政府是否介意香港公營醫療崩潰?

政府是否介意香港公營醫療崩潰?

有到過公立醫院求診的人,都知道無論任何專科,所花最多時間就係等。排期要等,見醫生要等,做檢查要等,到藥房配藥要等,基本上一個簡單的定期門診覆診,花費幾個小時係常態。

筆者或其他同業,均多次指出香港投入醫療的資源遠比其他先進國家為少,而香港公立醫療系統的效率卻是冠絕全球[1],如何做到?就只係好簡單的無上限工作。例如不少外科醫生會七點幾回病房巡房,八點半開始做手術,大概五點手術完成再巡房,開會,學術分享等等,然後還有一個月平均四至六次的通宵當值(不少考獲專科資格的資深醫生都係一樣)。無論係精神科或其他專科,睇門診一個下午有30-40個病人亦係常態,五分鐘見一個病人,翻查過去病歷紀錄,身體檢查,寫病歷紀錄,解釋病情,各種治療檢查的好處和風險,開藥,如何完成?不外乎摩打手,一邊說話一邊打字,病人的藥單還未印好,下一位就已經坐低。醫生感冒發燒?門診有30幾個症,唔死都唔會請病假。香港公立醫院就做到了。唔少時候,放工離開的一剎那,實會驚覺人類的小宇宙實在是無窮無盡。

有人類的工作就有機會出錯,超負荷的工作量,自然出錯機會更大。同樣是人命攸關,飛機師和空中服務員有嚴格執行的每一更工作小時上限。一班長途航機最少有四名機師輪流工作,就因為要把出錯的因素減到最少。每一次發生重大事故,管理層的反應就不外乎係:指引已經存在,或者會檢討增加指引(其實潛台詞就係我已經做咗指引,唔關管理層事),更甚者,誤導公眾說前線醫生看漏了其實不存在的電腦提示。[2]

每一個市民,醫護人員都知道,不增加資源,留著資深人手,買更加有效的藥物,檢查儀器,公營醫療在人口不斷老化和增長之下係假以時日必定會爆煲。把經常醫療撥款增加 1% GDP [3],已經會好大分別,點解政府唔做 ? 個人認為,特區政府其實唔係太介意公營醫療系統爆煲。政府一向想推行自願醫療保險,討論了差不多十年,都係不能成事,講到底,自從強積金世紀大騙局,加上幾年揭發不少醫療保險的不合理條款(例如要求醫生一定要在門診進行大腸鏡檢查)[4],而沒有公司願意承保長期病患人士,好少香港人會信自願醫保會好過睇公立醫院。美國花費於醫療的開支係 GDP 的15%,但係唔少人無錢睇病,又或者買了保險但係最後發覺很多治療和檢查無得保,其實就係保險公司的從中獲利不少。[5]  但係如果香港公營醫療真係崩潰,香港人揀無可揀之下就要就範,要求政府推行自願醫療保險。

另外,政府或不少人士,都希望香港大幅降低輸入海外醫生門欖以增加人手。去年的醫委會改革,就以「便利海外醫生有限度註冊」為其中一目的 [6],最後因市民擔心政府大幅輸入不合水準的海外(大陸)醫生作罷。過去多年數據均指出,中國大陸醫生係為數最多來港應考執業試的一群,但及格率長期低於平均 [7],而且中國的醫療「紅包文化」根深蒂固,跟香港格格不入。當公營醫療系統爆煲,社會聲音自然會要求放寬海外醫生來講執業資格,但係你認為可以好似 1997 年以前,只係限於英聯邦國家或先進西方國家畢業的嗎?培訓一個本地醫生需要幾百萬,但係輸入人手則是零投入,更甚者,更可以輸入不少「政治正確」的醫生,政府何樂而不為。

醫護人員出錯固然要認,但現今某些傳媒,政客,所謂病人組織代表,不分清醫療事故還是已知風險甚或只係病情嚴重返魂乏術,均對公立醫護人員的獵巫式審判 [8][9],卻不探討每年加薪遠超前線的管理層的問題 [10],政府政策的失衡,只會令更多前線醫護人員離開公立醫療體系。公共醫療系統崩潰,受害的會是全港市民。

圖片來源:明報

啱睇就Like埋我地個Facebook專頁

2 comments

  1. Steve says:

    政府嚴重水浸, 但醫療服務及發展, 則嚴重不足, 顯示政府的無前膽能力, 只會年年加薪, 人民卻年年加辛!

Leave a Comment

Your email address will not be published. Required fields are marked *