打家劫舍都唔夠買樓

打家劫舍都唔夠買樓

有新聞報道賊人一行四人偷走金磚,共值二千幾萬。碌下 Facebook就見到有大智者網友話:唔計揸車嗰個,四個人分完都唔夠買層樓。呢番說話認真笑中有淚。

打家劫舍係搵快錢嘅途徑之一,係咪最有效呢?睇怕未必,而且亦唔係本小利大之事,成日講投資要計回報率,打家劫舍要準備武器,要逃避法眼,要搵著草路線,不成功便成仁啊!

長線投資,可繁衍如病毒咁增加利潤先係王道啊,至於有咩方法?呢啲大家自己諗下,實唔實行到就閣下自理啦。

話題去返分完贓都買唔到樓度啊,可想而知而家個樓價係高到幾咁唔正常?聽講以前供樓係唔想你畀首期慢慢供,可以一炮過;就算要供,兩公婆都搵食嘅亦好快供完,亦唔會話一個人撐唔起頭家。

唔知幾時開始連建構私人生活空間都變成一件咁奢侈嘅事,彷彿要耗盡所有積蓄、要用盡每一個細胞嘅力氣先可以換取到基本嘅生活所需。

二世祖叫人去少兩轉旅行就買到樓,係因為佢去兩次旅行嘅使費已經夠你買個單位啦!

衣、食、住、行係生活中必要嘅基本,而家住似乎係無法實現嘅夢,行亦越來越貴、搭車亦越來越迫,唔知我哋幾時會連衣食都負擔唔起呢?

社會變成咁,的確係好不公不義,你可以話係制度嘅錯,係資本主義邪惡,係人性嘅醜陋。咁多同日常生活息息相關嘅嘢,好似大部分人都選擇視而不見。或者,唔係因為無力,而係有心有力都搞唔掂啊。

作者 Fb:Ching Kwan

圖片來源:HKFP

啱睇就Like埋我地個Facebook專頁
清君,過氣酸臭作者,咩都寫下,希望娛樂到人,又啟發到人,簡稱渡己渡人。

Leave a Comment

Your email address will not be published. Required fields are marked *