薯片叔叔與課金港豬,你哋做乜鳩姐?

薯片叔叔與課金港豬,你哋做乜鳩姐?

老老竇竇,知道薯片叔叔搞埋啲咩眾籌選舉經費,真係聽完嚇一跳,然後得啖笑。堂堂一個前財政司司長,特首候選人,竟然面皮厚到要同香港市民籌經費,仲要係Facebook講:「我不是一個人走出來宣布參選,而是要向全港七百三十五萬市民發出一份邀請,讓我們一起努力,令香港變得更好。你們的支持,將會是我競選和當選後有效施政的最大動力。」,呢段說話真係難聽過講粗口囉!

唔知薯片叔叔到底訓撚醒未,香港人就有七百幾萬喇,但有得選嘅只係得一千二百個,連公民提名都未有,都莫講話薯片叔叔連公開爭取公民提名都未講過,連一份似樣啲嘅政鋼都未有,指下個鼻就想香港人比錢佢洗?憑乜先?淋病就送錢比乞衣,佢就把心一橫自己做埋乞衣,攞正牌嘅大眾乞衣。好喇,到比人批評佢同香港人乞食,就話自己唔係唔夠錢用,係想比市民表達支持自己嘅意願,真係多撚謝,講到尾,佢都係要錢姐,明知你班香港人無得投票架喇,搞壇眾籌掠埋你哋水,一石二鳥啦。

正當我以為一向冰雪聰明嘅香港人唔會中計,薯片叔叔今次食硬白果之際,就殺出咗一群課金港豬,令我明白到我實在太高估呢班香港人,呀唔係,係香港豬!有腦嘅都知,係今時今日香港嘅小圈子選舉制度入面,邊個做特首,結果都係一鳩樣,唔會發到圍。我打個比喻,玩網上遊戲課金,都起碼買到啲靚裝備呀,有實際用途;課金比薯片叔叔,輸咗固然之咩都無,贏咗咪講句「多謝大家支持」囉,係中共魔掌下,佢會做到啲咩好事呢?更何況薯片叔叔公開講話要跟住人大831框架去發展,係一個唔公義嘅制度下,無論點做都係唔公義架啦,港豬們唔係以為課完金,佢真係贏到就可以解決問題下話?對中共絲毫無損喎。

更可怕嘅係,好多課金港豬係抱住自己捐左錢就當參與過呢場選舉嘅心態去做呢件事,喂呀哥,唔好咁得過且過得唔得呀?要爭取真普選,要爭取公民提名果陣又唔見咁齊心?明知係「lessevil」都要撐,咁同袋住先又有咩分別?我感覺只係一場圍爐捐錢嘅活動,詳情唔講咁多,可以自行去薯片叔叔Facebook睇留言,識睇一定係睇留言,不過溫馨提示,唔好翻白眼,因為正常人永遠唔會理解到課金港豬的邏輯。

最後想帶出一點,捐錢唔係問題,重點係有無意義。薯片叔叔玩眾籌,即係捐錢比有錢人,仲有唔會有回報,咁捐嚟做乜鳩?捐比深水埗明哥派飯盒做善事唔好?捐比拍《點五步》班無糧出嘅演員唔好(話時話,而家都唔出知有糧出未)?捐比香港運動員支持運動發展唔好?捐比牛頭角大火英勇殉職嘅消防員唔好?

呢個時候,我只係諗到《妳太善良》嘅一句歌詞,「受騙的那個比騙徒更混帳」,無補充。

啱睇就Like埋我地個Facebook專頁

廢青一名,醉心填詞,欣賞林夕老師的細膩感情,喜愛方文山老師的詩情畫意。以字發聲,月旦春秋。不想在沉默中滅亡,深信堅持才有希望。

Leave a Comment

Your email address will not be published. Required fields are marked *