雲尼亞里話你知:腦細無情起上黎話知你有咩功勞

雲尼亞里話你知:腦細無情起上黎話知你有咩功勞

腦細無情起上黎,真係唔會同你念舊情講咩仁義道德,你睇李斯特城(李城)張自己個冠軍領隊雲尼亞里解雇就知道,唔理你點為公司盡心盡力,肝腦塗地,幫球會爆大冷歷史性贏得英超冠軍,名留青史,中間立過幾多個汗馬功勞。

商業社會,人人睇錢份上,唔會同你講交情,公司左一句「長遠利益放在各種個人情感之上」,右一句「必須作出改變」,隨時就可以張你人頭落地、身首異處、五馬分屍……今日你係公司大恩人,幫公司建立百年難得一遇的冠軍功勛,明日成績一差,你就立即成為過街老鼠,慘食無情雞。

雲里亞里今季教李城成績真的完全差嗎?我覺得又唔可以完全咁講,因為球隊雖然英超敗走,但歐聯仍然可以高歌猛進黎到16強,喺資源有限,重點分配之下,已經算有交代。

其實球隊要分心歐聯,仲有本地盃賽,多線作戰,已經唔可以好似上季咁養專處優,保留實力,預備一週一賽,加上球會又無適當補強去強化板凳,導致上季賴以成功嘅反擊戰術完全暴露於人前而不能作太多修改,導致經歷過一季之後,戰鬥力已經完全赤裸於人前,英超各強已經識做針對性部署,應付李城打法,只有離英倫較遠嘅歐聯戰線,因為歐聯球隊未曾同李城有過正面交鋒,李城先可以展露有如上季嘅銳氣。

之但係板凳唔夠深未必就完全係教練一人之錯。其實球會就好似一間餐廳,負責買材料經營店面,教練只係一個廚師,負責張食材煮成一碟碟餸菜,最多偶然反映下食物可以點樣提升品質,可以增加咩小菜增加餐廳板斧,至於餐廳肯唔肯去試去做,廚師無咩話語權。所以球會決策某程度都有錯,因為佢哋決定球會嘅買賣球員政策。你賣得主力球員干堤,就要入返個相類近嘅球員;你多左戰線,就要適當買入實力相干的球員作替補輪換。

細路仔都知嘅道理,點解腦細唔知?佢哋唔係唔知,只係即使做錯都唔會認,而家錯都錯左,唯有搵替死鬼,球隊出左亂子,就當然揾個教練開刀。

不過<<風雲>>有一句名言:「凡事太盡,緣份勢必早盡。」

自己苦果自己食。

如果每一次有問題都搵下屬「祭旗」,天下間以後仲有咩人願意為你賣力拼博? 即使請左下一任領隊,抱住上一任百年一遇嘅冠軍光環仍然被炒的壓力,未上任已經心中驚恐「會唔會成績一唔好又食無情雞?」,自身難保人人自危嘅局面下,恐怕係沉淪嘅開始……

 

Instagram: sharefeeling2015

啱睇就Like埋我地個Facebook專頁

我手寫我心。覺得寫作就像抓癢,不抓當然沒有問題,但是抓到卻是無比快感。Instagram: sharefeeling2015

Leave a Comment

Your email address will not be published. Required fields are marked *