不得不承認,有啲大陸劇真係幾好睇

不得不承認,有啲大陸劇真係幾好睇

記得 TBB 第一次播大陸劇嘅時候我真係覺得好反感,心諗連電視台都開始淪陷,點解香港電視台唔可以播返香港人嘅節目,等我見返啲熟悉嘅面孔,聽吓廣東話,唔係配音假到死嗰隻,遲啲係咪連新聞都要講普通話用簡體字?(聽聞唔知邊個台播新聞已經係用緊簡體字)但係慢慢我都會開始麻目,因為屋企日日都播,於是有時得閒都會睇吓《武則天》、《無心法師》,其實我無追嚟睇,只係間中睇吓,但感覺上都好似好過 TBB 啲膠劇。

TBB 啲膠劇我都有睇,當笑片咁睇,一係啲劇情勁易估,有第三者呀,出軌呀,畀人強姦呀,有病呀咁,一係就勁離地,唔合邏輯。但係放工真係好攰,食飯睇呢啲劇唔使用腦,可以畀個腦放空一下。直至最近播《射鵰英雄傳》,我初初都覺得:「妖!又逼我睇大陸劇!」但咁啱我又早放工返得切屋企睇,我發覺真係出奇地好睇!啲劇情好緊湊,無悶場,多打鬥場面但拍得好好睇,唔係純粹殺殺殺噴晒血好暴力嗰種,節奏又明快,當然啦亦都有機會係因為我咁大個女都未睇過呢套經典劇,所以先會覺得咁好睇,係好睇到如果我加班睇唔到會想上網追返嗰隻。

以前睇膠劇我係會背住個電視機,邊聽聲邊打文,可以一心二用,但睇《射鵰》唔得,因為係會睇到入晒神,一個鐘之後就會爆一句:「下!點解咁快做完?」其實睇大陸劇無問題,問題係點解要喺 TBB 播啫。我都知係唔可以將膠劇同大陸劇比較,大陸一套劇投資幾多人力物力先?但係 TBB 啲劇可唔可以唔好咁是是但但,其實香港人才都多(直覺覺得),有時見啲膠劇嘅題材都好吸引,可能只係因為時間太緊逼,根本唔夠時間心機去做好一套劇,我記得宣萱講咗一句:「咁耐無返嚟 (TBB) 拍劇,有一樣嘢都係無變過,就係拍劇係唔需要瞓覺。」可想言之係幾咁辛苦,喺咁嘅情況之下,相信導演、編劇同演員都好難可以發揮得好,於是有啲位就會開始是是但但。

我記得以前嘅港劇真係好好睇,《西遊記》、《妙手仁心》、《茶是故鄉濃》、《陀槍師姐》等等,就算重播幾多次都會想再睇,但係而家就只係會用膠劇嚟形容港劇,無論係我,定身邊嘅朋友,都只會追韓劇、大陸劇或者美劇。《逃》出到第五季,最近我又由第一季睇返,真係好好睇,緊張到我手心冒汗。其實做人真係好簡單,放假可以輕鬆睇下一啲有水準嘅劇集已經好滿足,講真,打工仔有幾多時間可以做自己鍾意做嘅嘢?寫寫吓文又已經到咗星期日晚,要講誠哥金句:「聽日準時返工啦喂!」

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *