阿叔 Stand His Ground,好波!

阿叔 Stand His Ground,好波!

UA 航班 overbook,有機組人員無位坐。八舊水美金雞水咁多賠償之下,當然無人自願落機。結果竟然用抽籤決定四個乘客無得留低,當中有一個死守座位,最後被強行拖離真金白銀買了飛的客位。事後 CEO 只為 overbooking 道歉,對強行拖走乘客毫無悔意,內部郵件更表示支持員工所為 ,豪情壯語拍得上當年禿鷹「我想話畀大家聽,你地冇做錯到!」

阿叔真金白銀買飛上機,最後慘被拖走,以便騰出坐位予機組人員。(source: foxnews.com)

朋友當中喜歡坐 UA 的,原來沒有,從來都沒有。睇返真身 Facebook,招呼 UA 比招呼老豆老母多,就連本 blog 惜字如金都不吝賞賜版位。事件一出,更惹來一面倒杯葛熱潮。今生不搭 UA,知易行難,須知淪落到要搭 UA 都一定別無選擇,不是飛香港星航國泰爆晒,山窮水盡,就係內陸機剩得 UA 無得揀,壟斷屈機。每次上機前都猶如行刑懸在半空,反思功業因果,前世做共匪,今世坐 UA。自以為被逼搭 UA 慘絕人寰,到最後才發現,還不夠絕望,尚可更絕望:被逼上機之後,仲可以被拖落機。

華文傳媒強調事主為華裔,有意無意畫出一幅黑鬼欺負亞裔連環圖。一時間彷彿全球華人都有苦要訴。但實情係 UA 不仁,視乘客為芻狗,不論膚色人種。只要坐的是窮等 econ,就要捱同樣幾格臭厠所,食一樣的難食飛機餐,睇同一個窒下窒下老遠大電視,對住同一隊對任何人都西口西面的空嬸空伯,沒有誰比誰高尚。美國主流媒體普遍不提事主族裔,不單純係政治政確,而是 UA 垃圾一直係全國共識。在美國,傳統智慧政治宗教最好 off the table 可免則免,取笑侵侵之前亦要小心,唯獨 UA 不怕鬧爆,人人皆曰可殺。

據說事主是位醫生,翌日要趕抵醫院。不過在我眼中,這位叔叔最型的不是醫生,亦不是華裔,而係他秀才遇着兵,仍勇於 stand his ground,真・寸土不讓,真・不遷不拆。周圍乘客亦大聲幫口,出於義憤鬧爆差佬。美國警權也許過大,連飛機拖人走都關佢事,但網絡流傳片段的嘈之巴閉,解釋了美國民權,如何跟黑警暴政保持恐怖平衡。切身處地,新移民如我九成九九九會鵪鶉龜縮,最多拍片。正因如此,一路睇片一路忍不住嗌,阿叔好波!

 

Photo: GOtrip.hk

 

啱睇就Like埋我地個Facebook專頁

香港人在矽谷。從前有個港燦諗住速去速回。有一日,佢發現自己已經 end up 喺灣區 for good。

Leave a Comment

Your email address will not be published. Required fields are marked *