

「癡線,你唔好掂我添呀!」Brenda 說,女人有時係會得寸進尺,明明已經佔上風,都仲係想插多你幾刀。

「不如去個廁所先?我想洗個面。」Mike 說,心諗呢個時候都係分開冷靜吓好啲。

「你去啦,我唔想去。」Brenda 說。

「我玩 tsum tsum 儲夠金幣,可以抽公仔,而家仲有概率 up,如果我抽中特別版你就唔好再嬲我啦好無?」Mike 說,可惜最後都抽唔中。

「嗱,證明個天都覺得我應該繼續嬲你!」Brenda 得戚地說。

「成個禮拜無見,你今晚又要返屋企食飯,而家得返兩個鐘咋,之後你想嬲我都見我唔到喇。」Mike 說,Brenda 默而不語。

「不如去食甜品?附近有間心太軟好好味。」Mike 說。

「嗯。」Brenda 說。

「係咪好好味呢?sweet 唔 sweet 呀?」Mike 說,心諗最後絕都出埋,咁都搞唔掂真係無計。

「Sweet,其實我都無嬲你㗎喇,見你咁落力氹我,我都唔好意思再嬲啦嘻嘻。」Brenda 說,並餵阿 Mike 食咗啖心太軟。

其實情侶鬧交就梗㗎喇,我就唔信有情侶成世人都未鬧過交,而鬧交都有輕重之分,重則懷疑對方出軌,輕則可能純粹因為遲到/去完廁所唔放返個蓋落嚟/打機無聽電話等都會鬧一大餐。千其唔好睇少每一次鬧交呀,因為人係好容易會翻舊帳,明明最初話緊你掛住打機,講講吓就話你唔關心自己,再講講吓就直情話你出面有第二個,有時女人嘅創作力量同幻想,真係會嚇你一跳。不過鬧交都唔一定只係負面嘅,如果處理得好,鬧完交可能會更加了解大家嘅想法,感情仲更進一步添。

處理鬧交嘅最好方法當然係認錯(如果真係你錯的話),然後不妨叫對方飲啖水(有的話,無就求其7仔買枝),咁就可以塞住佢把口先,因為嬲緊嘅時候一定會講啲好難聽嘅說話,句句有骨驚死插你唔死咁,之後講十萬次對唔住都未必補得返。通常女人都唔會飲啖水就下到火,怒火中燒嘅時候無論你點氹佢佢都會覺得唔啱聽,剩係想發脾氣鬧爆你,所以下一步就係叫佢去廁所,等大家可以洗個面冷靜吓,加上香港任何地方嘅女廁都排晒長龍,一定夠晒時間比大家冷靜。

如果對方唔肯去廁所,就唯有搵啲有機率嘅嘢,例如抽 tsum tsum、過馬路嘅紅綠燈、遇到邊隻 Pokemon等,完全無關都得,純粹畀大家一個下台階嘅機會。如果咁唔好彩估唔中,就用「時間倒數法」,適用於唔係成日見到面嘅情侶,而家倒數得返幾粒鐘咋,仲要嬲爆爆咁過?咁好蝕抵啫!如果以上方法都唔 work,就帶佢食甜品/佢最鍾意嘅嘢食,由個胃著手,食到好味嘅嘢,心情自然會大好。

情侶鬧交要即時解決可能好難,唯有軟硬兼施之餘盡量搵辦法畀大家冷靜吓,但切忌拖太耐,個人覺得千其唔好嬲「過夜」。以上方法其實都係隋口嗡當秘笈,如果大家有更好嘅方法不妨留言開心 share,等各位巴打絲打唔使咁煩惱。唔係話性別歧視,不過我覺得都係女人嬲多(定因為男人錯多?),所以在此奉勸姊妹們都唔好成日嬲喇,嬲都唔好嬲太耐,傷身㗎,皺紋都出多幾條,幾唔抵呢係咪?仲有唔係個個男人都好似阿 Mike 咁有咁多法寶同耐性,如果個男人氹氹吓無晒計,大家無咗下台階就奶嘢㗎喇,一句講晒:「見好就收啦喂!」

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *