原來,習慣咗又幾方便

原來,習慣咗又幾方便

「最新一期 『云置居』反應熱烈,現正加推最新一期;上車就要趁早!而尊貴人士特享嘅『靈置居』第二期已經接受申請,價高者得,請從速搶購!」-新一輯政府「靈魂置居易」宣傳廣告片。

唔知幾時開始,香港人已經無能力為自身置業。就喺新生代香港人畢業後無處容身,又一批新力軍要「瞓街當集會」之際,新任市政府大力推出『靈置居』同『云置居』依兩個鼓勵市民將靈魂放上云端嘅「中港通高階云端置業計劃」,實行高貴嘅靈同低賤嘅魂都有機會趕上車,香港人靈魂又有所歸宿:就係「供自己、上云端!」——大大減少社會矛盾之餘,又可以比全香港人一個新希望。

人人都有安身之所,到今日香港終於都可以追上新加玻。的確係一大德政。港政府已經唔似得以前咁弱勢。

而今日,我得以躋身「云置居」第六十二期。本來我係同女友 Dorothy 過嚟辦入住手續嘅,但佢無嚟到。原因係佢好希望我可以正正經經咁買番層樓,而唔係 upload 咗去唔知邊度。我有同佢解釋過家下樓市有幾貴,同埋香港過咗「五十年不變」已經直接改稱「香港市」,所有樓宇都係「有戶藉優先」,香港本地人置業係要比多 20% 首期,我話橫掂返屋企都係上網架啦,平時食好嘢買靚衫咪又係 upload 上網先安樂,點解唔 upload 埋自己上去。

佢無駁落去,淨係話老人家唔鍾意,佢媽子話當陣時就算比人話「八九十後死廢青」最後都憑努力供到層二百呎樓咁話喎。

就係咁我知佢唔會嚟。

諗落都好嘅,本來窮撚就唔應該溝女,一條友隻身闖網路都比較易適應同靈活。

我挺起胸膛、昂首闊步咁走入去已經改建為百層摩天大廈嘅房署大樓,心裡面哼住「昂然踏著前路去」,準備踏入人生嘅另一階段。

「方生你好。」房署職員接過我手上嘅排位飛同個人履歷表,「職業係程式員…… 你係做 I.T. 吓話。」

「喔…… 嚴格上嚟講我係寫 program 嘅。」我有啲尷尬咁答。

「哦,要揼 code 果啲。」房署職員聽完似懂非懂,「咁你好彩呀,因為打code果啲唔係體力勞動工作,所以我哋先儘早安排你上樓,吖唔係,係上線先真。」

我聽到「上線」兩字,已經忍唔住笑意,估唔到今時今日「窮人恩物」竟然係云端上網。

「哈哈,我都無諗過咁快。」

「咁上載云端嘅手續大致完成。如果無問題嘅,方生係度簽個名。」房署職員友善地遞上確認書。

我爽快地簽咗確認書,準備我嘅全新旅程。

「好。方生你喺度坐陣先。我哋要準備上載云端嘅有關程序。」

跟住落嚟就開始有唔同嘅專業人士對我進行關於「云端」嘅講解:包括心理醫生、法律顧問等等……  簡單嚟講就係「移居」前嘅一啲心理準備同規則等。

即係,你就算入咗云端都係要守法、tmr need work (即是返工)咁囉。

聽講解果陣我諗番起一啲都市傳聞:有傳喺「靈、云置居」依兩個大項目推出前,測試階段政府偷偷地搵咗唔少自殺不遂嘅人做云端實驗:器官全部變賣,只抽取腦部上載云端。仲好似話喺云端世界本來係唔駛做嘢架,但後來有發現測試者喺無所事事嘅情況下會陷入嚴重抑鬱嘅情況…… 故此先會有「云端生産、云端工作」依個概念喎!

哈哈,我先唔信呀,呢啲係政府攞嚟叫人專心工作做奴工嘅狡詐手段啫。不過攪一個咁大單嘅 project,就一定係會有唔少不為人知、荒謬絕倫嘅甩漏古怪嘢,有跟開啲大 project 就會明。

喺接近三個鐘頭嘅「云端」講解,聽咗好多次「開頭要時間習慣適應」、「要冷靜面對」、「要遵守規則」、「要增值提高自己生產力」等等,我終於可以上線啦!

佢哋安排我入一間放咗好多儀器同工具嘅手術房,瞓喺一張補牙櫈到,然後幫我注射麻醉劑……

唔知個世界係點嘅呢?好期待……

……

..

.

我係咪到咗。

咦,我應該上線到達「云端」掛。

我發現自己個意識係清醒嘅,望一望下面……

點解…… 我無咗個身!

點解會咁!

我好似玩緊VR咁,只係可以上下左右咁張望,

但我無得郁、唔可以控制自己移動,視野只可以固定咗喺電腦桌面上……

喺我眼前淨係得一堆 icon,上網、工作、消閒……

唔通,所謂嘅「云置居」,就係將人生壓縮做得幾個選項?

我無諗過係咁!點解同政府宣傳有咁大出入!

我想出番去!起碼我有郁動嘅自由!

點算?我要 Log out!

我要離開依度!

我要離開依度!

我要離開依度……

突然間,我感覺個腦好似被注入咗啲嘢咁,我覺得好輕鬆、好舒服……

同時我聽到啲好柔和嘅音樂,好似平時圖書館臨關門播果啲……

……

..

.

係喎,都係時候要揼 code 啦,應該要趁有時間摸熟下個操作……

用腦波操作生活、全天候工作、生活、上網 all-in-one、唔需要修身美顏、唔駛諗放工去邊…… 最重要係,我覺得我同其他人嘅距離近咗:我有好多鄰居,依家我要搵人都好易咗好多。

原來,習慣咗又幾方便。

— 完 —

本篇乃取材自「然後,再沒有人自殺

Photo: http://www.redorbit.com

啱睇就Like埋我地個Facebook專頁
今天想來,以往的稿好像白投了一樣。此後寫的,可能相對離地,但希望更能貼近自己想寫的類型。往日稿,如白投;今日寫,盡自在。

Leave a Comment

Your email address will not be published. Required fields are marked *