又到當選民當傻仔嘅時候

又到當選民當傻仔嘅時候

係香港做得工程就有一種覺悟:工程界就係建制派。咁係冇辦法,因為工程界就係仰政府鼻息,政府有工程做就有工開,政府比條難路你行,你就可以執笠。而且我成日打比喻話,工程界就係靠啄鱷魚牙隙肉碎生存嘅雀仔。鱷魚搵到食,我哋就可以偷啲頭頭尾尾食,大部份雀仔都唔會計較隻鱷魚有冇道德。

所以對香港人痛心疾首嘅大白象工程,好似高鐵港珠澳人工島,對工程界嚟講越多越好,最好係今日叫我起,聽日再畀錢我拆咗佢,工程越唔合理,我哋越有工開。香港人橫掂都要畀人搶錢,梗係自己搶埋一份先至實際。

真小人好過偽君子,講真我寧願聽到有人同我講咁樣嘅說話, 好過聽見有人同我講「我哋一定要支持政府施政,跟隨一帶一路,抓緊發展機遇」。我哋大家都係做工程,實事實做,咪講呢啲核凸嘢好唔好?

偏偏工程界一直以嚟都係充斥住呢啲除咗識搵錢之外完全唔知自己講乜嘢嘅老大哥。佢哋剩係知道自己要投票畀建制,但係佢哋完全諗唔到係乜嘢原因。立法會功能界個盧偉國係咁,到今次選特首, 成班人又出嚟無厘頭R票,一樣係咁憨居。

黎咗幾個老前輩,一嚟就講返選立法會嗰陣時聽嗰啲三幅被:政府應該平均攤分每年工程份量,令到業界供求穩定。佢哋會盡力聆聽年青工程師的訴求,咁咁咁。

哦。

我第一時間想問咁樣同選特首有咩關係?

首先係你哋呢班人先有得選特首,我冇。咁你哋有乜嘢辦法令到特首真係聆聽你哋嘅意見?

冇。

有一個仲講話佢由 2000 年開始已經同政府咁樣講,選曾蔭權嘅時候都係咁講。曾蔭權嗰陣時都應承佢,結果之後冇咗件事咋嘛。

嗰一下我幾乎忍唔住笑喺張櫈碌咗落嚟。咁即係人哋當你傻架喇。唔好講曾蔭權,對上一次選梁振英,佢又放你飛機,咁你可以點?

一個正常嘅選舉,你可以威脅個候選人,如果唔兌現選舉承諾,下一次就唔會再投佢票,就係咁簡單。假設你係代表我哋工程界,自 2000 年開始你已經不停俾人放飛機,你每次選完人哋都唔放你在眼內,咁我做咩仲要投票選你去代表我呢?究竟係你天真定當我白痴?人哋要選票嘅時候就同你哈哈哈,到你而家要選票嘅時候就嚟同我哈哈哈, 根本就係選舉要票嘅時候先至會同自己選民哈哈哈幾下,你天真,都唔好當我哋弱智。

有人問佢哋有冇投票嘅意向,佢哋竟然夠膽講話佢哋冇特別嘅政治立場,唔會而家就已經決定要選咩人。講真,係特首候選人都唔知係邊個嘅情況之下,我要選選委已經係好奇怪嘅事,你仲要冇個清晰嘅立場,咁我點樣投票俾你,等你去代表我???呢一班人究竟知唔知自己做緊乜?

又有人問佢哋會唔會全部一齊統一投票立場。佢哋竟然又話唔會強迫所有成員一齊投同一個人、、、 救命,究竟你哋呢啲係乜嘢聯盟? 又要叫人哋選曬你哋三十個人,但係你哋又唔會決定到自己點樣投票喎?

望返張宣傳單張,個個都係大公司既阿頭。講真平時做生意真係挑通眼眉英明神武。但係一搞選舉嘅時候…… 我諗得出既字都唔好意思講出嚟。喺度投得你票,個個都讀飽書。 點解你哋可以認為用呃婆仔嘅手法可以嚟呃到我哋投你票? 無錯,如果齊集 30 票的確係多多少少有啲啲影響力,但係你哋有冇諗過,你哋根本冇任何方法去保證政府會認真考慮你哋嘅建議?你地係香港生活咗幾十年,而家口口聲聲話要等後生仔接棒,你哋過去過十幾廿年又做過啲乜嘢令到我哋嘅政制 可以更加完善? 令到政府真係會認真考慮市民同埋業界嘅聲音?

完全冇。

有幾個老人家重話,自己都七十歲選埋今次應該都唔使再選,係時候交棒畀年輕人。佢自己應該唔記得咗自己五年前都係講過同一番說話。工程計界選委會都係咁嘅樣,其他界別嘅選委係乜嘢樣,大概不問可知。

15423496_10155870233338018_327159223_n

到最後仲派一張 bingo 卡畀我哋添,話記住跟張卡嘅號碼入去投票喎。 哈哈哈,連阿婆掌心雷都出埋。不過唔緊要,都真係啱用,唔該曬。

望住你哋個樣同號碼,我知道點樣投架喇。

 

文:小小工程師

啱睇就Like埋我地個Facebook專頁

歡迎各位讀者踴躍投稿,來稿請電郵至 info@menjap.com

Leave a Comment

Your email address will not be published. Required fields are marked *