星期日,有票就好去投

星期日,有票就好去投

星期日選委會選舉,關唔關我事?其實關我事架,選委會選出下屆特首架嘛,但我又唔係嗰24萬選民之一。如果閣下有票投,我勸你唔好浪費嗰一票,好多人想投都冇得投架。

有啲人話,CY 唔連任啦,一天都光晒,習大大英明云云……回歸 20 年,尤其過去 5 年,我哋睇到香港的制度係如何脆弱,幾多人願意為自己利益,將香港破壞到天殘地缺:破壞政府、破壞立法會、破壞法治、破壞警隊、破壞教育、破壞郊野公園……CY 固然係表表者,但整個親中派大把一樣嘅人,CY 倒下了,還有千千萬萬個 CY:葉劉、林鄭、李國章、羅范、范婦人、珠姐、張融、粗口大狀、馮萎光、張志剛、邵善波…… 條隊真係長到數都數唔晒。

又有人又話,中央吹和風喎,唔會再揀個 CY 第二掛。中央吹和風,就一早叫佢總結經驗查找不足,唔會等 last 幾個月先逼佢退啦。佢只係將 CY 當棄子,等你哋開心一陣,就由嗰千千萬萬個 CY 第二之中搵一個上嚟,繼續溫水煮蛙。琴晚傳媒又吹風啦,下一屆係葉劉同林鄭呀,係咪和風呀?

過去 5 年,我哋聽過無數次「抗爭只會幫 CY 連任」嘅講法:「你哋佔中幫 CY 連任」「你哋反政改幫 CY 連任」「你哋暴動幫 CY 連任」「你哋投民主派幫 CY 連任」「你哋反釋法幫 CY 連任」「你哋反 DQ 幫 CY 連任」……所有「搞事」都係幫 CY 連任,連遊行示威請願都係幫 CY 連任。咁依家佢有冇連任先。

事實係,香港人要企硬,要堅持發聲,中央先會聽。中央及其爪牙,最叻係得寸進尺,敵退我進,就好似地鐵上搶位坐的阿毛,兩個坐緊嘅人之間得一條空隙,佢都可以一個大屁股坐落去,就係要逼到你頂唔順起身走人。所以一定要繼續企硬,一定要繼續發聲,有得影響選委會,讓真係由市民選出的人直接影響特首選舉,一定要做。

你又點知 CY 唔會因「出現巨變,不得不重新考慮參選特首」?林鄭都講過自己因為「家庭理由」唔會做落去,跟住又華麗轉身過好多次架,記唔記得上屆曾蔭權政府,佢仲做緊發展局長,臨尾嗰陣佢向幾多份報紙講自己想去英國陪老公同啲仔,唔會再做官呀。CY 自己以前都示範過「N 屆唔選」的真正含意啦。

總之,CY 話唔連任,爭取到階段性勝利,開心一陣好啦,下一場仗黎緊架啦。

啱睇就Like埋我地個Facebook專頁

曾於香港,美國,英國就讀大學,比較政治碩士學歷。現為傳媒工作者。取名”假才子”是因為現在潮流興才子才女,但又沒有人敢承認自己是假大空的偽才子才女,所以自己先行澄清。如果文章內容不好就還請見諒,畢竟我不是個正牌的才子。

Leave a Comment

Your email address will not be published. Required fields are marked *