慳啲洗又點?慳啲洗就買到樓咩?

慳啲洗又點?慳啲洗就買到樓咩?

最近我開始覺得有啲壓力同煩惱,煩無錢結婚、買樓同生仔,其實無乜特別,都係啲大家都煩緊嘅嘢嚟,然後各方人士都畀咗好多意見我,我又不妨同大家開心share吓。

「結婚平有平結,貴有貴結嘅啫,就咁簽張紙咪得囉!」

你話我港女我都係咁講㗎喇,結婚一生人一次,我真係接受唔到就咁簽張紙就算,起碼都要影返輯結婚相留念啦!至於擺酒,個人覺得係一件十級煩嘅事,要準備一大堆嘢,中間又一定會有好多鬧交位,可以話係自己攞嚟煩,但同時又係一件好開心嘅事,因為最親嘅人同朋友都會嚟祝福你,替你高興(唔熟嘅另計),所以真係好矛盾。

我有諗過旅行結婚就算(可能都唔平),但始終都應該同雙方家長親戚食餐飯,嗰度已經五圍以上,細搞同大搞其實好似差唔多,咁不如索性大搞。仲要我係獨女,即係掌上明珠,雖則父母口話無所謂,但心裡面點都會想個女嫁得好好睇睇吧?可能男友阿Mike比我更了解自己,佢淨係講咗句:「唔擺酒,第時老咗你一定會後悔,然後就怨我。」就完結咗我話旅行結婚呢個話題。

「是但租間屋先,然後結婚生仔,三個人排公屋囉!」

首先而家喺香港租間屋真係一啲都唔平,閒閒哋都萬萬聲,平嘅唔係無,劏房囉,村屋囉。你要諗吓得一份人工,要交租,水電煤費,交通費,飲食費,應酬費,仲要養埋老婆仔女,我真係唔知未來老公仔可以捱到幾耐,而最大嘅問題係每日有150個大陸同胞落嚟香港,佢哋無嘢做,甚至帶埋個小朋友嚟,一到埗就搵社工、區議員幫手,講到有咁慘得咁慘,大佬我點同你鬥呀?排到我一家三口破產或者抑鬱死我都肯定未排到間公屋返嚟啦。

「點都好,求其搵個盤上咗車先,樓價愈升愈快,你儲多年錢都追唔切!」
其實我真係明,即係我一年儲十萬,但係樓價一年升咗幾十萬,我儲嚟都廢,問題係最細嘅樓我都買唔起吖嘛大哥,同埋而家講緊買樓喎,唔係買棵菜喎,我要用晒所有積蓄,即係無限加班換返嚟嘅血汗錢去買,係一個好大嘅決定,點求其買呢,而且我唔係買嚟炒喎,我係自住,唔通梅窩長洲我又買喇喎(雖則都可能買唔起),我都要考慮返地點,配套,同埋一堆其他嘢。

「有仔襯嫩生呀,平有平養,貴有貴養啫。」

鬼唔知阿媽係女人咩,早生個小朋友會聰明啲,媽媽會復原快啲,我夠知啦。咁生完住邊吖?邊度搵錢養佢?即使唔學興趣班唔補習,淨係基本嘢都需要一舊錢啦。又或者我都算係一個有計劃嘅人嚟(如果容許的話),如果無一個穩健嘅經濟狀況同生活嘅地方,簡單啲講即係兩個人都未搞得掂,我係絕對唔會生小朋友,累咗佢又累埋自己,何必呢?

「問阿爸阿媽借首期囉,之後再慢慢還。」

你可以話我哋硬頸,我同阿 Mike 都偏向唔想問父母借太多錢,因為大家都只係生活喺一個好普通嘅家庭,老豆唔係李嘉誠,唔係隨手可以拎幾百個出嚟嗰啲,而且我哋都知道借咗未必有能力還,因為供樓會月月清,而父母係只會愈來愈老,大小毛病會開始出現,係好需要錢旁身。最近有喺手機apps睇過啲樓價,可以用高不可攀嚟形容,所以我哋都覺得無咁大個頭就唔好戴咁大頂帽,暫時都係儲住錢先啦。

其實我都係純粹呻吓,因為灰咗半日之後我發現灰都無用,慳啲使都無用,唔去旅行又點?唔食好嘢又點?就算你唔食唔玩又點?咪又係買唔到樓,與其點都係買唔到樓,不如好好享受人生,一年去一次旅行,放假去食好西,開開心心過每一日咪算囉,反正今日唔知聽日事,諗咁遠有鬼用咩。

image : appledaily
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *