口不對心,女人最勁

口不對心,女人最勁

「都咁夜喇,你唔好嚟接我放工喇。」Brenda 說。
「好啦,咁我返屋企先,你都唔好咁夜喇,拜拜。」Mike 說,並掛線了。

五分鐘後。。。

「無口齒!講咗嚟接我又唔嚟接!嬲死你,哼!」Brenda 突然傳來一個 whatsapp。
「吓?你頭先唔係話夜,叫我唔好嚟咩?」Mike 說,女人心真係海底針。
「我理性上唔想你嚟,但我感性上好想你嚟架嘛!」Brenda 說。
「好啦,咁我而家嚟。」Mike 說。
「唔好嚟呀你!我發脾氣你先話嚟,你都唔係真心想嚟,嚟到都無意思。」Brenda 說。
「其實我一路都好想嚟,係你叫我唔好嚟我先唔嚟咋喎。」Mike 無奈地說。
「我諗住我叫你唔好嚟,你都會堅持話想嚟架嘛,點知你話返屋企!」Brenda 說。
「不如下次坦白啲啦 BB,我好蠢估唔到你諗咩架,我嚟緊喇,一陣見。」Mike 說,然後心諗其實你想點咪直接講囉,麻_煩。

其實女人真係成日都口不對心,唔講其他人,剩係我同我阿媽都已經有呢個惡習。明明心入面諗一,但口會講二,然後希望人哋估到係一,真係就算識讀心都未必搞得掂。不過你又唔好以為女人係特登玩嘢,有時佢哋自己都好矛盾,理性同感性不斷交戰,自己都唔知自己想點,例如夜一夜都想你嚟接放工或者送返屋企,但又驚你覺得自己好任性或者公主病,同時又覺得要你周車勞頓好辛苦,有時再加埋外在環境影響,例如身邊有其他朋友/同事在場,於是就只會講啲好得體嘅說話,唔會表達自己真正嘅心意。

正所為眼見未為真,耳聽都未必係真,所以當出現一啲「唔對路」嘅情況,男人不妨問多句,確保自己唔會瀨嘢。仲有可以從錯誤中學習,因為累積一定經驗之後通常都可以判斷到邊句真邊句假,例如我阿媽生日叫我唔好買禮物,話嘥錢,不如直接畀錢佢,於是我就好天真咁信咗佢,剩係封咗封利是,唔使問梗係瀨咗嘢,佢都有講多謝但笑得好勉強,好明顯係覺得我無花心思,咁往後嘅生日,我當然識做啦。

如果拍拖只係靠單方面付出其實會好辛苦,所以男人努力猜謎語之餘,女人都真係要乖乖哋坦白啲喇,我都明一時之間係好難改,如果初初都係講唔出口可以試吓用 whatsapp,一步步嚟,個人覺得文字係會比較容易表達。兩個人相處坦白真係好緊要,成日估估吓會好攰,仲係好易會有誤會,小事化大,所以唔好再玩「口不對心我最勁」喇。

Photo: Flickr user Saiday
作者 fb : 小盛女
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *