令人震驚的可怕真相,九十人突然剩二十人!

令人震驚的可怕真相,九十人突然剩二十人!

你知唔知,點解端要炒人?我就知點解。

端傳媒裁員,係因為出現「資金危機」(Well我唔知咩叫資金危機,可能我太跟唔上時代),然後好似話有人怨劣幣驅逐良幣,讀者唔畀錢之類乜乜物物……

經營一檔生意,點樣促使顧客畀錢你呢?假設開嘅係食肆,首先要留意舖租、地段、人流情況等等,再要留意競爭對手多寡,點樣制訂商業策略出奇制勝。如果你做新派嘢,想招攬年輕食客,但你揀個地區係老人家為多,係咪又應該歸咎,啲顧客唔識食囉!

冇跟開呢啲數碼媒體,佢哋做嘅報道夠唔夠廣、夠唔夠深,我難以評論,但缺乏資金的確做唔到任何事,唔單只報道,你連飯都冇得食啦。

我明白付出咗心血,但冇人睇,結果係令人氣餒,因為付出嘅努力同成果,相差太遠。然而一檔傳媒生意,如果僅靠廣告費或刊物收入嚟負擔開支,根本難以達至收支平衡──因為講緊嘅係,你要照顧接近成百人。

於是,一種尚未搵到生意經營模式嘅新媒體難以成為正業,必須開展副業,又或者,以新傳媒呢檔生意為副業,用其他生意去彌補返呢條數。

喺一個經濟唔發達嘅國度,就算你想搞咩媒體、人文科學嘅嘢,都根本無從入手。但點解香港經濟咁發達,媒體都變晒做霉體咁濟?長期受圈養嘅港人,喺精神方面根本追唔上經濟發展嘅急速步伐,你可以話係共業,媒體見點做點做,賺到錢喎、有成績喎,成個產業模式傾側。資訊嘅嘢,大家一窩蜂追某個故仔、某個話題,其他話題呢?大家中伏了,乜乜乜聲音不見了!

當你怨緊大家講謝霆鋒整雞蛋仔、資訊抄嚟抄去、報道根本唔深入唔多元唔國際嘅時候,不妨諗下呢度係邊度?呢度係香港。香港人睇開咩?傾開咩?做開咩?大家有眼睇,如果你要畫份圖表,香港人質素應該係一個三角形咁樣,而而家仍然下滑緊。原因係咩?香港人一向核心價值係搵錢;二嚟,傳媒渲染囉,你要撥亂反正?唔係唔得,但係喺一個大氣候之下,你點樣唔跟遊戲規則玩而闖得出一片天呢?要唔跟而闖出一片天,真係要等運到囉,唔等運到可以點?

冇錯,就係玩爛個遊戲規矩。不停出現同一樣嘢,例如內容農場嘅標題、閪假期嗰啲標籤,久而久之就會玩爛晒,令人對呢啲(虛假)資訊感到怠倦。即係話,逆流而上唔係問題,但你順流而行,做起嘢上嚟事半功倍啊。

重有一樣嘢,啲人話因為安插咗「紅色資本」呢個莫須有罪名畀端,所以端先做唔住,做乜都係錯。唔關事㗎,你睇下香港受攻,咪一樣咁受歡迎。

所以做唔起,咪就係商業策略錯咗囉。你一嚟就賤視(所謂)七百萬港人,要放眼全球華人,當你本身都離晒地、唔夠本土,根紮得唔夠實,即係冇特色啦,咁有冇你都得啦,既然你目標係全球華人,咪去加拿大囉;去台灣囉,再唔係去返中國囉,咩事一定要針對香港人啫而家?

講返開初,點解端要炒人?我知嘅話,我就係端嘅老闆啦。(速逃)

啱睇就Like埋我地個Facebook專頁
清君,過氣酸臭作者,咩都寫下,希望娛樂到人,又啟發到人,簡稱渡己渡人。

Leave a Comment

Your email address will not be published. Required fields are marked *