香港人最錯,就係癡心錯付

香港人最錯,就係癡心錯付

我心向明月,明月照溝渠。你估捉錯用神,付錯真心,呢啲男男女女先至有咩,其實喺好多事情上面都會癡心枉傾注㗎喎。譬如話,阿媽煮咗飯一心諗住你返嚟食,點知你原來當日即興約咗人,阿媽一番心血就咁付諸流水啦。又例如,你畀心機勤力工作,一心諗住老細會升你啦啩,過完年,突然一個陌生人空降喺原本空蕩蕩嘅房仔,你心諗,冇職升,都有人工加啩?點知,連人工都冇得你加。

諗錯隔離呢樣嘢,人人都有試過嘅。香港人啦喎,就最興㗎啦,阿邊個為我哋講嘢,佢一定係幫我哋㗎!──突然失咗憶原來阿邊個幫過某某財團,又或者喺某啲議題上投咗反對、棄權票,導致惡法通過。所謂爭取真普選、雙普選,爭取咗幾多年?畀十年你啦好未?

嗰啲主流政黨,除咗落得販民嘅罪名之外,重有咩實際建樹呢?香港人成日覺得,投咗票,就克盡己責,做咗嘢㗎啦,乜議員、物議員會幫我哋搞㗎啦,之後坐喺度歎世界,乜都唔使做唔使理咁款。又唔諗下,有一班人為香港付出咗幾多,幾乎係用一生嚟交換㗎。所以你話見到義士入獄、政黨面臨咩危機,心裡面其實得嗰句:唉,都唔知幫你班香港人做咩。但係轉念一想,唔係為咗香港,邊個要入地獄呢?助人自助,其實,大家講到尾都係熱愛呢片土地,不過真正熱愛、肯付出嘅人唔多,多數都係想坐享其成。

就算付出極微,香港人都唔會願意做,唔講政治咁大範疇啊,你見到有人創作用心、表演用心,會唔會讚佢一讚,分一分享,留一留言鼓勵?唔會啊,大家只會挑剔:出咁慢㗎;吓,今日又冇啦?垃圾寫得勁差!啲畫咁差就唔好獻世啦……諸如此類。

質素高低、作品優劣,條界線喺香港越來越模糊,之前睇過相關嘅資料,話香港喺九七前有唔少著名設計師係外國名牌嘅首席設計師。隨住粗疏、求其、是但,兼之風氣轉變、文化入侵,香港人慢慢變得審美能力低下,呢個城市再無美感,倒模式嘅大商場,一式一樣嘅街道……不停拆卸歷史建築,一步、一步咁摧毀自己嘅城市、消除自己嘅歷史。

我諗好多人覺得自己一生裡面最錯嘅事,就係癡心錯付。

啱睇就Like埋我地個Facebook專頁
清君,過氣酸臭作者,咩都寫下,希望娛樂到人,又啟發到人,簡稱渡己渡人。

Leave a Comment

Your email address will not be published. Required fields are marked *