《進擊》【第1回:樹大,招風】

《進擊》【第1回:樹大,招風】

看看手錶,原來已凌晨三點。他走出電視台門口,左手挽著由白變灰的背嚢,右手拿著螢幕已碎得很的iPhone 5。一踏進電視台附近的的士站,他連顧慮有沒有被拒載的時間都沒有,一踏上車就說,「太和邨啊唔該,唔洗駛入去啦。」

車程半個鐘後,司機用左手撥著軚盤上的其中一部Samsung電話⋯⋯「老婆,我做埋呢轉就交更啦,洗唔洗買宵夜過你?」司機的藍芽耳機開得很大聲,他不情願亦聽見他老婆的聲音,
「唔洗啦,返黎記得飲湯,唔好捱夜睇果個咩想咩…知道…真相啦。」
「次次你都記得幫我錄低佢,真係好啦,但係你同我咪一樣,晚晚霸住個電視睇韓劇,唔係星星,就太陽,真係頂你唔順啦!」
「好啦唔講咁多啦,我都要訓啦,聽日約左張師奶睇B1A4演唱會啊。」
「好啦,我就返啦,係咁啦。」

差不多在車上睡著的他,被司機老婆那一句「想咩…知道…真相」弄醒,然後就說了一句:「師傅,你同你老婆都好恩愛喎。」 「唉,結左婚成三十幾年啦,仔都就嚟結婚,唔恩愛就晨早係上面包咗二奶囉。」
「咦,聽你老婆講,話次次都幫你錄低個節目喎……」話口未完,司機就搶過來說:「唉,香港嘅電視已經越嚟越冇野睇啦,咁啱有日唔洗開工,轉轉下台,見到呢個節目,叫《想知道的真相》,睇落又幾好睇喎,之後就集集都追啦。你有冇睇架後生仔?」

他的倦意被司機那番話完全被消除,然後就拍了拍他肩膀:「其實我就係呢個節目嘅監製,哈哈。」司機看看車上的鏡,就大聲地說:「原來你就係李振永啦!今晚車到你真係好彩囉,我好鍾意睇呢個節目架,做得好好,唔會好似大台啲新聞咁,一啲都唔老實報新聞。」

「你連監製嘅名都認得,果然係忠實fans啊!仲以為你地唔會睇我地個台,只會睇無線。」
「我身邊大部份人都仲講無線做乜做物,完全無興趣。咦,呢樣證明咗我都幾有taste喎。」
「哈哈,個個都只係睇大台,我地呢啲細台嘅,係難做嘅。」
「係啊,不過我叫佢膠台嘅,因為成日播膠劇,人又膠樣,唔睇也罷啦。不過呢,講起你嘅節目呢,我好鍾意果期講大肚婆餵人奶,同埋怪獸家長,真係做得好好。」
「好多主題都係由我嘅同事諗出嚟嘅,佢地功勞仲多過我啦。不過見你連我個名都記得,就提早話你知啦,嚟緊會講下呢排成日討論嘅新界東北單嘢,因為都幾值得關注,而且…我屋企人住喺嗰頭。」
「係咩,咁慘啊,咁要講下啦,幫你老豆老母發聲嘛。我實睇㗎,加油啊監製。」

說時遲 那時快,已經到了太和邨的路口。振永拿出口袋裡的兩張一百蚊,然後司機說:「唔洗啦,當係我請你搭車啦!」多番推搪下,振永最後亦勉為其難地搭了一程免費的士。

回到家後,就不斷重看新界東北的資料,何時草擬撥款、何時討論、立法會上的片段等均看得一清二楚。

一醒過來,就是早上9點。振永連忙洗澡換衫回電視台,回到辦公室後,就召喚他的團隊去會議室開會。

「Shirley,啲訪問剪好哂片未?」
「剪好哂,放咗落電腦度。」
「Justin,book咗studio未?」
「尋日book咗,頭先返嚟攞埋張record添,完左去簽返個名就得。」
「份稿俾咗柳一江未?」
「照舊,8點半嚟到studio已經攞埋份稿等我哋。」
「係喎,上集劏房果集收視幾多?」
「今朝先睇咗,16.8 啊,成功拉走大台嘅劇5點收視,佢地再跌嘅話,遲啲低過我地添!」Shirley陰陰嘴笑著回應。
振永非常滿意,「非常好,可以嘅話,我哋傾埋呢期新界東北嘅細節,10點落去studio OK? 今晚拍得順利嘅話,請大家去食放題好無?」
「好!老細萬歲!」Shirley及Justin等手足拍著手歡呼。
「今次都靠你啦杰哥,拍到你做導演一齊拍節目都真係我好彩。」他拍住杰哥的肩膀,但杰哥卻鬆開他的手,笑著說:「挑,講呢啲!你仲係新人咩,唔好咁長氣啦。」

而在他們開會時,監督整個新聞時事部的其一上司Chris突然打開門,問他們下期做什麼主題。如實回答後,他即時大聲地說,「今期唔好做新界東北啦,諗過其他啦。」全場一臉茫然,振永問為什麼,然後Chris摸摸那撇鬍鬚答他:「不要問,只要唔做」。然後振永大聲問多次為什麼,Chris再答:「唉,你出嚟同我傾啦,我本身都唔想講點解啦⋯⋯」

然後,振永和他談完後,就…氣憤地回到會議室,大叫「_!」

(待續)

各位可以在留言討論劇情喔!究竟振永點解咁嬲呢?中間發生咗咩事呢?
Like: 唔想估,想快啲有下集
Heart: 豉椒炒魷
Wow: 肯定被DQ啦
Cry: 有大Project想打尖
Angry: 其實Chris想升振永職

(P.S. 原諒我喜歡B1A4,所以男主角的名字就用了振永,希望不會令大家跳戲。hehe。)

啱睇就Like埋我地個Facebook專頁
香港土生土長的人,就讀於嶺南大學文化研究系。關心社會,熱衷於研究各樣文化及現象,熱愛研究韓國文化。

Leave a Comment

Your email address will not be published. Required fields are marked *