一句辣㷫女朋友

一句辣㷫女朋友

第五位:「我講吓笑咋嘛。」

講笑?唔好笑囉!成日話我咁認真做乜,老老實實我真係唔知你邊句認真邊句玩喎,會唔會你對我嘅感情其實都只係玩玩吓?次次奶咗嘢就話講吓笑,搞到反而我係錯,因為我太認真,真係認真便輸了。

第四位:「你扮到咁靚做乜?」

正所謂女為悅己者容,唔好吓吓以為我扮靚就係出街溝仔先得㗎,講真日日返工都係頹look,有時放假都想執返靚少少同啲姊妹去gathering吓,唔係要同人鬥靚,純粹想自己開心吓,稍為安慰自己:「原來執執佢都仲見得吓人嘅。」同埋女仔係貪靚㗎啦,我唔會想廿幾歲就變黃面婆(即刻諗起家有喜事嘅吳君如),我知,我肥我醜你就夠安全感吖嘛,sorry我諗我做唔到喇。

第三位:「對唔住囉。」

你係對唔住我,唔係對唔住我個「囉」喎,一係你覺得自己無錯就打死都唔好認錯,如果要認就唔該認得好少少。最憎人覺得自己啱晒,人哋講咗一大輪嘢根本一句都聽唔入耳,但係為咗盡快close file同埋扮晒偉大咁當讓咗步就講句咁嘅嘢出嚟,其實只會令人更加嬲。有時唔認同咪話唔認同囉,唔係一定要是但一方屈服先叫解決咗完咗,而且每個人嘅性格同價值觀都唔同,千其唔好諗住要對方改變。

第二位:「唔得/ 唔準去/ 唔可以。」

你係我邊個先?我阿爸阿媽都未咁管我啦,我又唔係去做犯法嘢,同埋態度點解要咁強硬呢?你咁講即係無商量嘅餘地啦,你都未了解清楚就禁我聲,無言論自由,無人身自由,你唔係格雷呀大佬,你叫我跪低我係唔會跪㗎。(明就明,唔明就唔明)如果有啲嘢真係唔想對方做咪傾囉,吓吓一嘢ban落嚟係想點先?

第一位:「又嬲。」

呢句真係好經典,十個男人講咗九個都會同女友鬧交,至於第十個,就係會打交。如果想增強呢句嘢嘅威力亦都非常簡單,只需要喺其他人同女友一齊在場嘅時候講(女性朋友效果更佳),一定可以令女友核爆,因為咁樣做即係將你女朋友小氣、刁蠻任性同公主病嘅缺點話畀全世界知兼且表達出你對女友嘅不滿,好簡單,即係落佢面。當然醒目嘅女人係會喺其他人離開之後先會爆,即場大多數表面都只係會笑笑口話:「哈哈,邊有嬲呢,傻嘅。」

其實我真係好唔明點解男人咁鍾意講呢兩個字,呢兩個字嘅作用除咗火上加油之外,其實係零意思。女人聽到呢句,係會由無嬲變有嬲(覺得你屈佢),有嬲變極嬲(即係話我小氣啦),仲要有啲男人驚死唔夠激係會講幾次「又嬲」,於是個女人就極極極嬲,唔好問點解會咁,你就當係公式咁背咗佢:又嬲+無嬲=有嬲;又嬲+有嬲=極嬲;又嬲x2+極嬲=極極嬲,睇到呢度係咪覺得好很煩唔想再背?咁唔該你唔好再講呢兩個字喇,除非你想聊交嗌啦。

兩個人拍拖,鬧交係正常不過嘅事,亦無話一定係衰嘢嚟,會破壞大家嘅關係,其實只要處理得好,係會令大家更加了解對方,反而成世人都未嗌過交嗰啲情況最令人擔心,因為好有機會係是但一方死忍扮無嘢,積埋積埋啲不滿於是一爆就好大劑。不過點都好,以上呢五句說話最好就唔好再講喇,無謂啦。

P.S. 其實仲有好多例子,不過寫住呢五句先,大家又有無咩可以開心 SHARE?

小盛女

image source 

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *