肉【五】

肉【五】

由當日千夫所指,到兩年後今日每個市場都有「環保肉」嘅產品,可見資訊越發達大家嘅記憶力就慢慢下降。

每日不斷有大事發生,民眾好快就忘記之前所發生嘅事,畢竟生活先係最重要。

而我亦由一介「賤貨」「臭雞」變成黑影集團所推廣出嚟一個智慧型,有著與別不同嘅價值觀,前瞻性強,極受大眾歡迎嘅科學顧問。

由每日工作十多個小時嘅低下層,轉身一變成為一個科學界同網絡上嘅明星,我嘅生活有著180度嘅轉變,的確令我興奮!但仍然無忘記過自己作為記者嘅天職。

以我了解張建生為人,「環保肉」應該並唔會咁簡單,呢一步亦係令我可以進入黑影集團內部嘅重要關鍵。

所謂嘅科學顧問,其實只係一個公關人物,今時今日以我嘅名氣同黑影集團影響力,只要我向媒體簡單解說一樣普通嘅新產品,佢立即就會升值十倍;護膚品,食物,珠寶等等,我享受嘅嘢可以話係我前半生夢寐以求嘅事!

而我同張建生嘅建立嘅合作關係越黎越緊密,我開始了解呢個男人更多。

「世界每日都會變,亦都要變,繼續留戀個種道德價值觀只會令我地停滯不前。哥白尼當日何嘗唔係做咗啲令世人側目嘅事咩?」

所謂嘅慈善晚宴,近數個月已經我已經出席過無數次,由滿心期待到依家我已經恨不得馬上離開,難怪電影總係描述一啲有錢人要係呢種晚宴入面離群獨處,走出露台到飲杯悶酒。

我著住一套深紫色晚裝,就係坐露台嘅一張梳發上面。聽住對面呢個世界首富講嘅說話,手上嘅香檳,我望唔透。

「張生,你係咪後悔過自己做過嘅嘢?」

「黃小姐,你似乎仍然未戒得甩你做記者嘅提問方法?」張建生將香檳慢慢放低。「我一定有做過錯事壞事,但我從來唔後悔。係我細個嘅時候,我好鍾意睇啲乜乜戰隊嘅卡通片,但我每次好奇怪,點解啲壞人嘅諗法係咁完美但偏偏就係一樣為世不容嘅事?」

「吓?」我忍唔住自己內心嘅驚訝,一個世界首富一個影響全球嘅人,所作嘅決定竟然係來自卡通片?

「多數啲壞人嘅目的都係好明確,好想改變世界,而同時佢地好清楚為住一個偉大嘅理想,做啲壞事係必然。就算你睇好多革命家,思想家,甚至領袖同樣都係為咗目的可以不擇手段!正因此佢不顧面子名聲,先至有今日呢個世界!」

理論荒謬但偏偏講得好實在,試問有邊個偉人唔係滿手鮮血?就當佢係為自己權力地位著想,佢所帶比呢個世界嘅嘢總比個班所謂道德份子為多。

革新自然就會有人反對,歷史教育我地嘅只有成王敗寇。我面前呢個人到底係混世魔王定係救世主,我真係開始有啲混亂。

其實潛意識內認同緊呢件事,呢個人,我好清楚。

我份記者天職被呢個世界嘅奢侈同五光十色,以及呢種咁新鮮脫俗嘅諗法,慢慢侵蝕。尋找真相嘅動力係來自一份係正義感定係我成功嘅踏腳石,我變得動搖。

我將自己手上紅酒都一飲而盡,好讓自己逃避繼續掙扎係呢個問題上。有錢嘅生活真係好,至少你仍然有地方可以逃避,可以用其他野去麻醉自己。

「怡,我覺得你好陌生。」我男朋友陳志本發咗一句短信比我。

「本。。。。。」我打完,又刪除,再打又刪除。

人真係會變,但慶幸嘅變個個係我,而唔係呀本;我知道呢段感情已經唔可以繼續落去,我遲遲未講,只係諗緊一個方法盡量唔令到呀本唔好會難受,但呢一刻我好清楚點講個結果都係一樣。
我只係想繼續逃避,逃避自己變成一個變心嘅人。

我繼續望住自己部手提電話,我只係希望呀本下一句就係「分手。」

「typing……」

由20歲個年拍拖到依家六年,呀本係個絕對善良嘅人,相信呢一刻佢都係等緊我開口。

最後我決定將電話收起,再次行入舞會入面,享受我嘅名氣帶黎比我奢華生活同眾人對我嘅仰慕。

呢一晚我享受嘅魚水之歡,酒肉聲色只係我明日面臨痛苦嘅最後安慰。

 

Photo: internet

作者 FB :吹水皇的後花園

啱睇就Like埋我地個Facebook專頁

港豬廢青一名
只想吃喝玩樂不勞而獲 不求踏實地但求公屋有期

Leave a Comment

Your email address will not be published. Required fields are marked *