一句辣㷫男朋友

一句辣㷫男朋友

第五位:「阿邊個好靚仔呀!又大隻!」

無論你讚緊嘅係韓星oppa,定係某個男性朋友,甚至係街上嘅路人,都一定係死罪。首先𥄫仔已經係唔啱,仲要光明正大咁讚,其實偷偷哋望吓咪算囉,唔洗拎出嚟討論嘅。另一半喺你心目中應該永遠係最好,靚仔大隻呢啲留返同姊妹一齊先討論啦。

第四位:「Sorry我今日M到。」

成日無理取鬧發晒癲咁狂掉手鎦彈,炸到人傷晒之後無啦啦講句:「Sorry我今日M到。」咁就想算數?好過份啫,M到唔係大哂㗎!仲有男人係無M到呢個藉口,咁樣公平咩?

第三位:「我講你都唔明。」

你唔講出嚟男人點會明呢?你都未開始講就判咗人哋一定唔明,唔畀機會人去了解你,想點先?男人唔係X-Men入面個X博士,望住你指吓自己個腦就知你諗緊乜,男人係無超能力㗎大佬。

第二位:「你唔好再咁幼稚啦。」

無論咩年紀嘅男人,心裡面其實都仍然係一個大男孩。傳統社會定型,男人要負起養家嘅責任,永遠要做強者,於是喺工作、感情、家庭上都承受住好大壓力,所以放工返屋企或者放假嘅時候就會天昏地暗,完全放縱咁打機或者睇波,又或者用幾千蚊去買figure、LEGO、相機等,當佢哋同你分享快樂嘅時候,你竟然一盤冷水照頭淋,係人都著火啦!其實有時保持童心,可能都係件唔錯嘅事呢。

第一位:「我覺得同你一齊睇唔到將來。」

你估你係先知咩,將來係未知之數,無人會睇得到,你咁樣講即係睇死我無發達啫,未審先判,其實你嫌我窮,無車無樓咪直接講囉,點解要講埋啲咁虛無嘅嘢呢?

其實有啲說話講咗根本無意思,只係聊交嗌,咁不如講多啲氹對方開心嘅說話仲好啦喂!

P.S.其實我都唔太了解男人,所以諗住阿Mike可以畀啲idea我寫呢篇文,點知佢一句都嗡唔出,又或者唔敢講,咁我唯有自己亂寫啦,其實到底男人聽到女朋友講咩會最嬲?

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *