面試攻略 – 領袖的氣場

面試攻略 – 領袖的氣場

呢個世界有兩種領袖,一種係有魄力和視野,令你想跟佢做野;另一種係安靜但能幹,你知佢做得野,個人冇咁chur,跟得過既老闆。其他得個講字既,庸人一名既路線,通常就係大家平日放工爆鬧果種。

雖然要求高,但你會學到多野。好老闆難求,因為成功人士其實唔多;天生既領袖也唔多。知道左呢一點,咁同面試有咩關係呢?

好多文章書藉都講面試既第一印像何等寶貴。因為果一下已經表明左老闆鐘唔鐘意你嘞。我都幾同意,因為第六感呢家野,好易左右一個人既客觀睇法。佢唔鐘意你,你講乜都無謂。

當然第一印象衰左,都唔可以氣餒,move on quickly,仲有得挽救既。

第一印象要點建立呢,就係一份氣場;氣場點建立呢,就在於你認為自己係一個點既領袖。一如文首所說,好領袖有兩種,呢d qualities 應該係做junior既時候就展示到,因為好領袖特質唔係突然係要做老闆高層果層先爆發既。

人望高處,如果你想見一份只做、冇咩晉昇機會同job satisfaction 既工,咁你大可不必閱讀此文。如果你想跟好老闆,闖天涯,一路升職,咁你要見一份個老闆會欣賞你既潛在力量(potential) 既工。單純因為你見緊份junior工,而只表現到你係一個”do-er”而表現唔到你係一個”manager”或”leader”,咁你就只會得個做字。

呢一份氣場點展示呢?咁你就要了解下自己係外向型定內向型既人。

外向型既人因為生下來就好多野講,對好多事都有意見,有時反而會急得滯;所有以下兩點。

1. 多聆聽

因為太多野講,所以反而應該更多表現聆聽的能力。好似聽完條問題、再諗一諗先回答,咁樣老闆都會覺得同你做野好smooth。無理由個下屬係咁搶住講野,反而搞到好似好 chur 咁架。

2. 放緩節奏

放緩節奏對於回答既條理也有好大幫助。性格外向既人通常都口直心快,唔覺意答左d唔應該講既野(好似你考試肥左佬因為懶惰之類應該修飾下既答案),咁就唔好啦。慢慢講,清晰咁講,對聽果個都好d啦,順耳d丫嘛。

而內向型既話,其實係要自信一d。最近睇左本書叫 <Quiet>,係研究內向性格對社會和經濟的重要性。當中提到一個外向既老闆,因為腦電波(wavelength)同內向型唔夾,所以甚至留意唔到內向型人非常有用而獨到既意見添。

其實內向既人思考條理清晰,對其他人有包容心,願意花時間面對和解決問題,這些都係一個好同事好領袖既表現黎!要係面試期間表現出黎,我有兩個實質既建議。

1. 眼神堅定

有好多書都教人要有眼神接觸,但其實唔駛係咁望住人既,但講到重點既時候,就一定要堅定咁望住對方,表達一種「我在告訴你重點,你必須聽清楚」既氣場。例如講你 team working既例子,你提到自己點樣解決問題既果一刻,就應該望住面試官;同樣講到自己做左呢件事,令到個 project大成功既時候都應該有眼神接觸,否則就會好似老作、又冇乜說服力咁囉。

2. 聲線平穩自信

有冇遇過係 assessment centre 搶人講野既 candidate? 佢地係搶人講野果刻已經被 foul左出局了。要表達一個 point,單靠快同串係冇用既,一來冇禮貌、二來好易會口不摘言。

記住面試既時間係展示公司既誠意。公司肯花錢同時間去了解你,你唔需要覺得打擾到人,你只需要make sure 佢地覺得玀呢一個鐘出黎見你好值得、有意思就得。

所以提高少少比你平日蚊滋蚊滋既聲線吧!配合眼神接觸,和好好預備左既答案,平穩而自信地發表言論即可。

冇錯!一剎那要你係面試房入面咁做係難既,因此 prep 面試既時候唔至要prep個答案,仲要prep講個答案出黎,先知會唔會太長、有冇講到重點,同埋語氣、眼神等等。唔好以為其他人生下來就能言善道,好多都係練出黎的!

希望可以幫到大家!面試加油!

啱睇就Like埋我地個Facebook專頁
直抒胸臆,隨筆愛情、工作、生活,細訴我這條魚乾老少女在倫敦奮鬥的點滴。

Leave a Comment

Your email address will not be published. Required fields are marked *