美容院五大乞人憎行為

美容院五大乞人憎行為

第五位 – 等到花兒也謝了

明明 book咗七點,準時到都仲係要等,好喇等完一輪終於有得入房,換晒衫開少少門,再瞓上床,又係得個等字。其實要等都同我單聲等我有心理準備吖,我試過真係瞓喺度半粒鐘都無人理,奈何已經換咗衫又唔方便出去嗌人,真係除了等,還是等。嘈佢點解要等咁耐,例牌都係話唔好意思呀今日好忙,大佬你有邊日係唔忙?唔夠人就唔好接咁多booking啦,雖然我唔係秒秒鐘幾廿萬上落,但係打工仔嘅私人時間一樣係好重要㗎!

第四位 – 隨時隨地開你門

啲顧問隨時隨地都會開你門,一係入嚟 sell你,一係 Check機或借機,又或者係唔小心開錯,總之有千其百怪嘅原因開你門。有次個美容師話太熱要開少少門,大佬我做緊全身按摩喎,間嘢有男客人㗎喎,我梗係打死都唔制啦癡癡哋線!其實如果係做緊facial我都算,但係做緊全身按摩赤裸裸你都開門走入嚟會唔會過份咗啲呢?最賤係入嚟sell你嗰啲,你唔join佢就唔走,真係勁想大巴大巴車埋去!

第三位 – 永遠 Full booking

有間美容院十次有九次我都book唔到,次次都話full咗,最初我以為我啲時間真係太難就,後嚟我試過話星期一至四嘅七點後,星期六日全日,佢都夠膽死話成個月full晒!OK fine,咁我再約定下個月囉,點知佢竟然話只可以提早一個月book。有次我好神奇咁book到,咁梗係諗住再book多日,點知佢話每個人只可以 book一次,做完先可以再book,後來我幫個sales買咗支保濕精華,佢話幫我 book 埋下次幾時嚟,仲話我連book四個星期都無問題,我終於都知點解之前我 book 極都 book 唔到。

第二位 – 生手扮熟手

要遇到好嘅美容師其實唔係咁易,又要手勢好又要唔好太 hard sell,所以遇到好嘅通常都會 mark 住,次次都搵返佢。好嘢當然多人爭,有幾次我明明 mark 咗某個美容師但到頭來無問過我就換咗第二個入嚟,仲要係生手,針清痛得嚟又清唔乾淨,一係就細細力掂吓就算,修眉又修到我損咗,按肩頸又按唔啱位,最慘係肉隨砧板上,點都要完成個療程先可以投訴,又唔可以即時發脾氣,因為塊面喺佢手上。好多美容院試做嘅時候都會畀個最好好手勢嘅美容師你,買咗plan之後就畀啲生手嘅你。唉,本身我有個做開嘅美容師,可惜佢已經變咗顧問,我又要再搵過另一個Miss Right。

第一位 – Sell你sell到天荒地老

去得美容院預咗畀人sell,我知,但真係好煩囉。佢哋會用盡唔同方法sell你,最㷫係做完療程捉你入房,話就話簽名,其實係sell你,同傳銷差唔多。以下為模擬對話,如有雷同,實屬不幸。

「你啲皮膚水潤咗好多呀,暗粒又淡咗,做咗一次就有咁嘅功效喇!有無諗住買返幾次呀?」(讚美式)
「唔使喇,我喺其他美容院嗰啲都未用晒。」
「點同呢!我哋做得好好多!而且你再唔搞吓你啲皮膚就會越來越多暗粒同凹凸洞,好似月球表面咁㗎喇!」(恐嚇式)
「我趕時間,真係唔使喇。」
「我今日未開單呀,幫吓手啦,求吓你拜吓你啦!同埋真係為你好㗎咋!」(扮慘式)
「我無錢呀,失業。」
「可以分期㗎嘛,一係買少啲次數囉,食少餐飯都喺度啦。」(分期付款式)
「我用晒其他美容院嗰啲再算啦。」
「遲啲無呢個優惠㗎喇,得返今日咋。」(限時式)
「我真係唔需要。」
「原價要成萬蚊㗎,而家新店開張優惠半價,真係好抵㗎,就咁啦,買十次。」(割價式)
「我都話唔需要!」
「點解唔買呀?真係好抵喎,你有咩要考慮?價錢?次數?美容師做得唔好?」(唔理你up乜照sell式)
「總之唔需要!」
「真係好啱你㗎呢隻facial,再唔係買八次啦,再送多一次按摩畀你!」(送禮式)
「Er…咁可唔可以再送多次肚燭?」
「好啦,見係你咋,就咁啦,買八次,即刻幫你開單!」

就係咁,小妹又唔見咗幾千銀。其實好多時我都會畀人sell到好燥底,發晒脾氣,係爭在未爆粗,但到最後我都會屈服,因為不停畀人疲勞轟炸真係好難受,加上有時約咗人,為咗可以快啲走唯有買plan。只怪自己無用,企得唔夠硬,於是越買越多,唯一慶幸嘅係呢度大部分美容師同按摩師啲手勢都唔錯,但係不停畀人sell真係好難頂!

P.S. 現跪求唔 sell 人嘅美容院,我真係好想脫離而家呢個地獄呀!

小盛女

圖片來源:nextmedia
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *