我唔係想你讚我,我剩係想加人工!

我唔係想你讚我,我剩係想加人工!

「話咁快你就做咗一年,我覺得你都做得唔錯,所以人工會有所調整,會加3%畀你,即係 HK $480。」老闆 Sharon說。
「其實我係咪有啲咩做得唔夠好?」Brenda說,心想這個加幅分分鐘連通脹也追不上,何況自問已經做足 100 分,平日加班至夜深也毫無怨言,只加 3% 實在令她有點心有不甘。
「唔係呀,你好幫得手,學嘢又快,阿姐都成日讚你,不過你知啦今年經濟唔好,其實唔減仲有得加已經好好,仲有喺我哋呢度做嘢,係只問耕耘,不問收獲。」Sharon說。
「嗯,明白。」Brenda說,並心想不問收獲?你試吓聽日話唔出糧吖,睇吓仲有無人肯幫你做嘢?

其實打工仔唯一嘅心願就係升職加薪,為咗願望成真,係需要一整年都努力工作,小心翼翼盡量減少出錯,同同事上司打好關係,扮演一個好好先生/小姐嘅角色,每日準時返工兼加班(如有需要)。有時臨門一腳撻Q,做錯嘢搞出個大頭佛,老闆就大條道理可以唔加你人工,你之前364日嘅努力就會白費晒。不過又唔係個個老闆都咁衰嘅,其實老闆都分好多種:

賢君型

明察秋毫嘅老闆,知道邊個真係做實事,邊個剩係識得擦鞋,而且獎罰分明。平時會關心員工,例如忙嘅時候會講幾句鼓勵說話,亦唔會吝嗇讚人嘅說話,更喜歡聽取員工嘅意見,係開明嘅老闆。員工會好樂意為佢賣力,因為佢令員工真正明白到「一分耕耘,一分收獲」呢個道理。可惜嘅係呢啲老闆已經面臨絕種,要遇到真係難過中六合彩。

狐狸型

奸狡嘅老闆,只會不停讚你,用甜言蜜語令你心軟/飄飄然,實質根本無畀過任何嘢你,只係要你不停咁做,然後讚你有效率,話公司無咗你唔得、你真係好幫得手等等。天真嘅員工/fresh grad就會傻傻咁繼續努力工作,有啲經驗嘅都會騎牛搵馬,早走早著。呢啲老闆都多機會遇到,遇到嘅時候記住要保持清醒,讚美嘅說話其實係無乜實質價值,唔可以拎嚟換錢㗎。

刻薄型

賺到盡嘅老闆,見到你日日做到通頂佢就最開心,然後捉埋你遲到話要扣你錢,再諗盡辦法唔加人工畀你,一係加HK$100要你做多HK$1,000嘢。平時無讚你不特止仲要嫌你做得慢,無效率所以搞到要加班,總之佢永遠是對的,你永遠是錯的。遇著呢啲老闆,唔使諗,裸辭啦,唔好再虐待自己喇,除非你係被虐狂啦吓。

老老竇竇其實返工為乜?我好現實,我真係為錢㗎咋。初初出嚟做嘢嘅時候都仲會好天真咁話返工係希望學到嘢、拎到成功感、識到班好同事等等,有時真係傻到會為咗上司嘅一句讚美說話而搏晒命去做,加班都在所不計,但係當努力得唔到回報嘅時候,個人就會開始醒,而家嘅我只但求準時收工,唔好太壓力,年年有人工加就心滿意足,嗰啲所謂嘅成功感已經唔重要,你加我人工等我開開心心去食餐好嘅,有飽肚感同幸福感仲好啦。

作者 fb : 小盛女

圖片來源 :網上圖片

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *