自此之後,我就唔想再養狗

自此之後,我就唔想再養狗

小盛女係個獨女,讀小學嘅時候爸爸買咗隻北京狗畀我,可能係驚我一個人太悶掛?隻狗叫小白,因為佢白雪雪,眼大大,仲好活潑,每次我返到屋企佢都會撲埋嚟擺晒尾咁歡迎我。平日我會帶佢去散步,應該話係佢帶我去跑步,因為佢跑得好快,係咁扯我行。有時我餵佢食嘢會將佢啲狗糧掉到好遠,佢就會跑去食,又或者我會匿埋喺度門後面同佢玩捉伊人,總之乜都可以玩一餐。

有日我上完功課輔導班返到屋企竟然唔見咗小白,我問媽咪小白喺邊,佢話佢成日瀨尿,太曳,所以決定唔要佢,掉咗佢出街,我聽到之後即刻衝入廁所喊,喊到扯晒蝦,無諗過媽咪咁殘忍,我連最後一面都見佢唔到。無幾耐爸爸就叫我開門,我見到小白喺度擺尾,原來係爸爸帶咗佢去散步,我即刻攬住小白喜極而泣,由嗰日起,我決定呢一世都要好好照顧佢。

好快我哋就當咗小白係屋企人,有時仲叫佢做「細佬」,我就係家姐。我用咗好耐時間教佢坐低同畀手手,第一次成功嘅時候真係感動到流淚,後來佢仲識聽「去街街」同「有嘢食」,一聽到呢兩個詞語佢就會好 hyper 周圍跑。我最鍾意係聞佢隻肉掌或者頭,但係又會一路聞一路話好臭,成件事好變態。有時屋企無人我會同佢傾心事,開心唔開心都會同佢講,佢有時側側哋頭,好似真係聽緊我講嘢咁,有次我講到喊,佢就用條脷舔我隻手,搞到我喊得仲勁,最後我仲同佢講呢個係我哋我個之間嘅秘密。

小白陪住我升上中學,考會考、高考、讀副學士同大學,可惜人越大就越忙,我開始拍拖,我開始返 part-time,越來越少時間陪佢玩。我有好多朋友好多節目,但係小白由此至終都只係可以喺屋企等我返去同佢玩。或者忙只係藉口,主要係我開始忘記咗我對小白嘅承諾。小白想我同佢玩嘅時候佢會扒喺我隔離悲鳴,有時我都會離開部電腦同佢玩一陣,但係如果要趕 project 或者專心溫書嘅時候,我就會覺得好煩,會鬧佢叫佢唔好再嘈。可能佢想引我注意,又或者係佢已經好老,佢開始周圍瀨尿,然後我更加嬲,話佢點解咁曳。

到讀大學嘅時候,我基本上只係出門口前摸吓佢,返到屋企摸吓佢,瞓覺前摸吓佢,就係咁多,連帶佢落街散步嘅責任都交咗比爸爸媽咪,只係有時會客串吓同佢哋一齊落街。狗嘅一歲等如人嘅七歲,所以小白其實已經好老,媽咪話每次我有份帶佢落街佢都會行得特別快,好似想話我知佢仲係同以前一樣咁有活力。小白做過手術,身體弱咗好多,每日佢都只係扒喺度瞓覺,以前佢跳一吓就可以上櫈,而家佢跳幾吓都唔得要等人抱,其實我內心深處係知道小白已經好老,應該珍惜同佢相處嘅時間,但係我反而選擇咗逃避,因為我好怕面對死亡。

大學畢業之後我決定去澳洲 working holiday,我最唔捨得係小白,因為我驚我一去就見唔返佢。去到澳洲我久唔久都會同屋企人視象,見吓小白,可惜後嚟我去咗蕃茄農場打工,嗰度網絡好差,根本用唔到視象,而且返工係唔會帶電話。有日放工返到 sharehouse 突然收到媽咪個 whatsapp 話小白有病,可能就嚟唔得,件事太突然,我都唔識畀反應,剩係話有咩事即刻打畀我。到咗第二日放工,我就收到媽咪個 whatsapp 話見到小白太辛苦,所以決定幫佢安樂死,然後就傳嚟一張有一小堆骨頭嘅相,我即刻崩潰,我好傷心同嬲,仲話憎死佢咃,點解連最後一面都唔畀我見。

後來冷靜過後我當然知道佢哋嘅苦心,佢哋係寧願我嬲,都唔想我見到佢死之前嘅樣,其實我知道佢哋比我更傷心更難受,因為佢哋係睇住佢一日差過一日,越來越瘦,食唔到嘢,我諗安樂死呢個決定佢哋都考慮咗好耐。澳洲嘅旅程依然繼續,表面上我已經無事,但係間唔中夜晚都會偷偷哋喊,後悔自己無好好對佢,覺得好內疚。而家已經係小白離開之後嘅第三年,諗起佢仍然會喊,可能因為由細到大實在投放咗太多感情落去,所以我真係唔想再養狗,唔想再承受呢種痛,而且我根本唔係一個好主人。

所以小盛女衷心希望大家真係諗清楚先決定養唔養寵物,寵物唔止係寵物咁簡單,係一條生命,唔係你鍾意就搵佢玩,唔鍾意就唔理佢,甚至係心情唔好就打佢,虐畜嘅人直情要落地獄。至於已經養緊寵物嘅你,一定要好好珍惜同佢相處嘅時間,寵物無我哋咁長命,佢哋一生入面最重要嘅人就係你,一定要好好愛錫佢,唔係就後悔莫及。

 

Photo: Flickr user G Nieto

作者 fb : 小盛女

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *