4 件喺英國工作嘅不同之處

4 件喺英國工作嘅不同之處

最近有人問我喺香港同英國做嘢有咩唔同,諗咗我好耐,最後決定用一日由起身到訓覺嘅模式分享,因為兩個地方,由訓醒的一刻就唔一樣了。

利申:英國咁大工種咁多,分別都好大嘅。香港人做老師同做 banker 都唔一樣啦?所以米多莉都係 focus 喺倫敦做私人公司嘅經驗分享吧。

1. 好多英國人都係 morning person

我諗香港除咗退休老伯之外,大部分人都係貪睡遲起身嘅路線,partly 因為遲放工遲訓吧?所以會六點幾起身做 gym 沖涼再返工嘅人真係少之又少。而喺英國,老闆們員工們都幾興早返工,唔興遲放工。有時七點幾返到公司,沖杯咖啡利用頭腦清醒又冇會開嘅時間搞掂 d tasks,特別有效率。

2.冇得恃住自己係 small potato

由中學喺英國讀書我就留意到一件事。長輩(老師或上司)喺英國會好尊重下屬或學生嘅意見。其中一個例子,就係如果你修數學科咁計啦,而老師想喺禮堂召集所有修咩屎嘅學生,佢會咁講:

Could all the mathematicians please come see me outside the hall now please?

個 point 係咩呢?係佢叫 d 修咩屎嘅𡃁仔做”數學家”!我果陣聽到,個心寒咗一寒,喂我都係讀吓咩屎啫,托唔起數學家咁大頂帽喎。而佢哋真係會咁講,例如你有一條生活化嘅科學問題,走去問老師,佢可以咁答你:”great question, maybe you can discuss this with Matt, he is a physicist and may have some knowledge on this!” 殊不知 Matt 都係考緊 GCSE(類似會考) physics 啫。

呢個尊重孩子們選修嘅專業,並附上一份尊榮和責任感,喺公司都會見到。雖然新入職嘅 small potatoes 冇咩經驗,但冇人會因為咁而覺得你唔知做緊乜(除非做咗一段日子發現你真係未訓醒)。佢哋應該自發作出襯托你公司嘅良好表現。

因此𡃁仔係唔可以因為細粒就唔俾意見,老闆都會希望聽你嘅想法,反而唔鐘意齋做冇 talk 之人。埋頭苦幹勤勞上進,不是工作上所有事情的 solution。

3. 好 talk 得

講起 talk 得,呢個好多人細個嚟英國讀書就會發現,點解佢哋咁多嘢講架呢。

如果你喺香港,當你第一日去上堂,課餘學日文咁話。你嚟到課室,老師未到,同學坐喺度咁會做咩呢?通常都係各自喺度玩電話,點會無啦啦同個唔識嘅同學傾偈呢?

但英國人去到邊都會傾下偈嘅,呢種叫 small talk,天氣食物工作服裝旅行讚美抱怨,they just gotta say something!

喺商業社會,呢種友善又有氣勢嘅 talk 得人士,英國人會覺得佢好 “smooth”,好友善識 networking,有大將之風咁話。

我唔知如果日文班第一堂有條友一入班房就不停講嘢:”Oh my Lord I thought I was late! It is pouring outside, so ridicuous. I am so looking forward to this course…”香港朋友嘅反應會係咩呢?

Eeek.

4. 各自空間好重要

我曾經見過有人喺香港嘅辦公室播電台節目。呢件事我真係不能夠理解,唔通全條 team 都鐘意聽森美小儀嘅?唔通冇人要專心喺寧靜嘅環境工作架咩?

喺英國做嘢雖然好多人講嘢討論工作,但好少人其實真係好大聲。一來本身英國人講嘢就細聲啦,二來佢哋習慣如果有更多更長久嘅事要傾,通常都會坐開一邊,或者入房講。當然同辦公室嘅大細都有關啦。不過佢哋會小心注意自己嘅行為會唔會影響他人(當然,衝突或不滿依然都時有發生嘅)。

如果要聽歌聽波,都會戴上耳機嘅。

不過我懷疑會公開播電台都係老式 d 嘅公司囉可?

今次講住咁多先,日後諗到留意到更多就出第二集囉。

 

Photo: Officelovin

作者 Fb:Midori 米多莉

啱睇就Like埋我地個Facebook專頁

Tagged .

直抒胸臆,隨筆愛情、工作、生活,細訴我這條魚乾老少女在倫敦奮鬥的點滴。

Leave a Comment

Your email address will not be published. Required fields are marked *