我這樣好嗎

我這樣好嗎

在超級月亮超級圓又亮的那晚,傳道人約我吃飯。

這個傳道人是我在大學認識的,並沒有時時聯絡,也沒有一直互相噓寒問暖。事實上,我們走的路線、看待事物的價值觀也不很一致。
但他很關心我。

人愈大,漸漸明白身邊盡圍著和你相同意見的人不一定好,因為會跌進圍爐陷阱。
和誰走得近,有時並不因為志趣是否相投。
不如說,要不要和一個人繼續交往,講求「心」。
彼此願意聆聽、溝通、支持才更重要。

這個傳道人,雖然沒有介入我的生活,卻總介入我的生命,靜悄悄地扭轉了一些事情,大大推動了我的腳步向前。

比如大學的時候,有一次在校園散步,因為大家未算好認識,就在我尷尷尬尬之時,他開口講了改變我以後為人的一番說話。

我:「我成日有種好奇怪嘅感覺。即係我本來諗住做社工,應該要對生命、幫人好有熱誠。但我最近去完義教,當個個因為可以幫到小朋友好興奮好開心,其實我無咩感覺;又好似我參加教會嘅探訪小組咁,人人都分享諗住自己去幫人,點知係人哋幫返自己轉頭,好感動好多得著,但我完全無嗰啲感受。我係咪好奇怪?其實嗰啲嘢我都做到,做嘅時候都唔難受。我都唔知點解自己會咁。」

傳道人:「吓?!你係咁架喎。你一直都好冷靜,習慣默默觀察,再靜靜思考。鍾意旁觀啲事。你唔係嗰啲衝衝衝好熱血嘅人。」

腦內彷彿「叮」一聲,裡面不停小宇宙大爆發。
這麼多年來的違和感突然遭到解答。
頂,我一直誤會了自己,朝著錯誤的方向努力。
鹽又怎能變糖呢。
雖然我成日笑,但我個心係凍架。
錯哂,成件事錯哂呀。

短短的廿零分鐘,改變我一生。
從此開展了我涼薄又溫柔的個性。
我尋回了自己。
係,我變得自我。
但又有甚麼不好呢。
真正可以活出自我的人,首先必需要很認識自己。

四年幾以後,我們又再聊天。
講了很多事:家庭、生活、教會、信仰……
然後,他又講出了一番震撼我腦袋的說話。

我:「嗯……有時我都會怕。即係呢。如果我可以乾脆放棄信仰,咁就一了百了,又或者唔放棄,咁就勇往直前。但係我永遠 kick 咗喺中間。呢年幾以嚟,我試過返唔同教會,又試過參與一啲信仰團體……但我覺得好大壓力。我好似未 ready 咁。對我嚟講,而家要為信仰去付出,係好沈重嘅事。我其實 feel 到自己係處於需要休息嘅階段,但我又唔敢。我永遠都唔可以好安份咁停留喺一個 stage。係,其實我好不安。」

傳道人:「你辛苦得太耐喇,好好咁抖吓啦。人如果唔可以令自己生活開心,好難有力走落去。就好似之前借俾你本書溫偉耀博士分享嘅見證咁講,佢太太過身之後,佢即刻買咗套好靚嘅 Hi-Fi,好多人可能好不解,甚至覺得佢冷血。但係人呢,喺愈艱難嘅時期,愈要善待自己。去做啲令自己快樂嘅事啦。我見你最近有去 busking,係好架。你租咗個小地方俾自己,都好架,人都需要有自己嘅空間。有個朋友分享,要 embrace yourself,我覺得好重要。自己好廢咩,好醜陋咩,都要擁抱自己。你就算到最後一直係呢個狀態,你都要擁抱自己,因為呢個就係你嘛。我哋嘅信仰其中一樣好重要嘅野,係上帝有恩典。」

因為要訓練自己強壯的心靈,我從來不奢求誰的安慰或肯定。(有的話一律是 bonus)
但原來我們都需要被認同,需要有人告訴我們別怕。

當信仰失掉模範答案,當信仰再沒有一條清晰的路徑。
我們恐懼、迷惘,像瞎子摸路過河,處處膽顫心驚,怕一不小心就滑腳,墜落到無底深潭。

但耶穌說:「我為審判到這世上來,叫不能看見的,可以看見;能看見的,反瞎了眼。同他在那裡的法利賽人聽見這話,就說:難道我們也瞎了眼嗎?耶穌對他們說:你們若瞎了眼,就沒有罪了;但如今你們說我們能看見,所以你們的罪還在。」(約翰福音 9:39-41)

所以不要怕,不要怕。

我講不出上帝必引領你這些說話,但運用邏輯我覺得如果上帝是真的,祂總會有方法叫我們找到祂,如果是假的,我們找不到也就不太緊要。

於是,我突然就覺得好安心了。 : )

 

Photo: internet

作者 fb : 洪麗芳 – Charis Hung

啱睇就Like埋我地個Facebook專頁

喜歡文字喜歡到猶如呼吸。
必須要寫寫寫。
也許我患上了名叫「寫作」的強逼症。

Leave a Comment

Your email address will not be published. Required fields are marked *