同你一齊,就算行超市都覺得好幸福

同你一齊,就算行超市都覺得好幸福

「平安夜~升仙夜~你諗住同女友去邊度慶祝呀?」死黨 Ricky 說。
「無呀,我哋都無特別諗去邊,可能行工展會掛。」Mike 說。
「吓,咁無聊,聖誕大餐呢?唔好話我知你未 book 位呀?」Ricky 說。
「無 book 呀,我女友話千其唔好食聖誕大餐,嘥錢。」Mike 說。
「妖!知你女友最好喇,又曬命!」Ricky 說。
「係問我我先講咋喎。」Mike 得戚地說。

十一月開始便是公司 peak season 的開始,所以 Mike 一直都忙到出煙,有時零晨才下班,長期嚴重睡眠不足。捱了一個多月,終於捱到放聖誕假,可以睡到自然醒,充充電。既然已忙到沒時間休息,那又何來有時間買聖誕禮物和計劃聖誕節目?幸好他和女友一直沒有買聖誕禮物的習慣,因為買禮物對男人來說真的很頭痛。至於聖誕大餐,女友以往也有固定標準,就是只可選沒有聖誕大餐的餐廳,如:譚仔、沙嗲王及吉野家打邊爐等,不過今年有點特別,剛好 Mike 的家人去了旅行,所以多了一個選擇,就是在家玩「煮飯仔」。

「你睇吓隻企鵝好似我哋個 BB 咁呀,將來一家三口行超市一定好幸福啫!」女友 Brenda 在超市邊走邊說。
「你唔係話唔生咩?」Mike 一臉認真地說。
「以我地而家嘅經濟狀況,如果租樓住,就算唔擺酒,每個月都可能只係啱啱好,咁仲點養多個 BB?」Brenda 頓時收起笑容認真地說。
「我會再努力啲搵錢,組職我哋嘅家庭。」Mike 說。
「你已經夠努力喇,遲啲再算啦,吖!不如今晚買卡邦尼汁煮意粉,再煎塊靚牛扒,分分鐘仲好食過出面啲聖誕大餐呀!」Brenda 說。
「咁不如買埋牛奶同可可脆片做早餐,再買埋奇異果,有維他命C,你食咗無咁易病。」Mike 說。面對這個男人,Brenda 覺得她已經是世上最幸福的人。

情侶拍拖久了,便會開始覺得不知道做甚麼好,吃飯、看戲、唱K及逛街,不斷重重覆覆。無錯,有時可以去迪士尼、海洋公園或 3D 館等較特別的地方,但這些地方去一次便夠。如果要去旅行的話,又會太奢侈,一年可以去一次已經很幸福。有人可能會開始覺得悶,或是覺得另一半已習慣了既定的相處模式,不會再花心思在自己身上,其實不是,只是大家的愛情開始加入了親情和感情的原素。兩個人一起真的不需要做甚麼經為天人的事,即使是平凡如一起行超市,去商場與聖誕裝飾拍照也可以很幸福。

P.S. 小盛女預祝大家聖誕快樂=D

 

作者 Fb:小盛女

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *