肉【二】

肉【二】

張建生用一輪「以人為本,救濟世人」等等廢話演講,得到在場嘅嘉賓如雷貫耳嘅掌聲,我只係感興趣,到底佢今次有咩令人震撼嘅科技,恨不得要咁高調地推廣。

「各位,今日嘅食物岩唔岩胃口呀?」

我馬上注視我身後嘅個盤燒雞。 唔止係我,在場好多人感到疑惑,到底頭先食咗乜嘢落肚?

張建生向佢身邊個穿白袍男人點頭,突然場邊嘅布幕都拉開。

一座座巨型嘅玻璃圓柱體入面,注滿咗淺黃色嘅液體,而入面係一隻隻動物-豬,牛,雞,鴨。

「我同大家介紹!呢個係黑影科技集團嘅最新研發 - 環保肉!」

在場有唔少人一聽之後,發生自己頭先食嘅嘢就係浸係呢啲液體入面一隻隻唔知生定死嘅動物。有人面色一浸,有人立即作嘔,但有趣嘅係反而有唔少人覺得無咩問題。

我相信其一種就係呢班人根本就係知情,例如個班富豪咁;而另一種就好似我呢款,肉就係肉,無壞無臭,有咩問題?作嘔個班人,只係偽善心作祟,睇唔慣自己桌上嘅美食,係由一隻隻小動物身上割落嚟。

張建生聰明絕頂,從佢冷靜嘅笑容已經知道呢一幕係佢精心安排,個位白袍男人隨即上前講解:

「各位好,我係馬江博士,係呢次環保肉計劃嘅負責人。請大家放心,剛才大家食嘅美食,絕對安全而且比起過去舊式養殖業所製造出黎嘅肉,更環保,成本更低,而且更人道。」

人同羊群好相似,一旦見到啲比較有魅力嘅人做一件事,自己嘅思考就慢慢停落黎,隨波逐流,為咗追求個份虛榮或者認同,就唔會再批判呢件事到底係咪戇居。

只見個班富豪仍然食緊個堆「環保肉」嘅製成品,個個食得津津有味,頭先個班作嘔完嘅白痴,就變得安心。

到底個班富豪係咪食緊「環保肉」?定係班富豪對張建生嘅產品咁有信心?唔知,但我可以肯定絕對係張建生計謀之一。

張建生個份自信嘅笑容,同富豪們淡定嘅食相,好快全場嘅氣氛變返平和,而馬博士亦開始繼續講話。

眾人面出現一個投射影像,係關於養殖業嘅片段
「其實大家都知道我地食物消費一直都係好龐大,為咗滿足今時今日社會嘅需求,養殖業係相當重要但偏偏佢所產生嘅問題亦令我地好困擾。
當中佢所產生嘅溫室氣體,同埋佔用地方對地球嘅環境造成影響,相信在位咁多位專業界別嘅朋友,我唔需要多講大家都好清楚。」

「所以早係二十多年,有好多環保團體開始提倡素食而低減對因為養殖業而對地球嘅損害,但我地睇下呢幅圖。」

「事實係,過去呢二十多年,我地對肉類嘅需求一直都係有增無減,所以呢個亦係我地開發環保肉計劃嘅主要原因。」

環保呢個命題似乎已經打中咗在場一部份人士嘅興趣,接落黎就係解決問題嘅方法,呢個樣已經令到一個班瘋狂科學家急不及待想知道。

「正如大家所見,我地將養殖業嘅牲口,放入一個個獨立嘅培養液而所需要嘅維生食物就會直接經由管道進入牲口嘅體內。」

我眼前所見令我諗起「龍珠」同「人形蜈蚣」,做科學記者其實最期待嘅就係呢一刻,個種將漫畫電影世界嘅幻想出現係面前嘅興奮。唔止係我,在場好多人已經議論紛紛。

「或者我簡單講解下呢個系統嘅原理。」馬博士舉起雙手,示意大家安靜。

「肉,就係由蛋白質,脂肪以及其他維生素,礦物質所組成,而唔同嘅動物因為佢地嘅基因同生活習慣,食物,影響佢地所製造出黎嘅肌肉而有所不同。簡單啲黎講,佢地係各種唔同嘅基因方程式,只要明白呢條方程式,再按照佢地維生需求而投入各種食物,佢就可以產生「肉」 - 亦係即係我地嘅食物。」

「大家眼前所見嘅牲口,由佢出生個一刻我地就已經將佢地放入培養液入面。食物同維生素,氧氣等等都會由培養液進入佢地體內。由於佢地唔會接觸到自然世界,佢地亦唔會有任何疾病同感染,所有嘅生產都會由專案人員負責。

呢個絕對係新世界所需要嘅科技,我地唔需要再擔心食物供應不足,或者因為畜牧業而對環境嘅影響,更重要嘅係可以為我地人類提供健康無害嘅食物來源,世界會因為「環保肉計劃」而改變,我地唔再需要擔心禽流感,瘋牛症等等!」

台下嘅富豪同部份嘅科學家已經忍唔住拍手掌,可見得張建生對呢個計劃嘅前期功夫做得十分足夠。

但公開場合,少不免會有人走黎「挑機」。場內一名記者就馬上向馬博士提問:

「馬博士,我係高端科學雜誌記者,我姓陳。你地口口聲聲話「環保肉計劃」係為環保而設,但你知唔知道生產一鎊牛肉係需要超過三十鎊嘅大豆為食物,你地只係發明咗一個科學農場,無疑呢個農場可能會減少土地嘅使用或者疾病嘅傳播,但我仍然睇唔出有咩對環保嘅幫助。」

馬博士眼神轉向張建生,似乎想有事想得到張建生嘅同意,張建生輕輕點頭,馬博士就叫大家注視場地中央,一台由地板升起的巨大機器。

一台活生生而血腥嘅機器。

 

Photo: internet

作者 FB :吹水皇的後花園

啱睇就Like埋我地個Facebook專頁

港豬廢青一名
只想吃喝玩樂不勞而獲 不求踏實地但求公屋有期

Leave a Comment

Your email address will not be published. Required fields are marked *