一個人最執著就係搵嘢嘅時候

一個人最執著就係搵嘢嘅時候

「我明明放咗喺枱面,點解會唔見咗?」我說。
「係咪記錯呀,搵下手袋有無?」媽媽說。
「搵過喇,連無可能嘅地方都搵晒,無。」我說。
「都叫你擺好啲嘢啦,周圍擺就會唔見。」媽媽說。
「明明前幾日仲見到,係咪你拎咗呀?」我說。
「梗係無,你唔搵佢佢就會出返嚟架啦,成 12 點喇,瞓啦。」媽媽說。
「搵唔到我就唔瞓覺!」我說。

唔見嘢,每個人都試過,有啲人搵一陣搵唔到就算,有啲人搵成日都唔放棄,最慘係付出同結果唔成正比,有機會到最尾都係搵唔到,得個吉,白白浪費咗一日嘅時間。每次唔見嘢都會好煩躁,心諗明明幾日前先見過,點解一搵就無?好似畀人大整蠱咁,於是就會懷疑係咪身邊嘅人拎咗或者亂咁放,但以我多年唔見嘢嘅經驗嚟講,通常都係自己收好咗又唔記得。

腦細同我一樣對於搵嘢都好執著,有次佢唔見咗枝筆,直頭 meeting 都唔開,要搵到枝筆為止,佢搵晒所有同事嘅枱面,甚至連 keyboard 底、枱底都搵埋,爭在未搵垃圾筒,當然所有同事都有一齊搵啦,因為大家都好驚枝筆會出現喺自己個筆筒度。搵咗一輪都係無,原本腦細話放棄,大家都鬆一口氣,點知過五分鐘佢又話:「無理由唔見。」於是大家又再搵一大餐,跟住又放棄,跟住又再搵。有同事提出不如買過枝一模一樣嘅新筆,腦細話:「而家唔係要返枝筆,問題係枝筆無理由會唔見。」我當然明白佢嘅心情啦,但有時真係執著都無用。

誇張啲講,有時搵嘢真係會搵到個人鑽晒牛角尖,明明理性上知道應該都係搵唔到,但係永遠覺得自己付出咗咁多時間同心力去搵,點都要搵到或者得到啲嘢先收手,如果唔係之前嘅努力咪白費?但係有時人就係會忽略咗更要嘅嘢 – 止蝕。既然已經浪費咗咁多時間,理性上知道已經無結果,點解仲唔停呢?搵嘢係咁,愛情更加係咁。其實有時做人太執著真係會好辛苦,學會放下,生活會易過啲。

 

Photo: Flickr user bekassine

小盛女

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *